Jongmense—Benut julle geleenthede op skool
1 Hoe voel jy daaroor om skool toe te gaan? Wil jy graag by jou skoolopleiding baat vind? Benut jy die geleenthede wat die skool jou bied om jou klasmaats en onderwysers van die waarheid te vertel? Ons is seker dat jy jou bes op skool wil doen.
2 Wees ’n goeie student: As jy goed voorbereid is wanneer jy na jou klasse toe gaan en aandagtig luister, sal jy blywende voordeel daaruit put. Doen jou huiswerk vlytig, maar moenie toelaat dat jou skoolwerk op teokratiese bedrywighede inbreuk maak nie.—Fil. 1:10.
3 Begin elke skooljaar deur die brosjure Jehovah se Getuies en opvoeding te lees. Dan moet jy of jou ouers vir elkeen van jou onderwysers ’n eksemplaar daarvan gee. Laat weet hulle dat enige vrae wat hulle dalk het, beantwoord sal word. Dit sal hulle help om jou beginsels en oortuigings beter te verstaan en met jou saam te werk terwyl jy toepas wat jy geleer is. Dit sal ook jou onderwysers verseker dat jy en jou ouers graag met hulle wil saamwerk terwyl hulle jou help om ’n waardevolle opvoeding te verkry.
4 Wees ’n goeie Getuie: Waarom beskou jy nie die skool as jou persoonlike gebied vir informele getuieniswerk nie? Gedurende die skooljaar het jy unieke geleenthede om te getuig. Wanneer jy die wonderlike geestelike kennis wat jy besit aan ander bekend maak, kan “jy jouself red sowel as dié wat na jou luister” (1 Tim. 4:16). As jy voorbeeldige Christelike gedrag handhaaf en ’n getuienis gee wanneer dit ook al gepas is, sal jy jouself sowel as ander bevoordeel.
5 ’n Jong broer het informeel vir sy skoolmaats getuig. Onder diegene wat gunstig gereageer het, was ’n Katoliek, ’n ateïs wat gewoonlik diegene gespot het wat aan God glo en ’n jeugdige wat ’n kettingroker en ’n strawwe drinker was. Hierdie jong broer het altesaam 15 van sy maats tot toewyding en doop gehelp!
6 Jongmense, lê julle dus daarop toe om te leer en om in julle unieke getuienisgebied te werk. Dan sal julle julle geleenthede op skool ten beste benut.