Ons beskou die wêreld
Slegte nuus op TV
“Slegte nuus vir Brasilianers wat televisie kyk: Die hoeveelheid slegte nuus in TV-nuus neem toe”, beweer die koerant O Estado de S. Paulo. Die koerant berig dat 15 joernaliste oor ’n tydperk van tien dae na al die nuus op die TV-kanale gekyk het. Slegs 18 persent van die nuus waarna hulle gekyk het, is as goeie nuus geklassifiseer. Die direkteur van die instituut wat die opname gemaak het, het na bewering gesê: “Dit was ’n 95 uur lange marathon van tragedies.” Nuus oor die ekonomie en die ekologie is as die negatiefste beskou. Die paar optimistiese items het oor vermaak en sport gehandel. ’n Psigoanalis het gewaarsku dat sulke groot dosisse geweld en teenspoed op die nuus mense se gedrag kan verander en waarskynlik kan veroorsaak dat hulle die tragedies van ander mense as alledaags beskou.
“Sedelik onopgevoed”
Onderwysers stem saam dat daar in vandag se samelewing al hoe meer kinders is wat “sedelik onopgevoed” is. Volgens Burle Summers, president van die Ontario Morals/Values Education Association, word “’n ambisieuse leefwyse, vinnige bevordering, die verkryging van beheer en leierskap”, as belangrike waardes aan kinders voorgehou. Hy het gesê: “Om ander te dien, ander te respekteer en vir ander om te gee, word nie as belangrik beskou nie.”
Kerkklokke is senutergend
“Kerkklokke lui te dikwels en te hard” vir party inwoners van westelike Toronto, berig The Toronto Star. Die huisbewoners beskou die gelui van kerkklokke as “geraassteurnis” en het die munisipaliteit versoek om aandag aan die saak te skenk. Die munisipaliteit se dienskomitee het voorgestel dat die betrokke kerke die klokke op weeksdae twee keer vir ’n minuut en op Sondae drie keer lui—maar nooit voor 9:00 vm. nie. Kerkklokke kan by ander geleenthede soos troues, begrafnisse en aanddienste gedurende die Vastyd lui. Kerkklokke word gelui om gemeentelede na kerkdienste te nooi. Plaaslike stadsbewoners sê egter dat wekkers dieselfde ding kan doen sonder om die hele buurt te steur en wakker te maak.
Slaapposisie hou verband met SSSS
Elke jaar sterf duisende babas oor die hele wêreld aan SSSS (Sindroom van Skielike Sterftes by Suiglinge). Dit bly een van die vernaamste doodsoorsake by kinders gedurende die eerste paar maande van hulle lewe. Die ware oorsaak van SSSS is nog steeds onbekend. Maar die International Herald Tribune van Parys berig dat mediese deskundiges van reg oor die wêreld onlangs in Australië byeengekom het om die probleem te bespreek. Hulle het ouers aangeraai: “Moenie babas op hulle maag laat slaap nie.” Navorsing toon blykbaar dat die gevaar om aan die sindroom te sterf ten minste drie keer hoër is vir babas wat op hulle maag neergelê word as vir dié wat óf op hulle rug óf op hulle sy neergelê word. Dokters meen dat duisende lewens gered kan word as ouers oor hierdie gevare ingelig word.
Gewilde godslastering
’n Australiese leraar het hom sterk uitgespreek teen godslasterlike uitdrukkings wat al hoe meer gebruik word en blykbaar aanvaarbaar is. Hy is veral bekommerd oor die uitwerking daarvan op jongmense, en hy het ’n kampanje bepleit om godslastering uit hedendaagse spraak te help verwyder. Die Brisbanese koerant, die Courier-Mail, het die geestelike se woorde aangehaal: “Uitdrukkings soos ‘Here’, ‘O God’, ‘My God’, ‘Jesus’ en ‘O Jesus’ word al hoe meer gebruik as kragwoorde pleks van uitdrukkings van verering. Dit is algemeen in romans, op die verhoog, op die silwerdoek, TV, oor die radio en in die pers. Solank as wat ons hierdie oneerbiedigheid verskoon, kan ons nie van ons jongmense verwag om ’n sensitiewe eerbied vir God en Christus te hê nie.” Hy sê voorts dat hy opgemerk het dat godslastering oor die jare geleidelik toegeneem het en dat sulke spraak nou deur baie mense as ’n vorm van aanvaarbare vloektaal beskou word.
Plaagdodervergiftiging
Volgens die tydskrif New African veroorsaak plaagdoders oral in ontwikkelende lande dat ongeveer 25 miljoen mense elke jaar vergiftig word en 20 000 mense elke jaar sterf. Chemiese maatskappye laai gevaarlike plaagdoders in arm lande af waar boere onkundig is oor die gevare en waar regerings invoere nie deeglik kan nagaan nie. New African berig dat ’n Switserse chemiese maatskappy onlangs erken het dat hulle 450 000 liter insekdoder wat DDT bevat, ’n uiters gevaarlike chemikalie wat in 45 lande verbied of streng beperk word, aan Tanzanië verkoop het. In landelike Ghana word DDT soms gebruik om vis mee te vang. Die chemikalie word in riviere gegooi, wat die visse doodmaak en hulle ’n maklike vangs maak. Die vis wat steeds die aktiewe gif bevat, word uiteindelik deur Afrikane geëet.
