Eet met jou hande
DEUR ONTWAAK!-MEDEWERKER IN GHANA
BAIE mense gebruik ’n mes, ’n vurk en ’n lepel om smaaklike kos na hulle mond te bring. Ander, soos dié wat in die Ooste grootgeword het, gebruik eetstokkies om dit te doen. Maar daar is kosse wat volgens party lekkerder smaak as jy dit met jou hande eet. Dink aan gebraaide ribbetjies, hoenderstukke, muffins, Chinese rolletjies en taco’s.
Maar wat van sop? Sal jy dít met jou vingers eet? ‘Onmoontlik!’ sê jy dalk. ‘Dit is warm en klewerig, en jy kan dit glad nie bymekaarhou nie.’ In baie Afrikalande is mense net so gewoond daaraan om sop met hulle vingers te eet as wat Asiate is om hulle kos met eetstokkies te eet. Laat ons jou bekend stel aan ’n Ghanese gereg en die genotvolle ondervinding om dit met jou hande te eet.
Fufu en grondboontjiesop
Fufu word gemaak van gekookte plantaan, ’n vrug wat naverwant is aan die gewone piesang, en van kassawe—wat ook maniok genoem word—’n plant met knolagtige wortels, wat oral in die trope gekweek word. Die plantane en kassawe word geskil, gewas en gekook tot dit sag is. Nadat die water afgegooi is, word dit alles saam met ’n stamper en vysel fyngestamp tot ’n gladde pap. Wanneer hierdie pap goed gemeng en sag is, word bolletjies daarvan gevorm.
Grondboontjiesop word van fyngemaakte grondboontjies, vleis of vis, tamaties, uie, peper en ander speserye gemaak. Die vleis of vis word gestoom en die speserye word bygevoeg, en daarna die water en die fyngemaakte grondboontjies. Die groente word gemeng en by die sop gevoeg, waarna alles geroer en goed gekook word. Die fufu-bolletjie word dan in ’n bakkie voorgesit, met die stomende grondboontjiesop daarop.
Die tegniek
Noudat hierdie smaaklike ete vir jou berei is, is die vraag: Hoe kry jy dit met net jou hande in jou mond? Wel, die geheim lê in die regte tegniek.
Jy moet natuurlik eers jou hande goed was. Steek dan die vingers van jou regterhand in die sop. Maar wees versigtig! As jy nie daaraan gewoond is nie, kan dit vir jou te warm wees!
Gebruik nou jou duim, wysvinger, middelvinger en ringvinger om ’n stukkie van die fufu af te breek. Hou die stukkie fufu in die sop en druk dit saggies met jou duim om ’n holtetjie daarin te maak, waarmee jy ’n bietjie van die sop kan opskep.
Lig dan jou hand uit die sop. Draai terselfdertyd jou pols en vingers na jou mond toe en sorg dat jou vingers laer as jou pols bly. So maak jy seker dat die sop nie teen jou arm afloop tot by jou elmboog nie.
Buig jou kop effens ondertoe wanneer jou hand by jou lippe kom, en gebruik die middel- en ringvinger om die fufu en sop in jou mond te sit. Geniet dit, maar wees weer eens versigtig. Nou sal die smaak van die brandrissie in jou mond moontlik vir jou te sterk wees, aangesien Ghanese geregte gewoonlik sterk gekrui is!
Jy sal hierdie metode moet herhaal totdat al die fufu opgeëet is. Eet die ander bestanddele, soos die stukke vleis, afsonderlik van die fufu. En as van die sop oorbly, kan jy jou hand gebruik om die laaste bietjie te eet.
Die ondervinding
Party Ghanese sê dat hulle al vyf hulle sintuie wil gebruik wanneer hulle eet. Jy hoor en ruik die kos terwyl jy dit voorberei. Jy sien en proe dit wanneer jy dit eet. Maar as jy jou vyfde sintuig wil gebruik, moet jy daaraan vat en dit voel.
Ongeag wat jou agtergrond is, jy kan seker wees dat ons Skepper, Jehovah God, in “alle soorte mense” belangstel (1 Timoteus 2:4). Dit laat ruimte vir ’n interessante verskeidenheid gebruike. En al is jy nie gewoond daaraan om jou sop met jou hande te eet nie, sal jy dalk uitvind dat dit ’n smaaklike en genotvolle ondervinding kan wees.