Van ons lesers
Wanneer jy by die skool lastig geval word Die artikel “Jongmense vra . . . Wat kan ek doen sodat hy my sal uitlos?” (22 Mei 1991) was wonderlik bewoord. Toe ek op skool was, het my klasmaats my altyd aangepor om met seuns uit te gaan. Toe hulle agterkom dat ek nie sou toegee nie, het hulle my uitgelos. Nou is ek uit die skool en het begin werk. Sowat ’n maand gelede het ’n ouer man (37 jaar oud) my by die werk genader en vir my gesê dat ek pragtig is en dat hy my wil leer ken. Ek is 18. Ek was vir ’n oomblik stom van verbasing. Maar ek het toe vir hom verduidelik dat ek met een van Jehovah se Getuies studeer en het lektuur by hom geplaas. Hy het ook aanvaar dat ek sy toenadering geweier het.
M. L., Verenigde State
Klerewas Ek skryf aan julle om my waardering uit te spreek vir die artikel “Dit is hoe ons ons klere was . . .” (22 Januarie 1991). As ’n spesiale pionier [’n voltydse evangeliedienaar] in ’n plattelandse gebied moet ek my klere met die hand was. Nadat ek julle artikel gelees het, sien ek geen rede waarom ek afgunstig moet wees op mense met outomatiese wasmasjiene nie.
M. M., Dominikaanse Republiek
Wêreldbekersokker Ek het julle verslag oor die Wêreldbeker-sokkerkampioenskap (8 Mei 1991) gelees maar kan nie met julle ongunstige uitbeelding van hierdie sport saamstem nie. Besorgde ma’s sal moontlik wil hê dat hulle seuns moet ophou om sokker te speel omdat hulle van die geweld in die sportstadions gelees het.
S. B., Duitsland
Ons het nie ’n ongunstige beskrywing van die sport self gegee nie, en ons het ook nie jongmense afgeraai om sport op ’n gebalanseerde manier te geniet nie. Ons het bloot verslag gedoen oor die media se ‘ongunstige uitbeelding’ van die sokkerboef-element onder party aanhangers van hierdie sport. Christene sal verstandig wees as hulle goed nadink voordat hulle ’n geleentheid bywoon waar daar ’n sterk moontlikheid van geweld bestaan.—RED.
Selfmoordsending Dit was asof die ondervinding van Josjimi Aono (22 Januarie 1991) net vir my pa geskryf is. Net soos Josjimi Aono was my pa ook gedurende die oorlog op ’n duikboot. Hy het verskeie lede van die Kaiten- Spesiale Aanvalskorps sien sterf. Sy ondervindinge gedurende die oorlog het hom oortuig dat nóg God nóg Boeddha bestaan. Vandat ek een van Jehovah se Getuies geword het, soek ek na ’n geleentheid om my pa van God se liefde te vertel. Die artikel was ’n antwoord op my gebed. Ek gaan dit dadelik vir hom stuur.
A. S., Japan
“Ontwaak!” se formaat Ek wil graag my waardering uitspreek vir die Ontwaak! se pragtige nuwe formaat sedert die nommer van 8 Januarie 1991. Ek werk in ’n departement wat tegniese publikasies uitgee, en daarom het ek dadelik die verandering in uitleg, lettertipe en kleur opgemerk. Ek sien al 20 jaar lank hoe die tydskrif saam met die tyd verander het, en hoe dit ’n kleurvoller en aantrekliker instrument geword het om mense na Jehovah te trek. Ek kon ’n eksemplaar by ’n kollega laat bloot op grond van hierdie pragtige nuwe veranderinge!
D. A., Verenigde State
Artikels oor diere My opregte dank vir die artikels oor diere en die natuur. Hoewel dit my altyd opgeval het hoe pragtig en kleurvol die foto’s is, het ek eers nie baie aandag aan daardie artikels geskenk nie. Een dag het iemand melding gemaak van ’n artikel wat hy gelees het oor ’n antiloop wat ’n koedoe genoem word (22 Februarie 1991). Dit het my belangstelling in die artikel gaande gemaak. Toe het ek begin om ook van die ander artikels te lees, soos die een oor die muishond (8 Maart 1991). Hierdie artikels het my gehelp om Jehovah deur sy skepping te “sien”.
B. T., Verenigde State