Gevaarlike sonbruin
The Toronto Star berig dat velkanker onder Kanadese “in die laaste agt jaar met 235 persent toegeneem het”. Nuwe statistieke toon dat 1 uit 7 Kanadese gedurende sy leeftyd velkanker sal kry. Wat is die vernaamste oorsaak? Volgens die Canadian Dermatology Association is dit blootstelling aan die son. Dr. Gary Sibbald, ’n dermatoloog, beweer dat net “een sonbrand wat blase veroorsaak die kans om velkanker te kry, verdubbel”. Hy voeg by: “’n Sonbruin is nie gesond nie. Dit toon dat die vel beskadig is.” Volgens The Globe and Mail kan dit tot “plooie, rimpels, vlekke, letsels en velkankers” lei. Om ’n goeie sonskerm aan te smeer, beskermende klere te dra en direkte blootstelling tussen tien-uur in die oggend en drie-uur in die middag te voorkom, is as voorsorgmaatreëls aanbeveel.
Homoseksuele teoloë
Die Teologiese fakulteit van die Helsinki-universiteit in Finland het ’n organisasie wat homoseksuele studente verteenwoordig. Kotimaa, ’n vername kerktydskrif, berig dat ongeveer 20 studente deelgeneem het aan die bedrywighede van hierdie groep genaamd Homoseksuele Teoloë. ’n Verteenwoordiger van Homoseksuele Teoloë verduidelik dat daar in Finland net soveel homoseksuele onder teoloë en kerkamptenare is as onder die res van die bevolking. Die presiese getal is nie bekend nie, maar ramings wissel van 4 tot 10 persent. Hierdie teologiese studente se beswaar is dat die kerk in Finland nie ingestem het om dié wat hulle homoseksualiteit openlik erken te orden nie.
Hulp in die huis
Japannese mans is nie tradisioneel daarvoor bekend dat hulle met die huiswerk help nie, maar tye verander. ’n Onlangse opname in Tokio het getoon dat, hoewel mans dit nog as ’n vrou se werk beskou om te kook, kinders groot te maak en skottelgoed te was, byna 60 persent meen dat mans met die huishoudelike take moet help. Ongeveer 70 persent sê dat hulle dikwels byvoorbeeld skoonmaakwerk doen, inkopies doen en die vullis uitneem. Jonggetroude mans is die gewilligste om te help; 60 persent van hulle stem saam dat “mans soveel moontlik met die huiswerk moet help” en 29 persent sê dat hulle “nie omgee om te help nie”. “Maar hierdie behulpsame gesindheid onder jonggetroude mans duur nie lank nie”, het die Mainichi Daily News gesê en bygevoeg dat “die mans wat gesê het dat hulle gewillig is om soveel moontlik met huishoudelike take te help tot 47 persent verminder het” onder die gesinne waar die oudste kind op laerskool is. Daarbenewens het die getal mans in sulke gesinne wat aanvoer dat dit onnodig is om in die huis te help tot 13 persent gestyg.
TV en cholesterol
Kinders wat te veel tyd voor die televisie deurbring, beskadig nie net hulle verstande nie maar ook hulle slagare. ’n Onlangse studie van 1000 jongmense onder 20 onthul dat kinders wat tussen twee en vier uur per dag televisie kyk waarskynlik ’n veel hoër cholesterolvlak het as dié wat minder televisie kyk. Volgens Prevention, ’n gesondheidstydskrif, verduidelik dr. Kurt V. Gold, wat aan die Universiteit van Kalifornië-Irvine verbonde is, dat “hoë cholesterol op so ’n jong ouderdom die kanse op vroeë hartkwale kan verhoog”. Dr. Gold sê dat die “TV talle bekende gevare bymekaarbring. Jy sit dalk uiteindelik die hele dag rond en eet te veel gemorskos en kry nie genoeg oefening nie.”
Ongetroude moeders
’n Onlangse verslag het getoon dat meer as ’n derde van die vroue wat gedurende 1990 in Costa Rica geboorte gegee het, ongetroud was. Byna 16 persent was jonger as 19. Die getal babas wat in daardie jaar in Costa Rica gebore is, was altesaam 81 939. Van hierdie babas het 30 119 ongetroude moeders gehad, terwyl 50 411 vir getroude vroue gebore is. Die res is gebore vir weduwees, geskeide vroue of vroue wat van hulle mans vervreemd is. Volgens die koerant La Nación van San José, Costa Rica, het 360 babas moeders jonger as 15 gehad en 12 578 het moeders tussen 15 en 19 gehad.