Voorsorge en gevare
Die mens se immuniteitstelsel Miljoene kieme val ons elke oomblik aan, en hulle is vasbeslote om ons lekker warm en vogtige liggame binne te dring. As hulle dit sou regkry, wag daar ’n skok op hulle. Hulle kom te staan voor ’n ongelooflik ingewikkelde immuniteitstelsel—miljoene der miljoene hoogs gespesialiseerde selle wat deur tientalle proteïene gekontroleer word. Die tydskrif Time sê: “Die immuniteitstelsel vergelyk goed met die ingewikkeldste orgaan van almal, die brein.” Daarna haal dit die immunoloog William Paul aan: “Die immuniteitstelsel het ’n merkwaardige vermoë om inligting te hanteer, om te leer en te onthou, om inligting te skep, op te berg en te gebruik.” Dr. Stephen Sherwin prys dit ook soos volg: “Dit is ’n ongelooflike stelsel. Dit eien molekules wat nog nooit tevore in die liggaam was nie. Dit kan onderskei tussen wat daar hoort en wat nie daar hoort nie.” En as dit nie daar hoort nie, is daar oorlog, volskaalse oorlog.
Koolhidrate vir peuselhappies Etes wat bestaan uit koolhidraatryke kosse het dalk, ondanks ’n hoë glukosevlak in ’n mens se bloed, lomerigheid en moegheid agterna tot gevolg. Studies het getoon dat konsentrasie en toetsuitslae laer is na koolhidraatryke kosse geëet is. Baie mense wat hulle ooreet, hou nie net meer van koolhidrate as van ander snoeperye omdat hulle ’n drang na soetgoed het nie, maar ook omdat hulle van brood en pasta hou. Mense wat ophou rook, het ’n drang na koolhidrate, en een rede waarom hulle gewig aansit wanneer hulle ophou, is omdat hulle meer soet, koolhidraatryke kosse eet.
Die gevaar om oorgewig te wees Wanneer middeljarige en jonger vroue in enige mate oorgewig is, verhoog dit die gevaar van hartsiekte. Dit is volgens ’n agtjaarstudie onder 116 000 verpleegsters van 30 tot 55. Sewentig persent van die hartsiekte onder gesette vroue, en 40 persent van die hartsiekte onder vroue oor die algemeen is te wyte aan oorgewig. Die nuusberig hieroor in The New York Times het verder gesê: “Vorige studies onder mans het getoon dat dit die kanse op hartsiekte verhoog as hulle taamlik oorgewig is. Maar dit is die eerste keer dat die gevare vir middeljarige vroue om selfs effens oorgewig te wees, gestaaf is, het dr. Charles H. Hennekens, ’n epidemioloog aan Brigham and Women’s Hospital in Boston en ’n medenavorser van die studie, gesê. Hy het gesê die uitslag toon dat ‘swaarlywigheid, saam met sigaretrokery en oormatige alkoholmisbruik, as die hoofoorsake van oorbodige siektes en sterftes in die Verenigde State gereken kan word’.”
Babasterftes gekoppel aan rook Na ’n driejaarstudie het twee dokters in Swede ’n sterk skakel ontdek tussen rook en die sindroom van skielike sterftes by suigelinge, bekend as SSSS—’n term wat dui op sterftes aan ’n onbekende oorsaak by babas vanaf die ouderdomme van een tot ses maande. Drr. Bengt Haglund en Sven Cnattingius het inligting oor 280 000 lewende geboortes in Swede versamel. Onder hierdie groep het 190 aan SSSS gesterf, en die dokters het gesê dat 50 van die sterftes te wyte is aan die feit dat die moeders gerook het. Moeders wat matig gedurende swangerskap gerook het—een tot nege sigarette per dag—se kanse om hulle babas weens SSSS te verloor was twee keer groter as dié van moeders wat nie gerook het nie. Strawwe rokers—tien of meer sigarette per dag—se kanse was drie keer groter. Dr. Haglund het gesê: “Uit ’n voorkomende oogpunt is rokery die grootste enkele oorsaak van SSSS.” Maar hy het wel gesê dat ander sosiaal-ekonomiese faktore daarby betrokke kan wees: ouderdom van die moeder, sosiale status en of die vader by die moeder en kind woon. Die berig in The New York Times het ten slotte gesê: “Die studie het getoon dat die voorkoms van SSSS laer in Skandinawiese lande is as in ander nywerheidslande soos die Verenigde State.”