Van ons lesers
Rasse verenig Die reeks “Sal alle rasse ooit verenig wees?” (22 Augustus 1993) het my gehelp om te besef wat die oorsprong van rassisme is en hoe dit van die een geslag na die ander oorgedra is. Ek verstaan nou ook waarom nie alle Christene noodwendig al hulle vooroordele te bowe gekom het nie. In die verlede het dit my baie ontmoedig. Maar nou besef ek dat dit tyd neem om van hierdie slegte neigings ontslae te raak. Ek sien uit na God se regverdige nuwe wêreld waar rassegeskille iets van die verlede sal wees.
C. W., Verenigde State
Kaartjies Dankie vir die artikel “Kom ons stuur ’n kaartjie” (8 Augustus 1993). My ouma maak al jare lank kaartjies en stuur dit vir al haar kleinkinders. Ek is 13 jaar oud en maak nou al omtrent twee jaar lank my eie kaartjies. Om geperste blomme te gebruik, soos julle artikel voorgestel het, werk nogal goed. Ek het uitgevind dat dit nogal mooi lyk as jy ’n bietjie gom op die blomme sit en dan ’n paar blinkertjies daaroor strooi.
J. B., Verenigde State
Liggaamsgebreke Daar is min artikels oor liggaamsgebreke wat so realisties is soos die artikel “Jongmense vra . . . Hoe kan ek my liggaamsgebrek die hoof bied?” (8 Junie 1993). Nadat ek ’n paar jaar lank by die takkantoor van Jehovah se Getuies in Rome, Italië, gedien het, was ek in ’n ernstige motorongeluk en is my ruggraat beskadig. Klein dingetjies soos om te loop en ’n glas water vas te hou, het skielik moeilik geword. Oornag het ek iemand nodig gehad wat my kon help om op te staan, aan te trek, die trap te klim, ensovoorts. Ná ’n lang tydperk van woede, hartseer, selfbejammering en trane het ek die situasie uiteindelik aanvaar en besef dat ek dit na die beste van my vermoë moet hanteer. Met die ondersteuning van ’n toegewyde fisioterapeut, my ouers en vriende het my toestand verbeter en kon ek by die takkantoor bly dien. Glo my, jy kan ten spyte van liggaamsgebreke steeds ’n baie bedrywige en nuttige lewe lei!
A. E., Italië
Die versamel van klippe As ’n dokter het ek julle artikel “Skattejag met ’n verskil” (8 Julie 1993) met groot belangstelling gelees. Ek het egter opgemerk dat julle van die gebruik van ’n hamer gepraat het, maar nie melding gemaak het van beskerming vir die oë nie. Dit is baie belangrik, want ’n hamer se gekap kan maklik veroorsaak dat stukkies klip opspring en dit kan baie gevaarlik vir ’n mens se oë wees.
G. T. W., Engeland
Ons waardeer hierdie nuttige veiligheidswenk.—RED.
Reuksin Ek het die artikel oor “Ons veelsydige reuksin” (22 Julie 1993) regtig geniet. Ek het drie jaar gelede ’n wetenskapprojek oor hierdie onderwerp op skool gedoen. Baie mense besef net nie hoe belangrik die reukstelsel is nie. Dankie dat julle vir soveel mense getoon het hoe ontsagwekkend die reuksin werklik is.
L. T., Verenigde State
Diereverhale Ek is ’n 20-jarige Zulu wat daarvan hou om van die skeppingswonders te leer. Ek het die artikel oor “Die geruislose jagter” (8 Maart 1993) baie waardeer. Onder die Zulubevolking word uile as slegte voortekens beskou en word daar geglo dat hulle met toordery verband hou. Wanneer mense ’n uil sien, jaag hulle hom weg. Julle eenvoudige en leersame artikel is dus hoog op prys gestel.
Z. P. M., Suid-Afrika
Dankie vir die artikel “Springende musikante van die insekwêreld” (8 April 1993). Sprinkane is dikwels sinoniem met plae. Maar die artikel het my simpatie vir hierdie insek gewek—en ook my eerbied verhoog vir ons Skepper se wysheid en die manier waarop hy aan die fynste besonderhede aandag geskenk het.
V. P., Brasilië