Moeders se eerbare rol

DIE rol van moeders is al dikwels geringgeskat en selfs verkleineer. ’n Paar dekades gelede het sommige mense begin neersien op die taak om vir kinders te sorg. Volgens hulle is dit minder belangrik as ’n loopbaan en is dit selfs ’n vorm van onderdrukking. Hoewel die meeste mense sou dink dat so ’n beskouing onredelik is, kry moeders dikwels die indruk dat ander mense dit as ’n tweederangse werk beskou om ’n tuisteskepper te wees en vir kinders te sorg. Party voel selfs dat ’n vrou ’n loopbaan buite die huis moet hê sodat sy haar volle potensiaal kan verwesenlik.

Tog waardeer baie mans en kinders die moeder se rol in die gesin. Carlo, wat by die takkantoor van Jehovah se Getuies in die Filippyne dien, verduidelik: “Ek is hier vandag weens die opvoeding wat my ma my gegee het. My pa was uitermate streng en het vinnig straf uitgedeel, maar my ma het ons gehelp deur dinge te verduidelik en met ons uit te redeneer. Ek waardeer regtig haar onderrigmetode.”

Peter, in Suid-Afrika, is een van ses kinders wat deur ’n moeder met ’n beperkte skoolopleiding grootgemaak is. Sy vader het die gesin verlaat. Peter sê: “As ’n bediende en skoonmaker het my ma nie baie verdien nie. Dit was vir haar moeilik om ons almal se skoolgeld te betaal. Ons het dikwels honger gaan slaap. Dit was ’n uitdaging vir haar net om ’n dak oor ons koppe te hou. Ten spyte van al hierdie probleme het my ma nooit moed opgegee nie. Sy het ons geleer om ons nooit met ander te vergelyk nie. Sonder haar moedige toewyding sou ons nooit ’n sukses van ons lewe kon gemaak het nie.”

Ahmed, ’n getroude man in Nigerië, sê hoe hy voel oor sy vrou se hulp om hulle kinders groot te maak: “Ek waardeer die rol wat my vrou speel. Wanneer ek nie by die huis is nie, het ek die vertroue dat sy goed na die kinders omsien. Ek voel nie bedreig deur my vrou nie, maar bedank haar eerder en laat die kinders weet dat hulle haar moet respekteer net soos hulle my respekteer.”

’n Palestynse man het nie gehuiwer om sy vrou se sukses as moeder te prys nie: “Lina het al baie sukses met ons dogter behaal en dra baie by tot die geestelikheid van ons gesin. Na my mening kan haar sukses toegeskryf word aan haar godsdiensoortuigings.” Lina is een van Jehovah se Getuies en volg Bybelbeginsels om haar dogter op te voed.

Wat is van hierdie beginsels? Wat kan gesê word omtrent die Bybel se beskouing van moeders? Hoe is moeders in vroeë tye ’n posisie van waardigheid en respek as opvoeders van hulle kinders toegeken?

’n Gebalanseerde beskouing van moeders

Toe die vrou geskep is, is sy ’n eerbare rol in die gesinsreëling gegee. Die eerste boek van die Bybel sê: “Jehovah God het verder gesê: ‘Dit is nie goed dat die mens alleen bly nie. Ek gaan vir hom ’n helper maak, as ’n komplement van hom’” (Genesis 2:18). Die eerste vrou, Eva, was dus as ’n komplement aan Adam gegee. Sy is geskep om ’n volmaakte helper vir hom te wees. Sy sou ’n deel wees van God se voorneme vir hulle, naamlik om kinders voort te bring en vir hulle te sorg sowel as na die aarde en die diere daarop om te sien. Sy sou die intellektuele stimulasie en die ondersteuning van ’n ware metgesel voorsien. Hoe gelukkig was Adam tog oor hierdie beeldskone gawe wat hy van die Skepper ontvang het!—Genesis 1:26-28; 2:23.

