Die goeie nuus moet sonder ophou bekend gemaak word
1 Die vroeë Christene het hulle bediening baie ernstig opgeneem. Lukas het gesê: “Hulle het elke dag in die tempel en van huis tot huis sonder ophou voortgegaan om te leer en die goeie nuus oor die Christus, Jesus, bekend te maak” (Hand. 5:42). Niks, nie eers vervolging, kon hulle keer nie! (Hand. 8:4). Hulle het elke dag met ander oor die waarheid gepraat.
2 Wat van ons? Vra jou af: ‘Besef ek die dringendheid van die tye? Is ek geneig om die goeie nuus sonder ophou bekend te maak?’
3 Hedendaagse voorbeelde van persone wat sonder ophou getuig het: Een suster, ’n slagoffer van polio, was aan ’n ysterlong gekluister. Sy kon nie na die Koninkryksaal toe gaan of ’n byeenkoms bywoon nie. Maar sy was intensief besig om die goeie nuus bekend te maak. Gedurende die 37 jaar wat sy aan die ysterlong gekluister was, was sy in staat om 17 mense te help om die waarheid te leer! Hoe het sy dit gedoen? Hoewel sy nie van deur tot deur kon gaan nie, het sy elke dag ’n manier gevind om informeel te getuig vir diegene wat met haar in aanraking gekom het.
4 Ons broers in Bosnië moes oorlog en ontberinge verduur. Hulle gaan nietemin voort om gereeld vir ander te getuig. In Sarajevo bestee die verkondigers elke maand gemiddeld 20 uur daaraan om met ander oor die goeie nuus te praat, en hulle hou gemiddeld twee Bybelstudies elk. Ondanks hulle haglike omstandighede doen hulle die predikings- en onderrigtingswerk sonder ophou.
5 Jongmense openbaar ook ywer vir die bediening. ’n Getuiegesin in Rwanda is na ’n kamer geneem waar soldate gereed gemaak het om hulle dood te maak. Die gesin het toestemming gevra om eers te bid. Dit is toegestaan, en die jong dogtertjie, Deborah, het hardop gebid: “Jehovah, ek en Pappa het hierdie week vyf tydskrifte versprei. Hoe gaan ons weer by daardie mense uitkom om hulle die waarheid te leer en om hulle te help om die lewe te kry?” Die hele gesin is weens haar sterk geloof en haar liefde vir die bediening gespaar.
6 Dit is vandag nodig dat ons op die uitkyk moet wees na geleenthede om vir ander te getuig en dat ons na diegene soek wat “die regte gesindheid vir die ewige lewe” het (Hand. 13:48). Gemeentelike ouer manne tref reëlings om groepgetuieniswerk te doen wanneer dit volgens plaaslike omstandighede geleë is, in die oggende, middae of aande. Artikels in Ons Koninkryksbediening en dele op die Diensvergadering asook kring- en streekbyeenkomste bied tydige wenke en aansporing om aan verskeie aspekte van die Koninkryksgetuieniswerk deel te neem. Boonop lei kring- en streekopsieners verkondigers in straatgetuieniswerk op, wys hulle hoe om in sakegebied te werk en gee ander maniere waarop daar getuig kan word waar mense ook al gevind word. Dit alles beklemtoon dat die goeie nuus sonder ophou bekend gemaak moet word!
7 Jesus se apostels het met vrymoedigheid gesê: “Ons kan nie ophou praat oor die dinge wat ons gesien en gehoor het nie.” Hoe het hulle volhard ten spyte van al die struikelblokke? Hulle het Jehovah gevra om hulle te help, wat hy wel gedoen het, en “hulle is almal sonder uitsondering met die heilige gees vervul en het die woord van God met vrymoedigheid gespreek” (Hand. 4:20, 29, 31). Almal word dalk nie met uitsonderlike ondervindinge in die bediening geseën nie, maar as ons werklik die begeerte het om die goeie nuus sonder ophou bekend te maak en as ons die poging aanwend om dit selfs daagliks te doen, sal Jehovah ons help.