Jongmense vra . . .

Homoseksualiteit—Hoe kan ek dit vermy?

“Toe ek 12 jaar oud was, het ek aangetrokke gevoel tot ’n meisie by die skool. Ek het verward gevoel en was bekommerd dat ek dalk ’n lesbiër is.”—Anna.a

“Gedurende my tienerjare het ek geworstel met ’n aangetrokkenheid tot ander seuns. Diep in my binneste het ek geweet dat daardie gedagtes nie normaal is nie.”—Olef.

“Ek en my vriendin het een of twee keer gesoen. Omdat ek nog steeds van seuns gehou het, het ek gewonder of ek dalk biseksueel is.”—Sarah.

DIE verdraagsame gesindhede van vandag het daartoe gelei dat party jongmense met homoseksuele verhoudings eksperimenteer. “Baie meisies in my skool sê dat hulle lesbies of biseksueel is of nuuskierig is oor biseksuele verhoudings”, sê 15-jarige Becky. Christa, 18, sê dat daar ’n soortgelyke situasie by haar skool is. “Twee van my klasmaats het my al gevra om seks met hulle te hê”, sê sy. “Een het vir my ’n briefie geskryf en gevra of ek wou weet hoe dit is om saam met ’n meisie te wees.”

Aangesien mense so onbeskaamd is oor homoseksuele verhoudings, wonder jy dalk: ‘Is homoseksualiteit werklik sleg? Sê nou ek voel aangetrokke tot iemand van dieselfde geslag? Beteken dit dat ek gay is?’

Hoe beskou God homoseksualiteit?

Vandag is daar baie mense—selfs party geestelikes—wat homoseksualiteit goedpraat. Maar die Bybel laat geen ruimte vir verwarring nie. Dit sê vir ons dat Jehovah God die man en vrou gemaak het en dat dit sy voorneme is dat seksuele begeertes net tussen ’n man en sy vrou bevredig moet word (Genesis 1:27, 28; 2:24). Dit is dus glad nie verbasend dat die Bybel homoseksuele dade veroordeel nie.—Romeine 1:26, 27.

Baie sal natuurlik sê dat die Bybel verouderd is. Veertienjarige Megan sê byvoorbeeld: “Daar’s nie plek in vandag se wêreld vir party van die dinge wat in die Bybel staan nie.” Maar waarom is party so haastig om so te sê? Dikwels is dit omdat die Bybel se beskouing bots met hulle beskouing. Hulle verwerp God se Woord omdat dit iets anders leer as wat hulle wil glo. Maar dit is ’n bevooroordeelde beskouing, en die Bybel moedig ons aan om bo sulke vooroordeel uit te styg! Trouens, in sy Woord spoor Jehovah God ons aan om die feit in ag te neem dat sy gebooie vir ons beswil is (Jesaja 48:17, 18). Dit is redelik. Wie ken in elk geval ons menslike samestelling beter as ons Skepper?

As jongmens ondervind jy dalk ’n verskeidenheid emosies. Sê nou jy voel aangetrokke tot ’n lid van dieselfde geslag? Beteken dit outomaties dat jy ’n homoseksueel is? Nee. Onthou, jy is in “die bloei van die jeug”, ’n tyd waarin jy aan onwillekeurige seksuele prikkeling onderhewig is (1 Korintiërs 7:36). Jy voel dalk ’n tyd lank aangetrokke tot ’n lid van dieselfde geslag. Maar die feit dat jy sulke gevoelens het, beteken nie dat jy gay is nie. Trouens, statistiek toon dat hierdie neigings gewoonlik met die verloop van tyd vervaag. Maar dalk wonder jy: ‘Hoe ontstaan hierdie begeertes in die eerste plek?’

Party sê dat homoseksualiteit deur die gene bepaal word. Ander sê dat dit aangeleer word. Dit is nie die doel van hierdie artikel om in die vraag te delf of hierdie soort gedrag aangebore is of aangeleer word nie. Om die waarheid te sê, dit lyk of dit ’n growwe oorvereenvoudiging sal wees om homoseksualiteit aan ’n enkele oorsaak toe te skryf. Homoseksualiteit—soos talle ander gedragspatrone—is blykbaar baie meer ingewikkeld.

Ongeag die oorsaak, die belangrike ding is om te besef dat die Bybel homoseksuele dade veroordeel. Iemand wat met homoseksuele begeertes worstel, staan dus voor ’n bereikbare doelwit—hy of sy kan kies om nie daardie begeertes te bevredig nie. Om toe te lig: Iemand is dalk “geneig . . . tot woede” (Spreuke 29:22). Dalk het hy voorheen gou op sy perdjie geklim. Maar nadat hy die Bybel bestudeer het, besef hy dat hy selfbeheersing moet aankweek. Beteken dit dat hy nooit weer sal voel hoe woede in hom opwel nie? Nee. Omdat hy egter weet wat die Bybel oor onbeteuelde woede sê, weier hy om voor sy gevoelens te swig. Dit is ook so met iemand wat al tot persone van dieselfde geslag aangetrokke gevoel het, maar wat nou geleer het wat die Bybel oor homoseksuele gebruike sê. Soms sal ’n verkeerde begeerte dalk nog steeds opkom. Die persoon kan nietemin daardie begeerte weerstaan as hy of sy op die raad van die Bybel ag slaan.

