Geniet jou vakansie sonder om spyt te wees!
TOE ’n Amerikaanse vrou wat nou in Europa woon, gevra is hoe sy haar besoek aan ’n welbekende vakansieplek geniet het, het sy geantwoord: “Dit moes pragtig gewees het voor die mense gekom het.” Het jy al ooit so gevoel? Hotelle en diskoteke wat langs mekaar ingeryg staan, ’n besoedelde, oorvol strand en blêrende radio’s is nie almal se idee van ’n aangename vakansieplek nie.
Ongelukkig voldoen vakansies nie altyd aan ons verwagtinge nie. In plaas van ons ’n tweede asem te gee, laat dit ons na ons asem snak; in plaas van ons te help om weer op die been te kom, laat dit ons somtyds in die bed beland. Die vraag is dus gepas: Hoe kan ons vakansies geniet sonder om spyt te wees?
Wees gebalanseerd
Net soos speserye in ons kos, het vakansies die beste resultate wanneer dit spaarsaam gebruik word. Hoewel die lewe van die spreekwoordelike stralerjakker miskien aanloklik lyk, is dit ongebalanseerd en verskaf dit nie ware geluk nie.
Veral wat vakansie betref, is balans in die uitgee van geld noodsaaklik. Beplan noukeurig voordat jy gaan, en probeer binne jou begroting bly. Moenie jou deur die spesiale aanbiedinge van reisagente laat verlok wat jou aanspoor om ‘nou te geniet en later te betaal’ nie.
Moet ook nie so behep raak met moontlike gevare dat dit die spontane en sorgelose gees demp wat vakansie so aanloklik maak nie. Daarbenewens sluit behoorlike balans in dat ons bewus moet wees van die grootste gevaar wat kan veroorsaak dat ons met spyt op ons vakansie terugkyk. Dit het niks te doen met ongelukke, siekte of misdaad nie, maar eerder met persoonlike verhoudinge.
Handhaaf goeie verhoudinge
Vakansies saam met familie of vriende kan bande van liefde versterk. Daarteenoor kan vakansies breuke in ’n verhouding veroorsaak wat dalk moeilik is om later te heel. Joernalis Lance Morrow het gesê: “Die wesenlike gevaar van die vakansie lê in die vermoë daarvan om alle familiegeskille in ’n besonder intense drama saam te bind. . . . In hulle gewone werklewe het mense ’n betrekking, rolle, vriende en ’n roetine wat emosies versprei en absorbeer. In die teater van ’n vakansiehuis sal familiegeskille wat al 20 jaar begrawe is heel moontlik soos krewe begin opduik.”
Voordat jy dus met vakansie gaan, moet jy vasbeslote wees om dit ’n aangename ondervinding te maak. Onthou dat almal nie in dieselfde dinge belangstel nie. Kinders is dalk lus vir avontuur, ouers wil heel moontlik ontspan. Wees bereid om afstand te doen van persoonlike voorkeure met betrekking tot wat om te doen en waar om te gaan. As dit raadsaam en prakties is, kan jy instem dat elkeen van tyd tot tyd iets doen waarin hy veral belangstel. Leer om die vrugte van God se gees elke dag dwarsdeur die jaar toe te pas, en dit behoort nie te moeilik te wees om tydens jou vakansie daarmee voort te gaan nie.—Galasiërs 5:22, 23.
Hoewel dit belangrik is om ’n goeie verhouding met familie en vriende te behou, is ons verhouding met God selfs belangriker. Tydens vakansie ontmoet ons dikwels mense wat nie ons Christelike beskouing van God en sy vereistes huldig nie. As ons noue omgang met hulle het—dalk selfs dikwels plekke besoek waar twyfelagtige vermaak aangebied word—kan dit betreurenswaardige gevolge hê. Onthou dat die Bybel waarsku: “Moenie mislei word nie. Slegte omgang bederf nuttige gewoontes.”—1 Korintiërs 15:33.
As jy, terwyl jy met vakansie is, ooit agterkom dat jy ’n begeerte het om Christelike standaarde en gewoontes agterweë te laat, moet jy so ’n swakheid wyslik onder die oë sien en Goddelike hulp vra om teen daardie begeerte te stry!
Wat word bevorder?
Mense wat hulle lewe nie volgens Christelike beginsels vorm nie, meen moontlik dat ’n mens gedurende jou vakansie kan doen net wat jy wil. In party Europese lande is sekstoerisme ’n winsgewende bedryf, en sommige reisagentskappe bevorder dit selfs. The European skryf dat ‘die aanstootlike dinge wat Europese mans in sekere Asiatiese vakansiestede doen lankal reeds algemeen bekend is’. Die Duitse tydskrif Der Spiegel het na een Asiatiese land verwys en geraam dat tot 70 persent van alle manlike besoekers “sekstoeriste” is.
