Die Bybelse beskouing

VVV’S—Boodskappers van God af?

NAMATE die 20ste eeu ten einde loop en toestande op aarde gaandeweg versleg, begin al hoe meer mense glo aan vreemde vlieënde voorwerpe (VVV’s) en hulle passasiers, buiteaardse wesens. Is VVV’s blote verdigsels, ’n bedrogspul, ’n klug waaragter mense sit wat graag oor die publiek se liggelowigheid lag?

Diegene wat beweer dat hulle VVV’s of hulle buiteaardse passasiers gesien het, sluit oënskynlik normale, betroubare mense in; trouens, diegene wat aan hierdie besoekers van ander planete glo, sluit geleerde professors en wetenskaplikes in. Hulle is daarvan oortuig dat buiteaardse wesens mense dophou en somtyds met hulle kommunikeer. So genoemde steungroepe vir buiteaardse wesens is gestig om mense by te staan wat beweer dat hulle al met besoekers uit die buitenste ruimte in aanraking was.a

Buiteaardse oorlewingsplan

In Aliens Among Us voer Ruth Montgomery onderhoude met ’n paar van die toenemende aantal mense wat daarvan oortuig is dat hulle buiteaardse besoekers is wat in menseliggame woon. Party van dié wat beweer dat hulle vermenslikte buiteaardse wesens is, voorspel dat daar in die jaar 2000 “’n kosmiese gebeurtenis [gaan plaasvind] waarvoor engelemagte en gesaghebbers hulle voorberei het”. Party mense glo dat buiteaardse wesens VVV’s gebruik om eksemplare van plante en diere in te samel en te bewaar of dat VVV’s as reddingstuie gebruik sal word om miljoene mense weg te neem van die naderende verwoesting van die aarde. Ná die groot vernietiging sal mense teruggebring word om “die Nuwe Era en die Nuwe Orde” van geestelike bewustheid te begin. ’n Jong man van Colorado, VSA, ’n lid van ’n groep wat hulleself “Buiteaardse-jeug” noem, het in alle erns aan Ontwaak! gesê: “Ek en my vriende wag vir ons buiteaardse voorouers om ons te kom haal.”

’n Paar van diegene wat sê dat hulle buiteaardse wesens is, beweer dat hulle deur God gelei word, en ander beweer dat hulle vryelik met hom praat om raad te vra oor hoe hulle die mensdom kan help. Gebruik God besoekers van ander planete om die mensdom van ’n komende wêreldramp te red?

God se kommunikasie met die mensdom

Vroeg in die mens se geskiedenis het God met mense gekommunikeer. Die Bybelverslag beskryf God se gesprekke met Adam en Eva, Noag, Abraham en ander (Genesis 3:8-10; 6:13; 15:1).b Drome, stemme en visioene is gebruik om God se wil oor te dra en om die Bybel voort te bring. Maar was daar ná die voltooiing van die Bybel ’n behoefte aan regstreekse kommunikasie uit die hemel met die mensdom? Nee, aangesien die Bybel sê dat die Heilige Skrif ‘die mens van God volkome bevoeg maak, ten volle toegerus vir elke goeie werk’ (2 Timoteus 3:17). Volgens die Bybel moet leiding vir hierdie moeilike tye uit die geskrewe Woord van God kom. Is daar nietemin enige rede om te glo dat ons kommunikasie of spesiale voorskrifte regstreeks van God deur middel van ’n buiteaardse woordvoerder sal ontvang? Nee, want die apostel Paulus het gesê: “Selfs al sou ons of ’n engel uit die hemel aan julle iets as goeie nuus bekend maak benewens dit wat ons aan julle as goeie nuus bekend gemaak het, laat hom vervloek wees.”—Galasiërs 1:8.

Hoewel dit lyk asof die bewerings van vermeende buiteaardse wesens ooreenstem met Bybelprofesieë dat die aarde binnekort groot, rampspoedige veranderinge sal ondergaan, bied hulle ’n oorlewingsmetode wat op skepsele staatmaak. Die Bybel spoor mense nie aan om na die veronderstelde veiligheid van buiteaardse ruimtetuie of enige ander plek te vlug nie. Dit sê eerder dat ons beskerming in ’n toegewyde verhouding met God moet vind, ’n toewyding wat deur waterdoop gesimboliseer word. (1 Petrus 3:21; vergelyk Psalm 91:7; Matteus 28:19, 20; Johannes 17:3.) En Jesus het gesê: “Wie tot die einde toe volhard het, hy sal gered word.”—Matteus 24:13.

Beklemtoon hierdie tekste nie dat ons eerder ’n geestelike verhouding met God as ’n fisiese toevlugsplek nodig het vir oorlewing nie? In plaas van die mensdom te help om behoue te bly, lei verhale van ‘nie-menslike wesens’ dus mense se aandag af van wat God eintlik van hulle vereis vir hulle ewige welsyn.

Wie sal die mensdom probeer weglei van God se middel tot oorlewing en nogtans voorgee dat hy God verteenwoordig? Ed Conroy sê in sy boek Report on Communion dat “ernstige VVV-kundiges [diegene wat VVV’s bestudeer] met opleiding in sielkunde en die sosiale wetenskappe” vergelykende studies van “‘slaapkamerbesoekers’, spoke, poltergeeste, verskynings, godsdiensvisioene en dit wat as demone beskou word” in hulle navorsing insluit. Baie VVV-kundiges en diegene wat beweer dat hulle buiteaardse wesens in die gedaante van ’n mens is, sê dat dit meestal onnodig is om ruimteskepe te gebruik om te reis. Hulle meen dat hierdie wesens op onsigbare wyse kan reis en op enige plek op aarde kan verstoflik sonder om in ruimtetuie daar aan te kom.

Die Bybel waarsku ons dat Satan en sy demone daarop uit is om die mensdom te mislei. Hulle buit die mensdom se wanhoop en radeloosheid uit om aantreklike, maar valse, oplossings te bied (2 Korintiërs 11:14). Daarom waarsku die Bybel dat “party in latere tydperke van die geloof sal wegval en aandag sal skenk aan misleidende geïnspireerde uitinge en leringe van demone”.—1 Timoteus 4:1.

Vandag moet enige vermeende besoeke en oënskynlik voordelige leiding van sulke wesens eweneens verwerp word, ongeag die vorm wat hulle aanneem. Diegene wat eerder die raad van “buiteaardse wesens” as God se Woord wil volg, sal ongetwyfeld mislei word—’n baie groot fout om in hierdie kritieke tye te begaan.

[Voetnote]