Belangrike datums in die geskiedenis van die ekumeniese beweging
1844: Begin van die interkerklike beweging wat later die Christelike Verenigings vir Jongmanne en Jong Dames opgelewer het.
1846: Eerste internasionale konferensie van die interkerklike Evangeliese Alliansie wat in Londen, Engeland, gehou is.
1908: Stigting van die Federale Raad van die Kerke van Christus in Amerika. In 1950 het dit die Nasionale Raad van die Kerke van Christus in die Verenigde State van Amerika geword.
1910: Eerste Wêreldsendingkonferensie word in Edinburg, Skotland, gehou “waar die hedendaagse ekumeniese beweging werklik begin het”.—Encyclopædia Britannica.
1919: ’n Uitnodiging aan die Katolieke Kerk om saam met die Protestantse Episkopaalse Kerk aan ’n vergadering oor geloof en orde (interkerklike verskille oor leerstellings en die bediening) deel te neem, word deur pous Benedictus XV van die hand gewys.
1921: Stigting van die Internasionale Sendingraad.
1925: Eerste internasionale konferensie van die Universele Christelike Raad oor Lewe en Werk (om ’n algemene kerkbeleid oor ekonomiese, politieke en maatskaplike kwessies te bespreek) word in Stockholm, Swede, gehou.
1927: Eerste wêreldkonferensie van die interkerklike “Geloof en Orde”-beweging word in Lausanne, Switserland, gehou.
1928: Pous Pius XI gee die omsendbrief Mortalium animos uit wat Katolieke verbied om enige steun aan die ekumeniese beweging te verleen.
1937: Die “Lewe en Werk”-konferensie wat in Oxford, Engeland, gehou is en die “Geloof en Orde”-konferensie wat in Edinburg, Skotland, gehou is, kom ooreen om ’n voorlopige komitee saam te stel met die doel om ’n wêreldraad van kerke te stig. Hierdie projek word weens die uitbreek van die Tweede Wêreldoorlog uitgestel.
1948: Die stigting van die WRK (Wêreldraad van Kerke) tydens ’n vergadering in Amsterdam, Nederland. Daar was nagenoeg 150 Protestantse en etlike Oosters-Ortodokse kerke onder sy lede. Sedertdien hou die WRK gereeld algemene vergaderings (1954: Evanston, Illinois, VSA; 1961: Nieu-Delhi, Indië; 1968: Uppsala, Swede; 1975: Nairobi, Kenia; 1983: Vancouver, Kanada).
1960: Pous Johannes XXIII stig die Sekretariaat vir die Bevordering van Christelike Eenheid in die Vatikaan. Dit “was die eerste amptelike erkenning deur die Rooms-Katolieke Kerk van die bestaan van die ekumeniese beweging”.—Encyclopædia Britannica.
1961: Die Internasionale Sendingraad smelt saam met die WRK. Die Vatikaan stuur vir die eerste keer amptelike Katolieke waarnemers na die WRK se algemene vergaderings.
1964: Pous Paulus VI vaardig die Tweede Vatikaanse Konsilie se “Dekreet oor Ekumenisme” uit, waarin uiteengesit word in watter mate Katolieke aan die ekumeniese beweging sal deelneem.
1965: Die ekskommunikasies wat hulle voorgangers in 1054 teen mekaar uitgespreek het, word onderling deur die pous en die Ortodokse patriarg nietig verklaar.
1968: SODEPAX (Saamgestelde Komitee vir Gemeenskap, Ontwikkeling en Vrede) word deur die Vatikaan en die WRK gestig.
1969: Pous Paulus VI besoek die wêreldhoofkwartier van die WRK in Genève, Switserland. Hy beklemtoon egter dat hy die opvolger van die apostel Petrus is en dat dit te vroeg is om te praat oor ’n samesmelting tussen die Katolieke Kerk en die WRK.
1980: SODEPAX word ontbind.
1986: Pous Johannes Paulus II reël ’n ekumeniese “Wêreldbiddag om Vrede” in Assisi, Italië, waar geestelike leiers wat vername godsdienste in die wêreld verteenwoordig, byeenkom om volgens hulle onderskeie ritusse om vrede te bid.