Gryp geleenthede aan om gedurende die somer te getuig
1 Die Skrif spoor ons aan: “Of julle dan eet of drink of enigiets doen, doen alles tot verheerliking van God” (1 Kor. 10:31). Die somer bied geleenthede om dit op ’n aantal maniere te doen.
2 Baie sal aan die einde van die jaar vakansie hou. Maar ongeag die seisoen moet geeneen van ons ons predikings- en onderrigtingswerk nalaat nie. Gevolglik moet ons gretig wees om vir ander te getuig terwyl ons met vakansie is, as ons ’n byeenkoms bywoon of gedurende die skoolvakansie. Hoe kan ons dit doen?
TERWYL ONS MET VAKANSIE IS
3 Beplan jy om familielede te besoek terwyl jy met vakansie is? Die meeste van ons geniet dit om familiebande te hernieu. As jou familielede nie in die waarheid is nie, kan jy die Koninkryksboodskap aan hulle bekend maak. Baie broers het welslae behaal deur geduldig tot op die regte oomblik te wag om vir hul familielede te getuig. Party van hul familielede het op hierdie manier die waarheid geleer.—Sien Die Wagtoring van 15 Februarie 1990, bladsye 25-7.
4 As jy van plan is om weg van die huis af vakansie te hou, kan jy gerus reëlings tref om saam met die plaaslike gemeente vergaderinge by te woon en velddiens te doen. Ons ‘het die broederskap lief’, en as ons saam met hulle aan velddiens deelneem, gee dit ons ’n geleentheid om voordeel uit hulle ondervinding in die waarheid te trek terwyl ons hulle beter leer ken (1 Pet. 2:17). As ons vergaderinge bywoon en aan die predikingswerk deelneem terwyl ons met vakansie is, kan dit tot ons voordeel wees, en ons geniet ware verkwikking saam met ons broers.—Matt. 11:28, 29, NW.
WANNEER ONS DIE BYEENKOMS BYWOON
5 Getuig vir ander wanneer jy die streekbyeenkoms bywoon. As ons ons lapelkaarte dra, kan dit ander nuuskierig maak en die geleentheid skep om met hulle oor die waarheid te praat. Wees op die uitkyk na geleenthede om te getuig wanneer jy vir brandstof stilhou, by ’n restaurant eet of met openbare vervoer reis. Informele gesprekke in hierdie omstandighede lewer dikwels goeie resultate. Hou dus jou Bybel en gepaste lektuur byderhand, en wees voorbereid om ’n getuienis te gee.
GROTER BEDRYWIGHEID AS ’N GESIN
6 Aangesien baie van ons nie gedurende die vakansietyd skool of werk toe sal gaan nie, kan ons gerus meer tyd aan velddiens bestee deur hulppionierdiens te doen. Jy kan jou veldbediening verbeter en jou liefde “verruim” deur saam met ander te werk. Waarom werk jy nie met soveel moontlik in die gemeente nie? (2 Kor. 6:11-13). Hele gesinne het al die somermaande gebruik om saam hulppionierdiens te doen. Dit het hul geloof versterk en hul nader aan Jehovah en aan mekaar as ’n gesin gebring. Dit moedig ook die gemeente aan, en ander kan as gevolg hiervan tot groter bedrywigheid aangespoor word.
7 Die somer is gewoonlik vol bedrywigheid. Omdat so baie dinge ons tyd in beslag kan neem, moet ons ons daarop toelê om ’n goeie roetine te behou sodat ons ons tyd ten beste kan benut. As geestelike dinge nou ons prioriteit is, sal ons ‘ons lig laat skyn voor die mense’. Wanneer hulle ons goeie werke sien, kan sommige beweeg word om Jehovah te verheerlik, en dit omdat ons elke geleentheid aangegryp het om die waarheid gedurende die somer aan ander te verkondig.—Matt. 5:16.