“Jehovah se Getuies van die USSR—rooskleuriger dae in die vooruitsig”
SO HET die opskrif van die Engelstalige koerant The Warsaw Voice van 19 Augustus 1990, wat in Pole uitgegee word, gelui. Die skryfster, Anna Dubrawska, het kommentaar gelewer op die “Suiwer Taal”-Streekbyeenkoms van Jehovah se Getuies wat in Augustus 1990 in Warschau gehou is. Sy het onderhoude gevoer met Getuies van die Sowjetunie, waarvan sommige weens hulle godsdiensoortuigings 15 jaar in tronke en werkkampe deurgebring het. Maar nou het hulle die gunstige veranderinge beklemtoon wat in hulle land plaasvind.
Grigor Goryachek, ’n konstruksiewerker uit die Krim wat as ’n Getuie opgegroei het, was 15 jaar ’n balling in Siberië. Hy het gesê: “Ons verwag nou beter tye.” ’n Ander Getuie, Anton Pohanich, het gesê: “Beter tye het reeds aangebreek. Ek kan nou vryelik met ons boodskap van huis tot huis gaan, iets wat in die verlede onmoontlik was.”
Dubrawska haal Igor Cherny, ’n 17-jarige Getuie van die Kaukasus aan: “Die mense, veral die jongmense, is 70 jaar lank so intensief van God weggelei dat hulle nou net so intensief na Hom wil terugkeer, of dan minstens van Hom wil hoor.”
Die Poolse publikasie Dziennik Wieczorny (Aandblad) het onder die opskrif Radość braci (Vreugde van die broers) berig dat ’n werknemer van die Zawisza-stadion in die stad Bydgoszcz gesê het: “Ek is beïndruk deur die skoon taal en die goeie maniere wat deur die jongmense aan die dag gelê is.”
In ’n artikel in die Poolse dagblad Trybuna met die opskrif Glosiciele Królestwa (Koninkryksverkondigers) het Zofia Uszynska van die byeenkoms gesê: “In slegs 30 minute is ek tien keer versnaperinge en koffie aangebied. Vyf keer het iemand my sy sitplek aangebied. Gedurende vier opeenvolgende dae het meer as 30 000 mense by die Dziesieciolecia-stadion in Warschau aan ’n [godsdienstige] fees deelgeneem. Daar was vrouens wat reeds ver swanger was, gesinne met klein kindertjies, volwassenes en jeugdiges. Die jongste dopeling was 11 jaar oud, die oudste amper 80.”
Die artikel het voortgegaan: “Etlike duisende Russe [in werklikheid meer as 16 000] het vanjaar se byeenkoms bygewoon. Verlede jaar was daar 6000. Russiese grensbeamptes het al die busse laat deurry sonder dat hulle in kilometer lange toue moes wag om deursoek te word. Afgevaardigdes het van oor die hele Sowjetunie gekom: van Vladivostok, Khabarovsk, Vorkuta. Party het vier of vyf dae op ’n trein deurgebring.”
Dieselfde koerant haal Ivan M. Grevniak soos volg aan: “Ek het ongeregtigheid gesien in die dinge wat die pouse en die priesters gedoen het, en ek het na eerlikheid gesoek.” Die verslag lui verder: “Hy het opgemerk dat Jehovah se Getuies se dade met hulle woorde strook. Ivan het bygevoeg: “Ek dank God dat hy my toegelaat het om die waarheid te leer.”
Die Trybuna berig dat Ivan ’n ouere man is in ’n gemeente in Lvov waar “daar 13 gemeentes en meer as 2000 gelowiges is. . . . ‘Oral, in alle godsdiensgroepe, heers daar ’n gees van nasionalisme. Dit bestaan egter nie onder my geloofsgenote nie’, sê Grevniak.”
Hierdie eensgesindheid kon gesien word by die byeenkoms van Jehovah se Getuies in Warschau waar die program gelyktydig in verskillende dele van die stadion in Pools en Russies aangebied is. Daar was hoegenaamd geen nasionalistiese wrywing nie.
Zofia Uszynska is ook beïndruk deur die organisasie wat nodig was om huisvesting, voedsel en selfs mediese sorg te voorsien aan die meer as 35000 byeenkomsgangers. Sy het gesê: “Ek het nog nooit so ’n aangename, welwillende openbare byeenkoms bygewoon nie.”
Die Poolse dagblad Sztandar Młodych (Vaandel van die jeug) het kommentaar gelewer op die werk wat gedoen is om die stadion geskik te maak vir so baie besoekers: “As ’n gemeenskapsdiens . . . het Jehovah se aanhangers die banke herbou, die tonnels en toilette opgeknap en die grasperk skoongemaak. Hulle het self die onkoste vir die byeenkoms gedek. Jehovah se Getuies het sowat 22 000 private verblyfplekke vir die besoekers voorberei, na losies vir Sowjetburgers omgesien en self mediese sorg voorsien.”
Jehovah se Getuies beleef ongetwyfeld reeds “rooskleuriger dae” in Oos-Europa en bid dat hulle nuutgevonde wetlike status in lande soos Roemenië, Hongarye en Pole binnekort ook na Tsjeggo-Slowakye, Albanië, Bulgarye en die Sowjetunie sal uitbrei.—2 Thessalonicense 3:1; 1 Timotheüs 2:1, 2.
[Prente op bladsy 23]
Russiese Getuies by die Warschause “Suiwer Taal”-Streekbyeenkoms, met inbegrip van die doopkandidate (bo en insetsel), ’n Russiese spreker, die program en Russiese byeenkomsgangers voor hulle busse