’n “Uitgestorwe” voël word weer ontdek

WAT is omtrent so groot soos ’n hoenderhen, het ’n rooi snawel soos dié van ’n papegaai en pers-rooi vere, kan nie vlieg nie en is van ongeveer 1900 tot 1948 as uitgestorwe beskou? Hier is nog ’n leidraad: Hy word net in Nieu-Seeland aangetref en het ’n Maori-naam. Dit is die takahe, of Notornis mantelli hochstetteri.

Hierdie skuwe voëls bring die grootste gedeelte van die jaar deur in die hoogland van die Murchison- en Keplerberge van Fjordland in die suidweste van Nieu-Seeland se Suid-eiland. ’n Paar word egter in gevangenskap aangehou, soos die een wat hier in Te Anau se openbare parkie afgeneem is. The Illustrated Encyclopedia of Birds sê dat daar onder hierdie groot voëls (byna 63 sentimeter lank) “’n rampspoedige afname was weens die mededinging en roofsug van diere wat van ander gebiede af ingebring is”. Ten spyte van die feit dat hulle in gevangenskap uitgebroei word en dat roofdiere beheer word, is hulle steeds ’n bedreigde spesie.

Dieselfde bron sê dat “hulle die saadblomme en sagte grashalms eet”. Maar vir hulle kos moet hulle meeding “met [die] takbokke wat daar ingebring is, en gewoonlik verloor hulle die stryd”. Laat ons hoop dat hierdie unieke voël nie van Nieu-Seeland se lys van seldsame diere sal verdwyn nie.