Die plaag van ongelykheid word teëgewerk
Die Skepper sal binnekort die gelykheid teweegbring waarna mense smag. Tot dan kan ons ten minste stappe doen om die plaag van ongelykheid wat ons en ons gesinne raak teë te werk. Soos Nelson Mandela, voormalige president van Suid-Afrika, gesê het: “Dit is wat ons doen met wat ons het, nie met wat aan ons gegee word nie, wat een persoon van ’n ander laat verskil.”
DIE geskiedenis bevestig sy woorde. Daar is baie mans en vroue wat by geboorte min gegee is, maar omdat hulle gebruik gemaak het van wat hulle gehad het, het hulle suksesse behaal wat hulle onderskei het van hulle portuurs wat moontlik meer begaaf was. Daarteenoor het ander individue wat van geboorte af met gunstige omstandighede geseën is, verkwis wat hulle gehad het en nie hulle volle potensiaal ontwikkel nie.
Benut wat jy het ten volle!
Jehovah se Getuies stel opreg daarin belang om mense te help om kennis van God se voornemens op te doen deur middel van ’n studie van die Bybel. Maar hulle besef dat mense geletterd moet wees om ten volle by Bybelinligting baat te vind. Om dié rede het Jehovah se Getuies tienduisende mense leer lees en skryf, waaronder 23 000 mense (sedert die middelnegentigerjare) in een land in Wes-Afrika alleen. Die San Francisco Examiner het na die uitstekende maatskaplike diens wat Jehovah se Getuies lewer, verwys en gesê: “Jy kan hulle as modelburgers beskou. Hulle betaal getrou hulle belasting, sorg vir siekes en beveg ongeletterdheid.”
Daarbenewens het Jehovah se Getuies deur middel van ’n progressiewe kursus in die openbare spreekkuns honderdduisende mense opgelei om bekwame sprekers te word wat hulle in die openbaar vlot kan uitdruk. Onder hierdie duisende is party wat voorheen ernstige spraakprobleme gehad het. Neem as voorbeeld die man van Suid-Afrika wat skryf: “Ek het so erg gehakkel dat ek ’n introvert geword het wat gewoonlik op ander staatgemaak het om namens my te praat. . . . Toe ek by die Teokratiese Bedieningskool aangesluit het en ’n leesgedeelte uit die Bybel voor ’n klein gehoor moes doen . . . , het [ek] só erg gehakkel dat ek nie die toewysing in die gegewe tyd kon voltooi nie. Ná die vergadering het die [raadgewer] my vriendelik praktiese raad gegee. Hy het voorgestel dat ek oefen deur hardop vir myself te lees. Ek het dit gedoen deur dag na dag my tyd te gebruik om hardop uit my Bybel en Die Wagtoring te lees.” Hierdie man het so goed gevorder dat hy nou openbare toesprake hou voor gehore van honderde, selfs duisende mense.
Gelykheid onder broers
Die omstandighede van Jehovah se Getuies verskil grootliks wat opvoeding, gesondheidsorg, asook ekonomiese en maatskaplike stand betref. Hierdie verskille weerspieël bloot die onvolmaakte wêreldse toestande waarin hulle lewe. Maar in teenstelling met ander godsdiensgroepe bestaan rasse-, maatskaplike en ekonomiese vooroordeel feitlik nie meer onder hulle nie.
Hulle het dit reggekry omdat hulle alles in hulle vermoë doen om toe te pas wat hulle uit die Bybel geleer het. Hulle neem Bybelbeginsels soos die volgende heelhartig aan: “Nie wat die méns sien, sien God nie; want die mens sien aan wat voor oë is, maar die HERE sien die hart aan” (1 Samuel 16:7). “God [is] nie partydig . . . nie, maar in elke nasie is die mens wat hom vrees en regverdigheid beoefen vir hom aanneemlik” (Handelinge 10:34, 35). “Moet niemand kwaad vir kwaad vergeld nie. Verskaf voortreflike dinge voor die oë van alle mense. Wees, indien moontlik, sover dit van julle afhang, vreedsaam teenoor alle mense.”—Romeine 12:17, 18; sien ook 1 Timoteus 6:17-19; Jakobus 2:5, 9.
Aangesien Jehovah se Getuies streng bly by hierdie Bybelbeginsels wat eenheid bevorder, duld hulle geen ongelykheid weens rasse-, maatskaplike of ekonomiese verskille nie. Hierdie faktore speel byvoorbeeld geen rol wanneer daar besluit word wie diensvoorregte in die Christengemeente moet kry nie. Persone word alleenlik op grond van geestelike kwalifikasies in posisies van verantwoordelikheid, soos onderrigting en toesig, aangestel.—1 Timoteus 3:1-13; Titus 1:5-9.
Hoe verkwikkend is dit tog vir individue wat weens die ongelykhede van ’n bevooroordeelde wêreld gely het om met mense te assosieer wat hulle as broers en susters met ’n gelyke posisie voor hulle Skepper behandel! Martina kan hiervan getuig. Nadat haar vader die gesin verlaat het, is sy in ’n arm, enkelouergesin grootgemaak. Sy is dikwels soos ’n uitgeworpene behandel, sy het min selfvertroue gehad en het dit moeilik gevind om met ander oor die weg te kom. Sy het ’n traak-my-nie-agtige houding ontwikkel. Maar dinge het verander nadat sy die Bybel begin studeer het en een van Jehovah se Getuies geword het. Sy sê: “Ek moet nog stry teen negatiewe denke, maar nou kan ek die probleem beter die hoof bied. Ek het nou groter selfrespek en ek praat met meer selfvertroue. Die waarheid het my ’n verantwoordelikheidsin gegee. Nou weet ek dat Jehovah my liefhet en dat die lewe die moeite werd is.”
As ’n internasionale groep Christene geniet Jehovah se Getuies in meer as 230 lande ’n mate van gelykheid wat waarlik uniek is in die wêreld van vandag. Kan enige ander godsdiensorganisasie ’n soortgelyke bewering maak en dit met feite staaf?
Jehovah se Getuies is natuurlik realisties. Hulle erken geredelik dat hulle, weens die feit dat hulle in ’n onvolmaakte wêreld leef, net so min die vermoë het om ongelykheid onder mense uit die weg te ruim as ander wat dit deur die eeue heen probeer doen het—en misluk het. Hulle verbly hulle nietemin omdat hulle in hulle eie geledere baie gedoen het om hierdie dodelike plaag teë te werk. En met sterk geloof in God se belofte sien hulle uit na ’n nuwe wêreld van regverdigheid waar ongelykheid vir ewig tot die verlede sal behoort.
Ja, alle gehoorsame mense sal binnekort weer die gelyke “waardigheid en regte” hê wat in die eerste plek hulle Skepper se voorneme vir hulle was. Wat ’n wonderlike gedagte tog! En hierdie keer sal dit ’n werklikheid wees!
[Prent op bladsy 7]
Jehovah se Getuies beveg ongeletterdheid deur tienduisende mense te leer lees en skryf
[Prent op bladsy 8]
Bybelwaarhede help om rasse-, maatskaplike en ekonomiese vooroordeel uit die weg te ruim