Vroulike toeriste volg nou in die voetspore van hulle manlike eweknieë. ’n Duitse lugredery wat in vlugte na die Karibiese eilande spesialiseer, skat dat 30 persent van sy vroulike passasiers daar gaan vakansie hou met ongeoorloofde seks as hulle uitsluitlike oogmerk. The European het ’n Duitse joernalis soos volg aangehaal: “Hulle beskou dit as ’n maklike en eenvoudige manier om pret te hê—’n eksotiese spel.”
Maar vir ware Christene is ongeoorloofde seks nie ’n aanvaarbare manier om pret te hê nie. Dit skend Christelike beginsels en hou baie gevare in. Hoewel die gevare oor die algemeen erken word, probeer baie mense eenvoudig om eerder die gevolge te vermy as om die gewoonte te verwerp. Kenmerkend is ’n advertensie in Duitse koerante wat ’n sambreel en twee leë strandstoele vertoon. Die byskrif sê: “Reis veilig en keer terug sonder vigs.”
’n Afstootlike neweproduk van sekstoerisme is die seksuele molestering van kinders. Dit is noemenswaardig dat die Duitse regering in 1993 ’n wet aangeneem het waarvolgens Duitsers strafbaar is indien hulle skuldig bevind word aan geslagsomgang met minderjariges—selfs terwyl hulle in die buiteland met vakansie is. Maar tot dusver was daar nie veel positiewe resultate nie. Kinderprostitusie was—en is nog steeds—’n etterende sweer op die aangesig van die mensegemeenskap.
Maak jou vakansie ’n lonende tyd
Lees, Bybelstudie en ’n aandeel aan die Christelike bediening is aangename, lonende bedrywighede vir ware Christene. Maar baie vind dit moeilik om genoeg tyd te kry om hierdie dinge te doen in die mate wat hulle graag wil. Wanneer jy dus met vakansie is, weg van die streng beperkinge wat die horlosie oplê, is dit mos ’n goeie tyd om in te haal.
Dit spreek vanself dat ’n besige, bevredigende vakansie jou moontlik nie in staat sal stel om Christelike belange na te streef in dieselfde mate as wat jy gewoonlik doen nie. Maar sit gerus ten minste ’n bietjie tyd opsy vir opbouende geestelike bedrywighede. Daar sal nog steeds tyd oor wees vir ontspanning. Trouens, party gebruik selfs die ekstra tyd wat hulle gedurende hulle vakansie beskikbaar het om meer in die bediening te doen. Soos Jesus gesê het: “Gelukkig is dié wat bewus is van hulle geestelike behoefte.”—Matteus 5:3.
Miskien gaan jy ook binnekort met vakansie. Indien wel, moet jy dit geniet! Moenie jou te veel oor moontlike gevare bekommer nie, maar tref gerus behoorlike voorsorg. Hou voorstelle soos dié in die venster op hierdie bladsy in gedagte. Wanneer jy terugkeer, moet jy verkwik en uitgerus voel en gretig wees om voort te gaan met die lewensbedrywighede wat van die grootste belang is. Alte gou is die vakansie verby, maar party van die mooi herinneringe daarvan kan jou vir altyd bybly. Hoe kosbaar is dit tog—vakansies wat geniet word sonder om spyt te wees!
[Venster op bladsy 10]
’n Paar vakansiewenke
Bekamp misdaad
1. Reël dat iemand na dinge tuis omsien.
2. Moenie plekke besoek wat oor die algemeen as gevaarlik beskou word nie.
3. Wees op jou hoede vir sakkerollers, hou geld op ’n veilige plek by jou en bewaar ekstra geld op ’n veilige plek waar jy bly.
4. Wees versigtig vir vreemdelinge wat hulp ongevraag aanbied.
Vermy ongelukke
1. Wees wakker en hou gereeld stil as jy bestuur.
2. Wanneer jy in hotelle tuisgaan of vlieg, moet jy sorgvuldig let op watter voorsienings daar vir gevalle van nood is.
3. Gee jou liggaam ná jou aankoms kans om aan te pas voordat jy veeleisende aktiwiteite aanpak.
4. Sorg dat jy gepaste klere, skoene en toerusting vir jou aktiwiteite het.
Bly gesond
1. Raadpleeg jou dokter om vas te stel of inenting of geneesmiddels dalk nodig sal wees.
2. Neem ’n medisynetassie met die nodige geneesmiddels saam.
3. Kry genoeg rus en let op wat jy eet en drink.
4. Dra ten alle tye die nodige dokumente oor jou gesondheidsbehoeftes of -wense by jou.
Handhaaf gelukkige verhoudinge
1. Betoon liefde en bedagsaamheid aan diegene saam met jou.
2. Hou standaarde vir persoonlike omgang hoog.
3. Moenie toelaat dat ander vakansiegangers jou oorhaal om dinge te doen wat jy meen twyfelagtig is nie.
4. Sit ’n bietjie tyd opsy om geestelike behoeftes te bevredig.
[Prente op bladsy 9]
Neem aan heilsame bedrywighede deel terwyl jy met vakansie is