Van ons lesers

Die dood van ’n kind “Die Bybelse beskouing” se artikels “Waarom het God my kind geneem?” (8 Februarie 1991) en “Die dood van ’n kind—Waarom laat God dit toe?” (8 Maart 1991) het vir my net op die regte tyd die nodige bemoediging gegee. Ek het op 9 Januarie die lewe geskenk aan ’n baba wat na drie uur gesterf het. Ek het vir myself kwaad geword en het selfs my misplaaste woede teen God gerig. Toe het ek hierdie artikels gelees. Die diepte van God se barmhartigheid is duidelik in die artikels weerspieël, en ek het gehuil en gehuil. Dankie vir die hoop wat julle verskaf het toe ek eensaam en hartseer was.

C. K., Japan

Skoolspanne Dankie vir die artikel “Jongmense vra . . . Moet ek by die skoolspan aansluit?” (22 Junie 1991). My skool het alle leerlinge wat belangstel, genooi om by die vlugbalspan aan te sluit. Ek wou nog altyd aan die wedstryde deelneem. Maar ek het goed daaroor nagedink. Die wedstryde en oefensessies sou met my evangeliebediening en Christenvergaderinge bots. Nadat ek die artikel gelees het, was ek dus daarvan oortuig dat ek nie by die span moet aansluit nie.

M. C. P., Brasilië

Jode en Christene Ek het so pas die artikels gelees met die tema “Christene en Jode—Kan die breuk geheel word?” (22 Junie 1991). Ek het as ’n Jood grootgeword met die wete dat daar ’n groot kloof tussen “die uitverkore mense” en “die gojiem” bestaan. Ek is ook van die toekomstige koms van ’n Messias geleer, maar dit was ’n baie vae begrip. Jehovah se Getuies het eendag aan my deur geklop en gepraat van ’n toekoms van vrede hier op die aarde. Dit het so aantreklik geklink! Dit was duidelik dat die Getuies geen verbintenis met die kerke het nie. Buitendien het hulle die God van Abraham, Isak en Jakob aanbid. Ek het dus besef dat ek nie my Joodse erfenis sou verraai as ek ’n ware Christen word nie. Ek waardeer julle onlangse artikels dus meer as wat ek in woorde kan sê, en ek hoop dat baie meer mense die groot verskil tussen Jehovah se Getuies en ander godsdienste sal sien.

N. S., Verenigde State

Verander wat jy is Hoewel ek probeer het om die slegte gewoonte van masturbasie te oorkom, is ek deur terugslae ontmoedig. Maar deur die reeks artikels oor die onderwerp “Moet jy verander wat jy is?” (8 Julie 1991) het ek vyf spesifieke stappe geleer wat ek kon doen om myself te verander. Dit het my meer vasbeslote gemaak om my slegte gewoonte te oorkom.

R. H., Japan

Asbes Ek is so dankbaar vir die artikel “Die asbesverhaal—van lewensredder tot doodsbedreiging” (22 Maart 1991). Ek werk by ’n fabriek en ek werk dikwels met asbes. Maar omdat ek nie geweet het hoe gevaarlik die stof is nie, het ek dit gedoen sonder enige van die beskermende maatreëls wat in die Ontwaak! voorgestel is. Die artikel was dus vir my en my werkmaats voordelig, aangesien ek die saak by ons daaglikse veiligheidsvergadering kon bespreek.

J. R. T., Brasilië

Daar was ’n verkeersongeluk waarby asbes betrokke was, en diegene wat aan die reddingspoging deelgeneem het, het nie geweet hoe gevaarlik blootstelling aan daardie stof kan wees nie. Ek het julle artikel ’n paar dae voor hierdie ongeluk gelees. As ’n ingenieur kon ek riglyne gee sodat die werk veilig gedoen kon word.

D. C., Brasilië

Sangvoëls Dankie vir die fassinerende artikels oor sangvoëls in die nommer van 22 Mei 1991. My man voer die voëls in ons agterplaas al jare lank, en ons geniet dit albei om na hulle te kyk. Maar nadat ons gelees het van die ongelooflike manier waarop die voëls hulle note voortbring, luister ons nou ook na hulle. Ons is so dankbaar vir julle pragtige beskrywing van nog een van Jehovah se wonders.

J. S., Verenigde State