Vreemde vlieënde voorwerpe—Wat is dit?

Betty Cash en Vickie Landrum, en haar seun Colby, het beweer dat hulle op 29 Desember 1980 aan die hitte, rook en vlamme van ’n VVV (vreemde vlieënde voorwerp) blootgestel is. ’n Verslag het gesê dat hulle dit beskryf het as ’n ‘groot, diamantvormige voorwerp, wat op ’n verlate plaaspad naby Huffman, noordoos van Houston, Texas, voor hulle motor in die lug gesweef het’. Hulle het beweer dat hulle, as gevolg van hierdie ondervinding, aan verskeie kwale gely het.—Miami Herald, 4 September 1985.

Die vroue het gemeen dat die Amerikaanse regering daarby betrokke was omdat “die voorwerp kort daarna noordwaarts weggevlieg het, saam met wat na ongeveer 23 militêre helikopters gelyk het”. Een van die vroue, Vickie Landrum, het in hierdie verslag gesê dat “al drie probleme gehad het met blase, haarverlies, duiseligheid en hoofpyne. Landrum glo dat die toestel die een of ander soort radioaktiwiteit afgegee het wat die drie ook sensitief vir sonlig gemaak het.” Hulle het die regering vir nalatigheid gedagvaar.

Vanweë die berig hierbo en ander nuusberigte is VVV’s herhaaldelik onder die publiek se aandag gebring. Soos Philip J. Klass in UFOs—The Public Deceived geskryf het: “Die vooruitsig om intelligente lewe iewers anders te vind is oor die algemeen aanloklik, en talle bekwame wetenskaplikes het hulle aandag en inspanning aan die soektog gewy.” ‘Maar waarom nou?’ het Edward Dolnik in The New Republic van Augustus 1987 onder die opskrif “Regstreekse kontak” gevra. Sy antwoord was: “Die vernaamste verduideliking vandag het te doen met diepgewortelde en apokaliptiese vrese wat met die nadering van die millennium verband hou”, dit wil sê, noudat ons die jaar 2000 nader.

Glo mense aan VVV’s?

Glo jy aan VVV’s? Het jy al ooit iets aan die naghemel gesien wat jou dronkgeslaan het? Of hulle hul nou deur apokaliptiese vrese of deur ander ondervindinge laat oorreed, baie glo vandag aan VVV’s. In sy verslag het Dolnik gemeld dat ’n Gallup-opname getoon het dat “57 persent van Amerikaners wat universiteitsopleiding ontvang het aan buiteaardse wesens glo”. Hy sê voorts: “Vir Amerikaners sonder universiteitsopleiding daal die syfer tot 46 persent.”

In die verlede het berigte oor VVV’s gewoonlik vreemde en ongewone gesigte aan die hemel of op kort afstand beskryf. Maar deesdae het hulle blykbaar te doen met werklike kontak met mense. Daar word soms gesê dat hierdie kontak plaasvind met “vreemde wesens” wat na bewering mense ontvoer. Die verslae toon dat die “vreemde wesens” se oogmerke soms biologiese of selfs genetiese eksperimentering met mense insluit. Hierdie bewerings het die publiek se aandag weer eens op die onderwerp van VVV’s gevestig.

Hierdie beweerde gevalle van waarneming en kontak vind in alle wêrelddele plaas. Een voorbeeld is dié van ’n man in Switserland. Na wat vertel word, het hy oor ’n tydperk van vyf jaar “honderde helder, gedetailleerde foto’s geneem. Hy het ook die geluide van ‘straalskepe’ opgeneem, etlike metaalmonsters versamel en rolprente gemaak van die skip terwyl dit vlieg.” Die beskrywing lui voorts: “Tientalle getuies het die straalskepe gesien en [die man se] fantastiese verhaal bevestig. Sy getuienis, wat deur ’n professionele veiligheidspan onder leiding van ’n afgetrede kolonel in die Amerikaanse lugmag ondersoek is, is deur wetenskaplikes by IBM, NASA se straalaandrywingslaboratorium, by die Arizona-staatsuniversiteit en die lugvaartmaatskappy McDonnell Douglas nagegaan.”

’n Mens hoor nog steeds van sulke gevalle. Een van die interessantstes het in The Tampa Tribune van 30 Januarie 1989 verskyn. Dit het ’n kleurillustrasie van ’n “ruimtetuig” bevat wat in die omgewing van Gulf Breeze, Florida, afgeneem is. Die verslag het oor ’n man genaamd Ed se ondervindinge gehandel. Die beskrywing van die eerste kontak lui so: “Toe hy by die glasdeure van sy slaapkamer uitgekyk het, sê Ed, was hy van aangesig tot aangesig met ’n kinderlike wese wat in grys geklee was.” Hierdie oënskynlike kontak het herhaaldelik en oor ’n tydperk plaasgevind, en Ed het baie foto’s geneem. Maar nie een van die foto’s het in die koerant verskyn nie.

Weens die sensasionele berigte van kere wat kontak gemaak is wat in koerante, tydskrifte en suksesboeke verskyn, vra mense: Waaroor gaan dit? Bestaan VVV’s werklik of net in die verbeelding van mense? Is daar so iets in die geskiedverslae opgeteken? Is dit moontlik dat daar verduidelikings is wat verder strek as die hedendaagse wetenskap? Hierdie en ander vrae sal in die volgende artikels bespreek word.