Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g90 6/8 bl. 10-11
  • Is jy ’n roekelose bestuurder?

Video nie beskikbaar nie.

Jammer, die video kon nie laai nie.

  • Is jy ’n roekelose bestuurder?
  • Ontwaak!—1990
  • Onderhofies
  • Soortgelyke materiaal
  • Die sosiaal wanaangepastes
  • Die emosioneel wanaangepastes
  • Die goed aangepaste bestuurder
  • Vermoeidheid—’n Onsigbare strik vir vragmotorbestuurders
    Ontwaak!—1997
  • Motorongelukke—Is jy veilig?
    Ontwaak!—2002
  • Padwoede—Hoe kan jy dit die hoof bied?
    Ontwaak!—1997
  • Is jy ’n veilige bestuurder?
    Ontwaak!—1995
Sien nog
Ontwaak!—1990
g90 6/8 bl. 10-11

Is jy ’n roekelose bestuurder?

Deur Ontwaak!-medewerker in Japan

“ONS weet watter soort mense waarskynlik ongelukke sal maak”, het Hirojasoe Ohtsoeka, Hoof van Verkeersveiligheid by Japan se Nasionale Instituut van Polisiewetenskap, gesê. “Ons weier nogtans nie om hulle ’n bestuurderslisensie te gee nie, maar ons wil hê dat mense moet besef wat hulle tekortkominge is en werk maak daarvan.”

Roekelose bestuurders beskou hulleself gewoonlik nie as sodanig nie. Maar deskundiges herken ses soorte tekortkominge wat maklik te voorskyn kom wanneer iemand agter die stuurwiel inskuif. Probeer dink hoe jy is terwyl jy elke soort beskou, en kyk hoe veilig jy bestuur.

Die sosiaal wanaangepastes

Onder die hoërisiko-groepe is dié wat nie in die samelewing inpas nie, dié wat sukkel om met ander oor die weg te kom. Hulle is:

Die selfsugtiges Dit is die persoon wat daarop aandring om alles op sy manier te doen. Wanneer hy agter die stuurwiel sit, dink hy dat hy ‘koning van die pad’ is. Hy dink hy kan so vinnig ry as wat hy wil, alle reëls ignoreer wat hy as oorbodig beskou en windmakerig wees wanneer hy wil. Hy vergeet dat hy die pad met al die ander bestuurders moet deel. Aangesien hy eiemagtig optree en kanse waag, veroorsaak hy ongelukke omdat hy nie op die immerveranderende toestande op die pad reageer en hom daarby aanpas nie.

Die ontoegeeflikes ’n Ontoegeeflike bestuurder het min gevoel vir ander mense, en hy verstaan ook nie hoe hulle dink en voel nie. Omdat hy moeilik met mense oor die weg kom, is hy geneig om hulle te vermy. Dit word weerspieël in slegte maniere op die pad en onbeleefdheid teenoor ander bestuurders—albei faktore wat groot gevaar inhou. Dit kan jare duur vir sommige om te leer hoe om teenoor mense op te tree, en dit is een rede vir die hoë ongeluksyfer onder jongmense.

Die aggressiewes Een teken van ’n aggressiewe bestuurder, volgens die boek Bestuursopleiding volgens aanleg, is “die absolute weiering om vir ander pad te gee wanneer die bestuurder dink dat hy reg van voorrang het. Hy sal nie die oortredings van ander bestuurders of voetgangers oorsien nie, en dit loop uit op ’n geskreeu, die onderbreking van ander se handelinge, . . . en ’n getoeter . . . om sy regte tot die bittere einde toe te beskerm.” Selfs denkbeeldige oortredings kan hom kwaad maak. As hy boonop opvlieënd is, sal hy dikwels onverstandig bestuur.

Die emosioneel wanaangepastes

Dan is daar dié met emosionele probleme. Hulle sluit in:

Die onstabieles Die onstabiele persoon word deur emosionele uiterstes gekenmerk. Hy het vlae van opgeruimdheid, opgewondenheid en terneergedruktheid. As hy bestuur terwyl hy terneergedruk is, sal hy nie gevare raaksien nie, en sy reaksies sal te stadig wees om veilig te kan bestuur. As hy bestuur terwyl hy ’n emosionele hoogtepunt ervaar, kan hy roekeloos wees. As hy vermaan word wanneer hy in hierdie bui is, kan dit maklik tot opstandige gedrag lei. Hy beskou moontlik net sy terneergedrukheid as abnormaal.

Die oordrewe senuweeagtiges Dit is dikwels ’n stil soort mens wat in sy gedagtes versonke is, iemand wat hom oor alles bekommer. Wanneer hy bestuur, is sy gedagtes “’n warboel inligting wat niks met bestuur te make het nie”, sodat hy “heel waarskynlik belangrike inligting sal miskyk of dit verkeerd sal vertolk”, het navorsers Richard E. Mayer en John R. Treat in ’n studie oor roekelose bestuurders gesê. ’n Senuweeagtige bestuurder kan heeltemal paniekbevange raak selfs in situasies wat nie kritiek is nie, soos wanneer ’n vragmotor langs hom stilhou. Hy verwag die ergste.

Die impulsiewes Hierdie soort reageer vinnig. Pleks van tyd toe te laat om hom van die feite te vergewis en die regte besluit te neem, is hy geneig om instinktief te handel. Die tyd wat hy op verkeersligte en voetgangers moet wag, voel vir hom baie langer as vir ’n gewone mens. Hy voel dus gefrustreerd en raak gou ongeduldig. Die feit dat hy nie goed dink voordat hy optree nie, maak van hom ’n gevaarlike bestuurder.

Sien jy jouself in enige van hierdie mense? Hoe reageer jy wanneer ’n onbedagsame bestuurder jou geduld op die proef stel? As die skoen jou pas, soos die spreekwoord sê, kan jy dit gerus aantrek. Jy moet ter wille van jou eie veiligheid op die waarskuwing ag slaan, en van die swakhede werk maak. Jy moet in beheer van jou emosies en gesindheid wees om ’n goeie bestuurder te kan wees.

Die goed aangepaste bestuurder

Maar wat maak van iemand ’n goeie bestuurder? Tydens onderhoude met Ontwaak! het vooraanstaande navorsers van Japan se polisie die volgende beklemtoon: bedagsaamheid teenoor ander, dink voor jy doen, die vermoë om die hele situasie te begryp, insig om reg te oordeel, onderskeidingsvermoë, vriendelikheid, selfbeheersing en optrede wat ander padgebruikers beskerm.

’n Verslag van die Universiteit van die Osaka-prefektuur beskryf goeie bestuurders insgelyks as mense “met ’n hoë mate van emosionele stabiliteit; hulle waarnemingsvermoë is vinniger as hulle liggaamsreaksies; hulle oordeel is akkuraat; hulle kan hulle emosies beheer”. Pas hierdie beskrywing jou?

Die Bybel leer mense al duisende jare lank hoe om wysheid, begrip en onderskeidingsvermoë aan die dag te lê (Spreuke 2:1-6, NW). Dit toon hoe onvolmaakte mense “toorn, woede, boosheid, laster [en] skandelike taal” met “liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing” kan vervang. Ja, die Bybel kan jou selfs help om ’n beter bestuurder te wees!—Kolossense 3:8-10; Galasiërs 5:22.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel