Van ons lesers
Humor Ek wil graag my waardering uitspreek vir die artikel “Maak humor ’n deel van jou lewe” (22 Mei 1994). Ek was nog altyd baie teruggetrokke en is dikwels humeurig. Toe ek geleer het om humor ’n deel van my lewe te maak, het dinge verander. Gelag is waarlik “die kortste afstand tussen twee mense”.
A. Q. G., Brasilië
Kanker Ek het onlangs vir my ma se dokter ’n eksemplaar van julle nommer van 8 April 1994 oor “Borskanker—elke vrou se vrees” gegee. Op bladsy 10 beskryf julle hidrasiensulfaat as ’n “onskadelike geneesmiddel”. Die dokter het ons mediese lektuur gewys wat dit as uiters giftig bestempel.
D. M., Frankryk
Aangesien die giftigheid van hierdie chemiese middel blykbaar ’n omstrede punt is, het ons gefouteer toe ons die geneesmiddel onskadelik genoem het. ’n Russiese navorsingstudie het beweer dat dit uiters giftig was toe dit in groot dosisse vir laboratoriumrotte en -muise gegee is. In ’n kliniese studie oor menslike kankerpasiënte wat by UCLA se Mediese Sentrum gedoen is, is daar egter berig dat hidrasien “matig” is met 71 persent van die pasiënte wat geen vergiftiging aangemeld het nie. Baie meer navorsing moet ongetwyfeld nog gedoen word voor die gevare en moontlike voordele van hierdie geneesmiddel ten volle bepaal kan word.—RED.
Opera Ek het nog altyd gedink dat julle artikels wonderlik is, en ek het nog altyd gemeen dat hulle spesiaal vir my geskryf is. Maar ek sou nooit kon dink dat julle oor iets sou skryf waarvoor ek werklik lief is nie, naamlik die opera. Ek kon nie ophou huil toe ek die artikel “’n Aand by die opera” (8 Julie 1994) gesien het nie. Baie dankie.
S. S., Roemenië
Addie se verhaal Die artikel “Addie het die antwoord laat gevind, maar nie te laat nie” (22 Julie 1994) was eenvoudig wonderlik! Dit was soos om ’n roman te lees, maar dit was in werklikheid ’n ware verhaal. Ek is ontroer toe ek besef het wat die les van haar verhaal is, naamlik dat die predikingswerk die beste manier is waarop ons ons naaste kan help!
D. L., Italië
Ek het so pas die lewensverhaal van Addie Clinton Few gelees, en vir die eerste keer in die 19 jaar wat ek die Ontwaak! lees, skryf ek om dankie te sê! Ek is ook swart en het my hele lewe lank die venynige aanmerkings van sosiale ongeregtighede verduur. Maar ek het geleer dat Jehovah werklik besorg is oor die toestand waarin gekleurde mense hulle bevind en dat sy beloofde nuwe wêreld al die ongeregtighede sal regstel.
L. N., Verenigde State
Die artikel het getoon dat haar skerpsinnigheid en humor met nederigheid getemper was. Sy was ’n baasverteller! Ek het die slot baie roerend gevind. Daar op die bus het ek die een oomblik gelag en die volgende gehuil.
D. M., Verenigde State
Oorgewig Die artikel “Jongmense vra . . . Waarom is ek so vet?” (22 April 1994) het my beïndruk. Ek was nog altyd ontevrede met my gewig, maar die artikel het gesê dat Jehovah nie na ons voorkoms kyk nie, maar na wat in ons hart is. Dankie.
N. C., Verenigde State
Hoewel ek nie werklik vet is nie, wens ek soms dat ek soos daardie modelle kan lyk. Soms raak ek terneergedruk en huil ek net. Julle artikel het my help besef dat ek nie die enigste een is wat so voel nie, en dit was vertroostend.
R. M., Verenigde State
Ek is nie vet nie, maar ek is ’n groot meisie met breë skouers. My nefies en ouer broers terg my. Ek waardeer julle punt dat, hoewel ek dalk groot gebou is, dit nie noodwendig beteken dat ek gewig moet verloor nie.
M. T., Verenigde State