“Verlossing is op hande!” streekbyeenkoms- van Jehovah se Getuies vir 2006
1. Hoe het God se knegte in die ou tyd hulle waardering vir ware aanbidding getoon, en watter soortgelyke geleentheid het ons vandag?
1 Koning Hiskia van eertydse Juda het hardlopers gebruik om briewe na die volk te neem wat hulle na Jerusalem ontbied het om daar byeen te kom (2 Kron. 30:6, 13). Die reaksie van die volk het hulle gesindheid teenoor ware aanbidding geopenbaar (2 Kron. 30:10-12). In die komende maande sal hedendaagse knegte van Jehovah ’n soortgelyke geleentheid hê om hulle hartgrondige waardering te toon vir die voorreg om bymekaar te kom om Jehovah te aanbid. ’n Brief is aan julle gemeente gestuur wat julle nooi om die “Verlossing is op hande!”-streekbyeenkoms by te woon. Hoe gaan jy op hierdie uitnodiging reageer?
2. Wat kan ons nou al doen om ten volle by die byeenkoms baat te vind?
2 Tref nou reëlings: Om ten volle baat te vind by die geestelike program wat liefdevol voorberei word, moet ons vir die hele program teenwoordig wees. Verlede jaar was die bywoningsyfer vir Vrydag 101 317. Die bywoningsyfer vir Sondag was 143 687. Dit beteken dat 42 370 nie baat gevind het by Vrydag se geestelike voorsienings nie. Hoe kan hierdie tendens verander word? Dit sal verstandig wees om nou reeds alle nodige reëlings te begin tref sodat jy en jou gesin al drie dae kan bywoon (Spr. 21:5). Sulke voorbereidings sluit dalk in dat jy jou werkgewer om verlof vra, jou planne bespreek met ’n huweliksmaat wat nie ’n Getuie is nie, reëlings vir huisvesting tref en Bybelstudente help om elke dag teenwoordig te wees. As kinders nie op vakansie is nie, moet julle asseblief die skoolhoof oor die byeenkoms inlig en hom in kennis stel dat jou kind Vrydag afwesig sal wees. Moenie hierdie belangrike sake tot op die laaste nippertjie uitstel nie. Maak dit eerder ’n saak van gebed tot Jehovah, en vertrou dat “hy sal optree”.—Ps. 37:5.
3. Waarom moet ons saamwerk met die reëlings wat vir ons huisvesting getref is?
3 Jehovah se organisasie het groot moeite gedoen om seker te maak dat voldoende huisvesting in elke byeenkomsstad beskikbaar is. Waardering vir die selfopofferende pogings van die hardwerkende broers wat met die reëlings gehelp het, bedagsaamheid teenoor ons medebyeenkomsgangers en respek vir teokratiese orde sal ons beweeg om ten volle saam te werk met die riglyne wat in hierdie artikel uiteengesit word.—1 Kor. 13:5; 1 Tess. 5:12, 13; Heb. 13:17.
4. Watter belangrike punte moet ’n mens in gedagte hou wanneer jy huisvesting bespreek, en waarom?
4 Besprekings by ’n hotel/gastehuis/karavaanpark: Dit is belangrik om slegs die huisvesting te bespreek wat jy tydens die byeenkoms gaan gebruik. Om jou bespreking te bevestig, moet jy ’n deposito daarvoor betaal. Besprekings vir huisvesting kan deur die byeenkoms se Huisvestingsafdeling gedoen word.
5, 6. Hoe kan daar na diegene met spesiale behoeftes omgesien word?
5 Spesiale behoeftes: Spreuke 3:27 sê: “Moenie die goeie terughou van dié aan wie dit toekom wanneer dit in die mag van jou hand is om dit te doen nie.” Hoe kan jy aan ander goed doen in verband met die byeenkoms? Bejaarde verkondigers, sieklikes, diegene in die voltydse diens en ander sal dalk praktiese hulp met vervoer of huisvesting nodig hê. Dit is hoofsaaklik hulle familie se verantwoordelikheid om na hulle behoeftes om te sien (1 Tim. 5:4). As hulle dit nie kan doen nie, kan medegelowiges moontlik help (Gal. 6:10). Boekstudieopsieners moet seker maak by diegene in hulle groep wat spesiale behoeftes het, dat hulle reëlings lank voor die byeenkoms in orde is.
6 Kameraansoekvorms is beskikbaar vir verkondigers wat vir huisvesting aansoek moet doen. Die Gemeentelike Dienskomitee moet kyk of die verkondiger hiervoor kwalifiseer deur gebruik te maak van die riglyne op die vorm sowel as in die brief van 15 Julie 2006, wat aan alle liggame van ouer manne gestuur is. Hierdie voorsiening is slegs vir verkondigers wat ’n goeie reputasie het, tesame met hulle goedgemanierde kinders.
7. (a) Waarom moet ons ons toegewese byeenkoms bywoon? (b) Watter stappe moet gevolg word indien omstandighede vereis dat jy ’n ander byeenkoms bywoon?
7 Bywoning van ’n ander byeenkoms: Om seker te maak dat daar genoeg sitplek, lektuur, huisvesting, ensovoorts is, word jy aangemoedig om die byeenkoms by te woon waarheen jou gemeente toegewys is. As omstandighede vereis dat jy ’n ander byeenkoms in die land bywoon, moet jy asseblief jou gemeentelike sekretaris vra vir die posadres van die byeenkoms wat jy gaan bywoon. Maak seker dat jy, saam met jou versoek om huisvesting of enige bykomende inligting, ’n geadresseerde koevert met die nodige posseëls daarop stuur. As meer as een byeenkoms in die stad gehou gaan word, moet jy die datums aandui van die byeenkoms wat jy wil bywoon.
8. Wat is een manier waarop ons tot die vreugde van die komende byeenkoms kan bydra?
8 Vrywilligers: Almal wat die byeenkoms bywoon en by die geestelike voedsel en geleenthede vir opbouende assosiasie baat vind, sal ongetwyfeld baie vreugde daaruit put. Ons sal selfs gelukkiger wees as ons ons vrywillig aanbied om te help met die werk wat gedoen moet word om die byeenkoms ’n sukses te maak (Hand. 20:35). Plaaslike Byeenkomskomitees sal binnekort persone nooi om aan hierdie werk deel te neem. Kan jy jou beskikbaar stel?—Ps. 110:3.
9. Wat waardeer jy omtrent die jaarlikse streekbyeenkoms, en wat moet jy vasbeslote wees om te doen?
9 Terwyl ’n vyfjarige seuntjie ’n streekbyeenkoms bygewoon het, het hy gesê: “Van al die dinge wat ons doen om Jehovah te aanbid, hou ek die meeste van die streekbyeenkoms.” Daardie opregte opmerking help almal van ons om te besef hoeveel ons dit geniet om ons jaarlikse streekbyeenkoms by te woon. Dit is waarlik soos die psalmis gesing het: “’n Dag in u voorhowe is beter as duisend elders” (Ps. 84:10). Dawid het in ’n lied sy begeerte uitgespreek om ‘al die dae van sy lewe in die huis van Jehovah te woon, om Jehovah se tempel met waardering te aanskou’ (Ps. 27:4). Dit het Dawid grootliks verheug om saam met Jehovah se aanbidders te wees. Mag ons sy waardering vir ware aanbidding naboots deur al drie dae van die “Verlossing is op hande!”-streekbyeenkoms by te woon.
[Venster op bladsy 3]
Programtye
Vrydag
9:00 vm. - 4:25 nm.
Saterdag
9:00 vm. - 4:15 nm.
Sondag
9:00 vm. - 3:20 nm.