Seekoei word lewensredder!

DIE seekoei is die tweede grootste landsoogdier en kan tot vier ton weeg. Sy kragtige kake kan ’n kano in ’n enkele hap in stukke breek. ’n Groep mans by die Hwange- Nasionale Park in Zimbabwe was dus nogal verbaas toe hulle ’n seekoei op ’n manier sien optree wat vir hulle—om die minste te sê—ongewoon gelyk het.

Die mans was naby ’n dam toe hulle nege wildehonde gesien het wat kort op die hakke van twee rooibokke was. Toe die rooibokke geen uitkomkans kon vind nie, het hulle in die water ingehardloop. Die honde het langs die kant van die water gedraf na waar die rooibokke waarskynlik sou uitkom.

Uiteindelik het een uitgeputte rooibok na ’n oewer verder aan begin swem sonder om te besef dat die honde daar wag. Maar toe die rooibok nader aan die land gekom het, het die mans ’n seekoei daar naby gesien wat na die rooibok toe geswem het. Toe die seekoei die rooibok bereik, sê die tydskrif African Wildlife, het hy “[die rooibok] omgedraai en met ’n ligte stootjie aangepor om in die teenoorgestelde rigting te swem”. Dit is dan ook wat die rooibok gedoen het. Die seekoei het die rooibok gevolg en hom elke nou en dan ’n stootjie gegee wanneer hy swakkerig gelyk het.

Toe die rooibok by die oewer uitkom, het die mans gesien hoe die seekoei die rooibok liggies maar ferm uit die water stoot. Die rooibok het ’n paar onseker treetjies gegee en toe daar gestaan en bewe. Kort daarna het die rooibok van die water af begin wegstap. Die seekoei het die rooibok gevolg totdat nie een van hulle meer gesien kon word nie.

Wat het van die ander rooibok geword? Die mans vertel dat die wildehonde “so besig was om die redding dop te hou dat die ander rooibok ongemerk ontsnap het”.