Probeer gerus ’n vakansie tuis

JY HET twee weke vakansie, en jy het werklik ’n verandering nodig! Maar jy kan dit net nie bekostig om nou te reis nie. Wat kan jy doen?

Wel, ’n mens moet in gedagte hou dat ’n vakansie ’n blaaskans is van die roetine, ’n tyd van rus of verposing. Probeer dus gerus ’n vakansie tuis. Daar is beslis baie dinge wat daar gedoen kan word. Jy kan skilder of foto’s neem of ander stokperdjies beoefen waarvoor jy selde baie tyd het. Daar is plekke en dinge om te sien en te geniet daar in die omgewing waar jy woon. ’n Vakansie tuis het baie voordele. Om net ’n paar te noem:

▪ Geen paspoort of visums is nodig nie

▪ Nie nodig om geld te wissel nie

▪ Geen probleme met ‘n ander taal nie

▪ Geen ongerief by doeane nie

▪ Geen pakkery nie

▪ Geen duur vliegtuigkaartjies of petrolrekenings nie

▪ Geen kosbare tyd gaan verlore om daar te kom nie

Voel jy nie alreeds beter nie? Jy kan selfs so lank slaap as wat jy wil in jou eie gemaklike bed waaraan jy so gewoond is!

Die belangrikste saak in verband met enige vakansie is die beplanning daarvan. Die verwagting is vir sommige mense in elk geval net so opwindend soos die werklikheid. ’n Vakansie tuis sal ook goeie voorbereiding vereis sodat jy iets doen wat die moeite werd is en wat jy werklik geniet en jou bevredig.

Wat om tuis te doen

Baie mense neem foto’s op vakansie as herinnering aan die geleentheid. Hulle reis duisende kilometers om dinge af te neem wat jy moontlik daar by die huis het. Probeer foto’s neem van ’n madeliefieveld, ’n nabyfoto van ’n perdeblom of van ’n klein diertjie op ‘n takkie. Miskien wou jy nog altyd foto’s gehad het van jou ou skool of van die huis waar jy grootgeword het of van Ouma se liewe ou plaashuis net buite die dorp, maar jy kon nog nooit sover kom om dit te neem nie. Doen dit nou!

En van foto’s gepraat, wat van daardie kartondose familiefoto’s wat jy eendag in albums wil sit? Nou het jy die geleentheid om dit doen. Die hele gesin kan dit geniet om na hierdie herinneringe aan die verlede te kyk. Hoe gaaf sal dit tog wees om, as jy goeie foto’s van familie of vriende vind, ’n paar aan hulle te stuur!

Reisigers versamel dikwels aandenkings. Nou wat kan jy tuis vind? Miskien ’n paar ongewone klippe vir ’n terrarium of net ’n bakkie vol as iets waaroor ’n mens kan gesels. Jy sal verbaas wees hoe kindertjies oor blote klippe in vervoering kan raak! Kan jy aan ander dinge dink? Seeskulpe? Herfsblare? Bossies en plante (selfs onkruid!) om vir versiering te droog?

Wat van daardie familielede of vriende wat jy nog altyd wou nooi om te kom kuier? Nooi hulle vir ’n koppie koffie of tee. Vra ouer persone om ter wille van die jongeres verhale uit hulle jong dae te vertel. Skryf gerus die verhale neer. “Ou Ben” sal moontlik nie meer lank daar wees nie.

Baie stuur poskaarte aan geliefdes en vriende wanneer hulle op vakansie is. Wanneer jy tuis vakansie hou, kan jy iets omtrent daardie bondel briewe in die lessenaarlaai doen. Laat weet jou vriende dat jy hulle nog liefhet en hulle nie vergeet het nie.

Waar om heen te gaan

Waarheen sal jy besoekers neem as hulle na jou stad of dorp kom? Wat is daar vir hulle om te sien? Jy dink aanvanklik dalk dat daar niks interessants is nie, maar dit is dikwels omdat ons ons tuisdorp as vanselfsprekend aanvaar. Stel vas wat daar is. Kyk wat die plaaslike reisagentskap of sakekamer vir toeriste aanbeveel. Dit sal jou moontlik aangenaam verras om te sien wat beskikbaar is.