Later het God riglyne vasgestel oor hoe vroue behandel moes word. Israelitiese moeders moes byvoorbeeld met eer behandel word, nie met veragting nie. As ’n seun ‘’n vloek oor sy vader en sy moeder uitgespreek het’, sou hy die doodstraf opgelê word. Christenjongmense is vermaan om ‘gehoorsaam te wees aan hulle ouers’.—Levitikus 19:3; 20:9; Efesiërs 6:1; Deuteronomium 5:16; 27:16; Spreuke 30:17.

Die moeder moes onder haar man se leiding die opvoeder van dogters sowel as seuns wees. ’n Seun is beveel om ‘nie die wet van sy moeder te verlaat nie’ (Spreuke 6:20). Spreuke hoofstuk 31 bevat ook “die gewigtige boodskap wat [koning Lemuel se] moeder hom ter teregwysing gegee het”. Sy het haar seun wyslik beveel om die ongepaste gebruik van alkohol te vermy, en gesê: “Dit is nie gepas vir konings om wyn te drink of vir hoë amptenare om te sê: ‘Waar is sterk drank?’ nie, sodat hy nie drink en vergeet wat verorden is en die regsaak van enigeen van die kinders van ellende verdraai nie.”—Spreuke 31:1, 4, 5.

Verder sou dit verstandig wees van elke jong man wat dit oorweeg om te trou, om na te dink oor die beskrywing van die “bekwame vrou” wat deur koning Lemuel se moeder gegee is. Sy het gesê: “Haar waarde is baie meer as dié van korale.” Nadat die koning se moeder beskryf het watter belangrike bydrae so ’n vrou tot ’n huisgesin maak, het sy gesê: “Bekoorlikheid kan vals wees, en skoonheid kan nietig wees; maar die vrou wat Jehovah vrees, sy verwerf lof vir haarself” (Spreuke 31:10-31). Dit is duidelik dat ons Skepper vroue geskep het om ’n posisie van eer en verantwoordelikheid in die gesin te beklee.

In die Christengemeente word vrouens en moeders ook geëer en waardeer. Efesiërs 5:25 sê: “Mans, hou aan om julle vrouens lief te hê.” Aan die jong man Timoteus, wie se ma en ouma hom grootgemaak het om “die heilige geskrifte” te respekteer, is hierdie geïnspireerde raad gegee: “Vermaan . . . ouer vroue soos moeders” (2 Timoteus 3:15; 1 Timoteus 5:1, 2). ’n Man moet dus respek vir ’n ouer vrou hê asof sy sy moeder is. Ja, God waardeer vroue en gee aan hulle ’n waardige rol.

Spreek jou waardering uit

’n Man wat in ’n kultuur grootgeword het waar vroue as minderwaardig beskou is, sê: “Ek is geleer dat alles om die man draai, en ek het gesien hoe vroue mishandel en sonder respek behandel word. Dit het dus inspanning geverg om vroue te beskou soos die Skepper hulle beskou—as ’n komplement, of helper, in die huis en as deel van ’n span in die opvoeding van kinders. Hoewel dit vir my moeilik is om my vrou te prys, besef ek dat my kinders se goeie eienskappe aan haar inspanning te danke is.”

Ja, moeders wat hulle verantwoordelikheid as opvoeders aanvaar, kan trots voel oor die rol wat hulle speel. Dit is ’n loopbaan wat die moeite werd is. Hulle verdien om geprys en opreg bedank te word. Ons leer soveel van moeders—gewoontes wat ons ons hele lewe lank goed te pas kom, goeie maniere wat noodsaaklik is vir goeie verhoudings en in baie gevalle ’n sedelike en geestelike opvoeding wat jongmense op die regte pad hou. Het jy onlangs vir jou moeder gesê hoeveel jy alles waardeer wat sy vir jou gedoen het?

[Prent op bladsy 9]

Peter se moeder het hom geleer om nie moed op te gee nie

[Prent op bladsy 10]

Ahmed is baie dankbaar vir sy vrou se hulp om hulle kinders groot te maak

[Prent op bladsy 10]

Lina se man skryf sy dogter se goeie gedrag aan sy vrou se godsdiensoortuigings toe