’n Insiggewende en bemoedigende video!
Dit was April 1951. Duisende Getuies van Jehovah in die voormalige Sowjetunie—hele gesinne—is bymekaargemaak, in goederewaens gelaai en na Siberië verban. Waarom was die magtige Sowjetregering vasbeslote om hulle uit te wis? Hoe het ons broers aan die lewe gebly en selfs gefloreer ondanks dekades van meedoënlose vervolging? Jy sal die antwoorde vind in die video Faithful Under Trials—Jehovah’s Witnesses in the Soviet Union. Kyk gerus daarna en laat die insiggewende boodskap daarvan jou besiel om aan Jehovah getrou te bly, ongeag wat gebeur!
Kan jy hierdie vrae beantwoord? (1) Wanneer is Jehovah se Getuies die eerste keer amptelik in Rusland erken? (2) Hoe het die Sowjetunie, voor en ná die Tweede Wêreldoorlog, uiteindelik baie meer Getuie-gesinne gehad? (3) Hoe was hulle oortuigings regstreeks in stryd met Lenin se filosofie? (4) Wat was “Operation North”, en wat wou Stalin daardeur bereik? (5) Wat het verbanning vir die Getuies beteken, en wat is hulle gesê om te doen om te voorkom dat hulle verban word? (6) Hoe het ons broers en susters mekaar op die lang treinreis na Siberië aangemoedig en hulle bewaarders verras? (7) Watter ellendes het die Getuies in Siberië verduur? (8) Watter geestelike voorsiening is deur Jehovah se volk hoog op prys gestel, en waarom? (9) Waarom was ons broers gewillig om hulle lewe ter wille van hulle lektuur te waag, en hoe het hulle hulle lektuur in die hande gekry ondanks die owerheid se onverbiddelike pogings om te keer dat hulle dit ontvang? (10) Hoe het Chroesjtjef die aanval op God se volk voortgesit? (11) Hoe het die owerheid die geloof van Getuie-kinders probeer vernietig? (12) Watter duidelike begrip het ons broers gehad van die rede waarom hulle vervolg is? (2002 Yearbook, bladsye 203-4). (13) Hoe het die vervolgers se volskaalse aanval op God se organisasie geboemerang? (2002 Yearbook, bladsye 220-1). (14) Watter dinge, wat voorheen vir die Getuies in die voormalige Sowjetunie net ’n droom was, het ’n werklikheid geword? (15) Wat het ons broers gehelp om hulle beproewinge te verduur, en hoe toon die laaste toneel in die video dat die woorde van Jeremia 1:19 waar is? (16) Watter een van hierdie ware ondervindinge van getrouheid tydens beproewing vind jy veral bemoedigend?