4. Wees oplettend wanneer jy uiteet

Jeff, ’n gesonde en energieke 38-jarige man, het sy gesin uitgeneem na ’n restaurant naby Pittsburgh, Pennsilvanië, VSA. ’n Maand later is Jeff dood aan akute lewerversaking. Die oorsaak? Groenuie in sy kos—besmet met hepatitis A. 

BYNA die helfte van al die geld wat in een Westerse land aan voedsel bestee word, word in restaurante uitgegee. Maar in dieselfde land word restaurantkos verbind met omtrent die helfte van alle uitbrekings van voedselverwante siektes.

Ja, as jy besluit om by ’n restaurant te eet, is dit iemand anders wat die bestanddele koop, die kombuis skoonmaak en die kos kook. Maar jy kan kies waar jy sal eet, wat jy sal eet en of jy enige oorskietkos huis toe sal neem.

● Kyk om jou rond.

“Wanneer ons die eerste keer by ’n restaurant instap”, sê Daiane, wat in Brasilië woon, “kyk ek rond om te sien of die tafels, tafeldoeke, eetgerei en kelners skoon en netjies is. Indien nie, stap ons uit en soek ons ’n ander restaurant.” In party lande inspekteer en gradeer gesondheidsbeamptes restaurante gereeld vir sindelikheid, en hulle bevindings word dan aan die publiek bekend gemaak.

● Wees versigtig vir brakkiesakkies.

Die Amerikaanse Voedsel- en Medisyneraad stel voor: “As jy nie binne twee uur nadat jy bedien is, tuis sal wees nie [gouer as die temperatuur bo 32 grade Celsius is], moet jy nie oorskietkos huis toe neem nie.” As jy oorskietkos het, moet jy ná jou maaltyd reguit huis toe gaan en dit in die yskas bêre.

As jy die vier wenke in hierdie reeks artikels toepas, kan jy jou voedsel veiliger maak.

[Venster/Prent op bladsy 7]

LEER JOU KINDERS: “Ons leer ons kinders om kos te vermy wat moontlik nie veilig is om te eet nie.”—Noemi, Filippyne