Hulle het gejuig in Oos-Europa
TIENDUISENDE mense het hierdie afgelope somer na groot stede in Oos-Europa gestroom. Die strate van die pragtige Boedapest, Praag, Zagreb en meer as 20 ander stede was vol mense wat blou-en-wit lapelkaartjies gedra het. Hierdie kaartjies het hulle geïdentifiseer as liefhebbers van godvrugtige vryheid wat die byeenkomste van Jehovah se Getuies bygewoon het.
Byeenkomste is vir die heel eerste keer vryelik in die Europese republieke van die Sowjetunie, sowel as in vergeleë Siberië en die Asiatiese Sowjetrepubliek Kazachstan, gehou. Altesaam meer as 370 000 byeenkomsgangers het hartlike broederskap in Tsjeggo-Slowakye, Hongarye, Joego-Slawië, Pole, Roemenië en die Sowjetunie geniet.
Vir diegene wat nie daar was nie, is dit miskien moeilik om hulle die vreugde voor te stel toe 74 252 in die Sowjetunie byeengekom het om Jehovah God openlik en sonder vrees te aanbid. Maar hulle volkome vreugde kon skaars die vreugde oortref het van die 74 587 in Praag en die 40 601 in Boedapest wat in die grootste stadions in Tsjeggo-Slowakye en Hongarye byeengekom het, of van die 14 684 wat in Zagreb, Joego-Slawië, vergader het.
Wat dit so merkwaardig maak, is die feit dat die werk van Jehovah se Getuies net ’n paar jaar tevore in die meeste Oos-Europese lande verbied was. Hulle was gedurende die Koue Oorlog van die Weste afgesny. Dit was selfs onwettig om in klein groepe byeen te kom om God te aanbid. Dit is geen wonder dat daar soveel vreugde was toe hulle vryelik tydens groot byeenkomste kon vergader nie!
’n Nege-en-vyftigjarige Tsjeggiese Getuie, wat ongeveer 40 jaar gelede vanweë haar geloof in God agt maande in alleenopsluiting deurgebring het, het gesê: “Baie van ons wat in Praag gewoon het, het gedroom oor ’n groot byeenkoms wat in hierdie stadion gereël kon word, maar ons het nooit gedink dat hierdie droom op so ’n wonderlike wyse bewaarheid sou word nie.”
Twee weke voor die byeenkoms in Praag, 9 tot 11 Augustus, het ’n koerant van daardie stad, Večerník Praha, opgemerk: “Jehovah se Getuies is van hoogverraad, asook van die ontwrigting van sosialisme aangekla en is baie jare lank in Kommunistiese tronke gesit.” Nadat die artikel verduidelik het dat tienduisende Getuies binnekort in die stad ontvang sou word, het dit afgesluit: “Dit is onwaarskynlik dat julle enige ander tyd soveel vriendelike en glimlaggende mense in Praag sal teëkom as gedurende die tweede naweek in Augustus.”
Maar jy vra dalk: ‘Is Jehovah se Getuies vroeër om grondige redes vervolg? Was hulle ooit ’n bedreiging vir die politieke owerhede van die lande waarin hulle gewoon het? Waarvandaan het die honderdduisende byeenkomsgangers in Oos-Europa gekom? Hoe kon hulle getalle so gegroei het, aangesien hulle 40 jaar of langer onderdruk is en van vrye kontak met die Westerse wêreld afgesny was?’