Ons beskou die Wêreld
Dodelike vredesendings
Tot dusver is meer as duisend mense doodgemaak terwyl hulle op vredebewaringsendings van die Verenigde Nasies was, berig die Duitse koerant Frankfurter Allgemeine Zeitung. Hierdie syfer sluit nie diegene in wat hulle lewe gedurende VN-gevegsendings, soos in die Golfoorlog, verloor het nie. Van hierdie 1000 sterfgevalle het meer as 200 in 1993 alleen plaasgevind. Waarom soveel? Die koerant het verduidelik dat die Verenigde Nasies nou by ’n ander soort oorlog betrokke raak. Waar die Verenigde Nasies in die verlede as bemiddelaar en monitor in die skikking van konflikte tussen lande opgetree het, is die organisasie nou betrokke by “burgeroorloë, waarin die gesag van die regering in duie stort en selfs die partye wat die oorlog voer, versuim om die personeellede van die VN te beskerm”.
Geestesiektes onder kinders
Volgens The Sunday Times is daar in Groot-Brittanje se skole meer as 1 000 kinders onder 10 jaar en ongeveer 1 200 tussen 10 en 14 jaar wat vir psigose, ernstige depressie of eetversteurings behandel word; en die selfmoordsyfer styg ook, met kinders van net ses jaar wat dreig om hulle eie lewe te neem. Party geestesgesondheidsdeskundiges meen dat een van die redes hiervoor die gebrek aan betekenisvolle gesprekke tussen kinders en hulle ouers is. Hulle sê dat baie kinders in ’n huislike milieu leef wat deur die televisie oorheers word. Gevolglik kan die kinders nie hulle sorge met hulle ouers bespreek nie. Een deskundige het gesê dat die gebrek aan kommunikasie tussen ouers en kinders tot gevolg kan hê dat “bekommernisse toeneem en dat die kind op die ou end ongelukkig is”.
Verontagsaming van verkeersligte
In Argentinië was daar volgens Clarin, ’n koerant van Buenos Aires, 7 700 ernstige motorongelukke gedurende 1994. In hierdie ongelukke is 13 505 mense ernstig beseer en is 9 120 dood. ’n Studie wat deur ’n regeringsinstansie gedoen is, het getoon dat 90 persent van alle motorongelukke veroorsaak word deur bestuurders en voetgangers wat verkeersreëls oortree. Die algemeenste ongelukke in stede is botsings van die kant af wat plaasvind wanneer ’n rooi verkeerslig verontagsaam word. Eduardo Bertotti, ’n regeringsamptenaar, het gesê dat dit in ander lande ondenkbaar is om ’n rooi verkeerslig te verontagsaam, maar in Argentinië “is dit nie net ’n algemene gebeurtenis nie, maar daar is mense wat selfs trots is op die feit dat hulle dit doen”.
Tienergeweld
In die Verenigde State was daar vir drie opeenvolgende jare ’n afname in die aantal ernstige misdade wat aangegee is. Maar die aantal tieners wat vir misdade verantwoordelik is, neem toe, veral onder jeugdiges tussen 14 en 17 jaar. Party deskundiges voorspel dat gewelddadige misdaad sal toeneem namate die aantal tieners meer word. Een deskundige, James Alan Fox, van die Northeastern-universiteit in Boston se Kollege vir Strafregspleging, het gesê dat “die aantal jongmense in die Verenigde State gedurende die volgende paar jaar grootliks sal vermeerder, met 23 persent meer tieners teen 2005”, berig The New York Times. Fox waarsku dat “ons moontlik teen die jaar 2005 ’n bloedbad van tienergeweld sal hê tensy ons nou optree, terwyl ons kinders nog jonk en ontvanklik is”.
Ontdoping van die dooies
Joodse oorlewendes van die Slagting was onlangs geskok toe hulle verneem het dat party van hulle familielede lank ná hulle dood as Mormone gedoop is. The New York Times het verslag gedoen van die gebruik “waarvolgens dooie mense as Mormone gedoop word deur lewende kerklidmate wat as hulle gevolmagtigdes instaan”. Mormone het die name verkry van sowat 380 000 Jode wat in konsentrasiekampe gesterf het of wat andersins slagoffers van die Slagting was. Hulle het hulle toe, oor ’n tydperk, gedurende seremonies gedoop waartydens kerklidmate in hulle plek in water ondergedompel is terwyl die name van die oorledenes gelees is. Sommige Joodse organisasies het teen hierdie prosedure beswaar gemaak. Gevolglik het Mormoonse leiers ingestem om die name van Joodse slagoffers van die Slagting vir wie sulke seremonies gehou is van hulle lys van gedoopte Mormone te skrap.
Spanning in Hongkong
’n Onlangse opname waarin daar met 5000 mense uit 16 verskillende lande ’n onderhoud gevoer is, het getoon dat Hongkong die stad met die meeste spanning ter wêreld is, berig The Medical Post. Vir baie mense hou die spanning met hulle werk verband. Die navorser dr. David Warburton, van Engeland se Universiteit van Reading, sê dat “ongeveer 70% van Hongkong se mans en 64% [van] die vroue oor spanning by die werk gekla het, in vergelyking met 54% van die mense oor die hele wêreld”. Ongeveer 41 persent van die mense van Hongkong waarmee daar ’n onderhoud gevoer is, het gevoel dat hulle werk vervelig is, in teenstelling met 14 persent in ander lande. Die Post sê voorts dat “een uit vyf mense in Hongkong (in vergelyking met minder as een uit 10 oor die hele wêreld) gesê het dat die hoofrede vir spanning by die werk was dat hulle nie van hulle baas hou nie”.
Elektriese toestelle onder verdenking
Volgens die FDA Consumer, ’n tydskrif van die Amerikaanse Voedsel- en Medisyneraad, sal mediese toerusting dalk nie behoorlik funksioneer wanneer dit aan elektromagnetiese steuring, soos dié van ’n sellulêre telefoon daar naby, blootgestel word nie. “Party Europese hospitale het reeds sellulêre telefone in hulle geboue verbied, en die FDA het hospitale in die Verenigde State aangespoor om dieselfde stappe te doen indien dit geregverdig is”, sê die tydskrif. Elektromagnetiese steuring staan onder verdenking in talle ongelukke waarin lewensreddende mediese toestelle soos pasaangeërs en apneemonitors nie behoorlik gefunksioneer het nie. Die FDA Consumer waarsku: “Pasiënte en dokters wat gereeld gevoelige mediese toestelle gebruik, moet van die probleem bewus wees en daaraan dink om sellulêre telefone van hulle toerusting af weg te hou.” Elektromagnetiese steuring kan ook deur draadlose rekenaarverbindings, mikrogolfseine, radio- en televisiesenders, roepradio’s en ander elektriese toestelle veroorsaak word. Navorsers stel ondersoek in na maniere om die gevaar te verminder.
Die mite van die ontbrekende skakel
Evolusioniste soek al lank na fossielgetuienis ter stawing van die teorie dat die mens van die aap afstam. Maar die Paryse koerant Le Monde sê dat “teorieë oor die oorsprong van die mens geskud is” deur die ontdekking van 90 bene in Etiopië wat paleontoloë meen die oorskot van ’n volwasse mensagtige geraamte verteenwoordig. Volgens paleontoloë is die probleem dat die nuwe fossiele nie enige van die teorieë steun wat probeer toon dat daar ’n skakel tussen mense en ape is nie. Die fossiele het eerder meer vrae laat ontstaan as wat dit beantwoord het. Party navorsers het tot die gevolgtrekking gekom dat die sogenaamde ontbrekende skakel tussen die mens en die aap dalk “net ’n mite” is, sê Le Monde.
Rekenaarpornografie aan kinders beskikbaar
Wanneer Australiese skole by die Internet-wêreldinligtingsnetwerk aansluit, skakel hulle ook in by wat op ’n sedelike mynveld neerkom. Volgens die koerant The Sydney Morning Herald kan hulle toegang verkry tot “pornografiese foto’s van naakte kinders, orgieë, gedeeltes van video-opnames uit gekoppelde bordele, ’n ‘verklaring van regte’ vir mense wat met diere geslagsomgang wil hê—en inligting oor hoe om by ’n masturbasie-‘geselslyn’ aan te sluit”. Die artikel sê voorts: “Kenwoorde of bewys van ouderdom is nie vereis nie—net ’n gewone telefoonverbinding.” Deskundiges sê dat dit onmoontlik is om die netwerk te sensor “omdat die struktuur daarvan . . . deur die Amerikaanse Departement van Verdediging ontwerp is om deur ’n kernoorlog heen behoue te bly”. Die data is nie alles netjies op een plek nie, maar word op duisende databasisse regoor die wêreld gevind. Onlangs het ’n Sweedse navorser binne ’n week 5 651 boodskappe of inskrywings oor kinderpornografie in net vier gebruikersgroepe getel.
Priesters met probleme
“Vyftig persent van die priesters wat na my toe kom om vir sielkundige versteurings behandel te word, het probleme van ’n seksuele aard”, sê Valerio Albisetti, een van die bekendste Italiaanse Katolieke sielkundiges, volgens die koerant La Repubblica. Hierdie mans, wie se verpligte selibaat onlangs opnuut deur Johannes-Paulus II bevestig is, word hoofsaaklik deur seksuele begeerte en die behoefte aan vaderskap gefolter. Albisetti stel voor dat mans aangespoor word om die priesterskap te betree wanneer hulle van volwassener leeftyd is en dat die ouderdom vir toegang tot kweekskole verhoog word. Hy doen aan die hand dat “dit vir die geestesgesondheid en sielkundige ewewig van die toekomstige priester baie nadelig is” om gedurende sy adolessensie “binne strukture [te leef] wat deur die afwesigheid van vroue gekenmerk word”. Buiten probleme wat met seksualiteit verband hou, sê Albisetti dat “geestelikes dikwels aan depressie, obsessief-waansinnige versteurings en bulimie ly”.