Is daar ’n museum daar naby? Of ’n fabriek wat toere aanbied? Sommige lekkergoed- of sjokoladefabrieke bied nie net toere aan nie maar laat jou proe ook! Besoek dus ’n paar wynkelders. ’n Plaaslike boer is dalk gewillig om vir jou kinders die diere te wys—hoe om hoendereiers uit te haal of selfs hoe om ’n koei te melk. Dit sal goed wees as hulle leer dat melk nie uit ’n bottel of ’n kartonnetjie kom nie.

Julle kan Ma die moeite spaar om te kook deur etniese restaurante te besoek. Met hulle spesiale kos—Chinees, Japannees, Italiaans, Grieks—en hulle dekor, en miskien musiek, kan jy jou maklik verbeel dat jy in ’n vreemde land eet.

Maar sê nou daar is nie sulke restaurante in julle dorp nie? Dan kan jy gerus die ondervinding tuis skep. By die biblioteek kan jy inligting kry oor hoe mense aantrek en eet. Verbeel jou byvoorbeeld dat jy in Indië is. ’n Kookboek met resepte vir Indiese kerriegeregte sal jou help om met ’n maaltyd te begin wat nie te moeilik is om voor te berei nie. Jy kan die aand selfs soos hulle aantrek.

‘A’, sê jy, ‘maar kampeerliefhebbers in die gesin sal dit nie as ’n vakansie beskou mits hulle gaan kampeer nie.’ Kan jy hierdie jaar met jou tent in die agterplaas klaarkom? Jy sal dit moontlik geniet om aan ’n paar rustige staptogte op die nabygeleë platteland deel te neem en om veldblomme te pluk en ’n paar diere en voëls dop te hou terwyl jy daar is.

Aangesien vakansietyd gewoonlik ’n goeie tyd is om gesinsbande te versterk en dinge saam te doen, sal dit miskien beter wees om dit tuis in ’n bekende omgewing te doen. Probeer dit gerus.

Verkwikking omdat agterstallige werk ingehaal is

Dan is daar al daardie werkies by die huis waarvoor jy blykbaar nooit tyd het nie. Maar sal daardie fisiese werk waarlik verkwikkend wees? Wel, sal jy nie na jou vakansie verlig voel om weer jou gewone roetine te begin, tevrede dat daardie lekplek in die dak eindelik reggemaak is, dat al die laaie se handvatsels aan is en dat daardie skreeuende skarniere eens en vir altyd stilgemaak is nie? Jy sal moontlik nie méér energie gebruik om daardie noodsaaklike werk te doen as wat jy sal gebruik om speletjies te speel, te swem of te stap nie.

En wie wou nie al soms meer tyd gehad het om te lees en te studeer nie? Dit sal nie vervelig wees nie. Jy kan enige onderwerp waarin jy belangstel, navors. Haal ’n bundel van Die Wagtoring of Ontwaak! van jou biblioteekrak af. Moenie verbaas wees as jou aandag afgelei word en jy ander genotvolle artikels lees nie. Skielik is dit tyd vir middag- of aandete. Jy sal nie glo hoe die tyd gevlieg het nie. Maar ontspan! Onthou, jy is op vakansie.

Die vreugde om ’n vakansie tuis te skep

Wees vindingryk, gebruik jou verbeelding, en wanneer hierdie vakansie om is, sal jy miskien besef: ‘Ek het dit werklik geniet! Ek moet dit weer doen!’

Hoe lyk dit nou? Miskien moet jy die gesin bymekaar kry en ’n vakansie tuis beplan. Vra hulle voorstelle. As jy op jou eie woon, kan jy gerus ’n goeie vriend vra om dit saam met jou te beplan. Probeer dan gerus ’n vakansie tuis. Dit sal jou moontlik net so goed doen as ’n vakansie elders om jou daardie verlangde verposing in jou besige lewe te gee.

[Prente op bladsy 23]

Wandelinge in die veld, ’n besoek aan ’n plaas of ’n museum of selfs gemaklike leesstof kan deel uitmaak van vakansies tuis