Ongelykheid—Was dit God se voorneme?

Die antwoord in een woord is nee. Kom ons kyk waarom ons dit kan sê.

GOD se voorneme was dat alle mense gelyke geleenthede moes hê om die lewe en geluk te geniet. Ons lees aangaande die mens se skepping: “God het gesê: Laat Ons mense maak na ons beeld, na ons gelykenis, en laat hulle heers oor die visse van die see en die voëls van die hemel en die vee en oor die hele aarde en oor al die diere wat op die aarde kruip.” Toe die aardse skepping klaar was, het “God alles [gesien] wat Hy gemaak het, en—dit was baie goed”.—Genesis 1:26, 31.

Kan God die hedendaagse droewige toestand van ongelykheid “baie goed” noem? Beslis nie, want “God is liefde” (1 Johannes 4:8). Daar word van hom gesê dat hy “niemand partydig behandel” nie en dat “sy werk [volmaak is], want al sy weë is geregtigheid. ’n God van getrouheid, by wie daar geen onreg is nie; regverdig en opreg is hy.” (Deuteronomium 10:17, NW; 32:4, NW; vergelyk Job 34:19.) En die apostel Petrus het tot dié gevolgtrekking gekom: “Ek bemerk vir seker dat God nie partydig is nie, maar in elke nasie is die mens wat hom vrees en regverdigheid beoefen vir hom aanneemlik.”—Handelinge 10:34, 35.

Hoe kon God, wat liefdevol, onpartydig, opreg en regverdig is, mense geskep het met inherente ongelykheid wat betref hulle reg om gelukkig te wees? Dit sou heeltemal strydig met sy persoonlikheid wees om diskriminasie tussen mense toe te laat en om hulle in ’n stelsel van ongelykheid te plaas. Sy voorneme was dat hulle almal ‘vry gebore word en gelyke waardigheid en regte het’. En tog is dit vandag duidelik nie die geval nie. Waarom nie?

Die oorsprong van ongelykheid

Die feit dat God mense geskep het om gelyk te wees, beteken nie dat dit sy voorneme was dat hulle almal in elke opsig gelyk moes wees nie. Hulle kon verskillende talente en persoonlikhede hê en in verskillende dinge belangstel. Daar kon ook ’n verskil wees in hulle posisie of hoeveel gesag hulle het. Die man en vrou is byvoorbeeld nie in alle opsigte gelyk nie, maar God het die vrou “as ’n komplement” van die man geskep (Genesis 2:18, NW). Ouers en kinders verskil natuurlik wat gesag betref. Maar ondanks hierdie verskille was dit die godgegewe reg van almal—mans, vroue en kinders—om gelyke geleenthede te hê om die basiese behoeftes vir geluk te bevredig. Hulle moes almal gelyke waardigheid en aansien voor God geniet.

God se geesseuns, wat voor mense geskep is, is eweneens verskillende toewysings en verantwoordelikhede gegee (Genesis 3:24; 16:7-11; Jesaja 6:6; Judas 9). Hulle kon almal nietemin die Goddelike voorsienings van die lewe en geluk in gelyke mate geniet, binne die grense wat daar vir hulle gestel is. Hulle het sodoende God se onpartydigheid op ’n wonderlike manier weerspieël.

Ongelukkig was een geesskepsel nie tevrede met God se onpartydige reëling nie. Hy wou meer hê as wat God hom gegee het en het na ’n hoër, meer verhewe, posisie gesmag. Deur hierdie verkeerde begeerte te koester, het hy homself ’n mededinger gemaak van Jehovah, wat as Skepper tereg die allerhoogste posisie beklee. Hierdie opstandige geesseun van God het mense later oorreed om meer van God te eis as wat Hy hulle gegee het. (Genesis 3:1-6; vergelyk Jesaja 14:12-14.) Dit het toe gelyk of Jehovah se voorsiening vir mense om die lewe en geluk te geniet, verydel is. Hierdie opstandige geesskepsel, wat in Openbaring 20:2 as “die Duiwel en Satan” geïdentifiseer word, het die bose aanstigter van ongelykheid onder mense geword.

Sal die situasie ooit verander?

Die antwoord in een woord is ja!

Maar wie kan die verlangde veranderinge teweegbring? Menseleiers sukkel al eeue lank om dit te doen, en party ongetwyfeld in alle opregtheid. Hulle het beperkte sukses gehad, en dit laat baie mense tot die gevolgtrekking kom dat dit onrealisties is om te verwag dat die probleem van ongelykheid onder mense ooit opgelos gaan word. God se beskouing is egter in Jesaja 55:10, 11 opgeteken: “Soos die reën en die sneeu van die hemel neerdaal en daarheen nie terugkeer nie, maar die aarde deurvogtig en maak dat dit voortbring en uitspruit en saad gee aan die saaier en brood aan die eter; so sal my woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”

Hoe bemoedigend is dit tog dat Jehovah God verklaar het dat hy sy oorspronklike voorneme gaan vervul om alle mense van gelyke geleenthede vir die lewe en geluk te voorsien! As ’n God van waarheid het hy homself daartoe verbind om wat hy belowe het te vervul. Gelukkig het hy die begeerte sowel as die krag om dit te doen. Hoe gaan hy dit volbring?

Die antwoord lê in die Koninkryk waarvoor Jesus Christus al sy volgelinge leer bid het: “Ons Vader in die hemele, . . . Laat u koninkryk kom. Laat u wil geskied, soos in die hemel, so ook op die aarde” (Matteus 6:9, 10). Ja, God se Koninkryk is die instrument wat Jehovah gaan gebruik om ‘al daardie koninkryke [wat nou bestaan] te verbrysel en daar ’n einde aan te maak, maar self sal dit vir ewig bestaan’.—Daniël 2:44.

Onder die heerskappy van die hemelse Koninkryk sal ’n nuwe mensegemeenskap gevorm word. In hierdie verband het die apostel Johannes in die laaste boek van die Bybel, Openbaring, geskryf: “Ek het ’n nuwe hemel en ’n nuwe aarde gesien; want die vorige hemel en die vorige aarde het verbygegaan” (Openbaring 21:1). Al die aaklige vorme van ongelykheid—armoede, siekte, onkunde, diskriminasie en ander menslike ellendes—sal tot die verlede behoort.a

Jehovah se Getuies vestig al meer as ’n eeu lank mense se aandag op daardie Koninkryk (Matteus 24:14). Deur middel van die gedrukte woord en deur persoonlike hulp het hulle hulle ingespan om mense te help om kennis op te doen van God se voorneme, soos opgeteken in die Bybel. Hulle wêreldwye onderrigtingswerk het mense egter nie net die hoop gegee op ’n lewe van gelykheid en geluk in die toekoms nie, maar dit help nou alreeds om die plaag van ongelykheid teë te werk. Kom ons kyk hoe dit gedoen word.

[Voetnoot]

[Lokteks op bladsy 5]

Dit was God se voorneme dat alle mense gelyke geleenthede vir die lewe en geluk moet hê