Is jy ’n voltydse Getuie?
1 Sal jy ja antwoord op hierdie vraag? Hoewel nie al Jehovah se toegewyde knegte in die voltydse diens kan wees nie, is dit beslis redelik om te verwag dat ons almal ons as sy voltydse Getuies beskou, nie waar nie?
2 Daar bestaan nie so iets soos ’n deeltydse Christen nie. Jesus het gesê: “Ek [doen] altyd die dinge . . . wat hom behaag” (Joh. 8:29). Paulus, wat ook so gevoel het, het ons aangespoor om ‘alles tot heerlikheid van God te doen’ (1 Kor. 10:31). Ons almal moet ons dus as voltydse Getuies van Jehovah beskou. Hierdie beskouing sal ons ten goede beïnvloed in alles wat ons nastreef.
3 Beskou die bewyse: Ons voorkoms, spraak en gedrag kan aan ander mense toon dat ons werklik Getuies van Jehovah is. Ons weet hoe belangrik ’n beskeie voorkoms, heilsame spraak en gepaste gedrag is wanneer ons ook al aan die velddiens deelneem of Christelike vergaderinge bywoon. Maar of ons nou skool toe gaan, by ons sekulêre werk is of aan ontspanning deelneem, alles omtrent ons moet daarvan getuig dat ons volgens Jehovah se regverdige standaarde lewe.
4 Jesus het gesê: “’n Stad kan nie weggesteek word wanneer dit op ’n berg geleë is nie. . . . Laat julle lig insgelyks voor die mense skyn, sodat hulle julle voortreflike werke kan sien en heerlikheid kan gee aan julle Vader wat in die hemele is” (Matt. 5:14-16). Dit moet met alles wat ons doen en ten alle tye die geval wees. As ons ooit vind dat ons huiwerig is om ’n getuienis te gee weens die plek waar ons is of dit waarmee ons besig is, moet ons ons afvra: ‘Dien ek Jehovah deeltyds of voltyds?’ Mag dit nooit gebeur dat ons ’n geleentheid moet laat verbygaan om met ander oor die goeie nuus van God se Koninkryk te praat nie.
5 Onthou, ons eer en verheerlik Jehovah wanneer ons met ’n dawerende “Ja!” kan antwoord op die vraag: “Is jy ’n voltydse Getuie?”