Van ons lesers
Vorme van kankerbehandeling Ek is van mening dat die berig “Vorme van behandeling word vergelyk”, wat in die rubriek “Ons beskou die wêreld” (22 September 1991) verskyn het, baie misleidend was. Dit gee te kenne dat kankerlyers net soveel by onkonvensionele behandeling sal baat vind as by behandeling by ’n gevestigde mediese sentrum. Die strekking van die artikel in The New England Journal of Medicine waarop julle berig gebaseer is, verskil heelwat van julle berig.
A. R., M.D., Verenigde State
Ons beknopte berig was korrek, maar ons het nagelaat om een belangrike bevinding van die studie te meld, naamlik dat pasiënte wat terminaal siek is en konvensionele mediese behandeling ontvang het, berig het dat hulle ’n “aansienlike beter gehalte lewe” geniet het as dié wat onortodokse vorme van behandeling ontvang het. Nietemin, soos ons berig getoon het, het nie een van die twee vorme van behandeling daarin geslaag om die pasiënte se lewens te verleng nie. Die studie het dus aan die hand gedoen dat “geen behandeling as alternatief” oorweeg word vir sommige pasiënte wat terminaal siek is. Lesers moet ook daarop let dat hierdie bevindinge, volgens die navorsers self, “nie veralgemeen kan word waar dit kom by pasiënte met minder gevorderde stadiums van [kanker] nie”. Die skrywers van die studie kom tot die slotsom dat enkele onortodokse vorme van behandeling “moontlik ’n gepaste ondersoek regverdig” deur mediese navorsers.—RED.
Oos-Europese byeenkomste Ek het die reeks “Liefhebbers van godvrugtige vryheid juig in Oos-Europa” (22 Desember 1991) hartroerend gevind. Dit was asof ek die uitroepe van vreugde en die applous kon hoor toe ons Christenbroers daar nuwe Bybelpublikasies in hulle eie tale ontvang het. Aangesien dit nie vir my moontlik was om by daardie byeenkomste te wees nie, is ek dankbaar dat julle hierdie artikels gepubliseer het wat dit vir ons moontlik gemaak het om in ’n mate in hulle vreugde te deel en die vryheid wat ons geniet meer te waardeer.
M. M., Italië
Flirtasie Ek het die artikel “Jongmense vra . . . Hoe kan ek die pyn van ’n flirtasie vermy?” (8 Desember 1991) gelees. Dit het my diep geroer, aangesien ek ’n ondervinding soos die een in die artikel gehad het. Die een tussenhofie lui: “Moenie deur ’n flirt seergemaak word nie!” Dis moeilik, want teen die tyd dat jy besef dat jy die slagoffer van ’n flirt is, het jy dalk reeds seergekry. Maar soos die artikel uitbring, moet ons moontlik ’n paar kneusplekke en krapmerke opdoen op die weg na ware liefde. Dankie vir sulke waardevolle artikels.
S. C. S. M., Brasilië
Geskil oor bloed Ek het die artikel “Moet nooit sê dis onmoontlik nie!” (22 September 1991) nou net klaar gelees, en ek is in trane terwyl ek hierdie brief skryf. Ek lewe in ’n godsdienstig verdeelde huishouding en het ’n dogtertjie. Alhoewel my man nie op die oomblik my geloof teenstaan nie, sal hy dit wel doen indien ’n situasie met ons dogtertjie ontstaan waar ’n bloedoortapping ’n geskilpunt is. Hierdie artikel het dit weer eens by my ingeskerp hoe nodig dit is dat ons ons kinders oplei sodat hulle self op ’n vroeë ouderdom ’n standpunt vir Bybelbeginsels kan inneem.
L. W., Verenigde State
Wol en motte In julle artikel “Die wonder van wol” (22 September 1991) sê julle: “Jy hoef seker nie daaraan herinner te word dat motte lief is vir wol nie. Hulle lê hulle eiers op so ’n manier dat die ruspes wat uitbroei genoeg kos het.” Maar die meeste motte beskadig nie wol of enige ander materiaal nie! Daardie bewering sal mense daarvan oortuig dat alle motte ’n gevaar inhou en gedood moet word.
T. K., Engeland
Die artikel het beslis nie die grootskaalse uitwissing van motte bepleit nie, maar het eenvoudig praktiese wenke aan die hand gedoen om ’n motteplaag te voorkom. Interessant genoeg, volgens “Grzimek’s Animal Life Encyclopedia” is die motsoorte wat van wol leef “baie teësinnig om te vlieg. Die meeste motte wat wel in huise rondvlieg, behoort tot ander, onskadelike families.”—RED.