Homoseksuele begeertes kan weliswaar diepgewortel wees. Maar wees verseker dat selfs diepgewortelde begeertes nie onoorkombaar is nie (1 Korintiërs 9:27; Efesiërs 4:22-24). Uiteindelik is jy in beheer van hoe jy jou lewe gaan lei (Matteus 7:13, 14; Romeine 12:1, 2). En in teenstelling met wat party beweer, kan jy leer om jou drange te beheer—of ten minste om nie daaraan toe te gee nie.

Verwerp verkeerde gebruike

Hoe kan jy keer dat jy by homoseksuele gebruike betrokke raak?

◼ Eerstens Werp al jou sorge op Jehovah in gebed, met die vertroue dat ‘hy vir jou sorg’ (1 Petrus 5:7; Psalm 55:22). Jehovah kan jou versterk deur jou die vrede te gee wat “alle denke te bowe gaan”. Dit kan ‘jou hart en jou verstandelike vermoëns bewaak’ en jou “krag wat bo die normale is”, gee sodat jy nie aan verkeerde begeertes toegee nie (Filippense 4:7; 2 Korintiërs 4:7). Sarah, wat gevrees het dat sy dalk biseksueel is, sê: “Wanneer my gedagtes my ontstel, bid ek; en Jehovah onderskraag my. Sonder sy hulp sou ek nie hierdie probleem kon hanteer nie. Gebed is my lewenslyn!”—Psalm 94:18, 19; Efesiërs 3:20.

◼ Tweedens Vul jou verstand met opbouende geestelike gedagtes (Filippense 4:8). Lees die Bybel elke dag. Moet nooit die krag daarvan onderskat om jou verstand en hart ten goede te vorm nie (Hebreërs 4:12). ’n Jong man genaamd Jason sê: “Die Bybel—insluitende tekste soos 1 Korintiërs 6:9, 10 en Efesiërs 5:3—het ’n kragtige uitwerking op my gehad. Ek lees hierdie tekste wanneer verkeerde begeertes ook al by my opkom.”

◼ Derdens Vermy pornografie en homoseksuele propaganda, wat verkeerde begeertes net sal aanwakker (Psalm 119:37; Kolossense 3:5, 6).b Party rolprente en televisieprogramme bevorder ook die idee dat homoseksualiteit niks meer as ’n sogenaamde alternatiewe lewenswyse is nie. “Die wêreld se verwronge beskouing het my denke beïnvloed en tot my seksuele verwarring bygedra”, sê Anna. “Nou bly ek weg van enigiets of enigiemand wat homoseksualiteit bevorder.”—Spreuke 13:20.

◼ Vierdens Praat met iemand wat jy vertrou oor jou gevoelens (Spreuke 23:26; 31:26; 2 Timoteus 1:1, 2; 3:10). Olef, wat ’n Christen- ouer man om hulp gevra het, sê: “Sy raad was baie doeltreffend. Ek wens ek het lankal met hom gaan praat.”

Moenie tou opgooi nie!

Party sal natuurlik sê dat dit onnodig is om al hierdie dinge te doen, dat jy eenvoudig jou seksualiteit moet aanvaar en jou nie moet verset teen wat jy is nie. Maar die Bybel sê dat jy beter as dit kan doen! Dit sê byvoorbeeld vir ons dat party vroeë Christene wat voorheen homoseksualiteit beoefen het, verander het (1 Korintiërs 6:9-11). Jy kan ook as oorwinnaar uit die stryd tree—al word die stryd tans net in jou hart gevoer.

As jou begeertes nie wil weggaan nie, moet jy nie tou opgooi of tot die slotsom kom dat daar nie hoop is vir jou nie (Hebreërs 12:12, 13). Almal van ons stry van tyd tot tyd teen verkeerde neigings (Romeine 3:23; 7:21-23). As jy weier om aan verkeerde begeertes toe te gee, sal hulle dalk later bedaar (Kolossense 3:5-8). Bowenal, steun op Jehovah vir hulp. Hy is lief vir jou en weet wat jou gelukkig sal maak (Jesaja 41:10). Ja, “vertrou op Jehovah en doen wat goed is . . . , en hy sal jou die versoeke van jou hart gee”.—Psalm 37:3, 4.

Nog artikels uit die reeks “Jongmense vra . . . ” kan gevind word op die webwerf www.watchtower.org/ype

[Voetnote]

IETS OM OOR TE DINK

◼ Waarom keur God homoseksualiteit af?

◼ Wat kan jy doen as jy met homoseksuele gevoelens worstel?

◼ Wie kan jy in jou vertroue neem as jy teen homoseksuele drange stry?

[Prent op bladsy 30]

Nader ’n volwasse Christen wat geestelik ryp is, vir ondersteuning