Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g96 6/8 bl. 28-29
  • Ons beskou die wêreld

Video nie beskikbaar nie.

Jammer, die video kon nie laai nie.

  • Ons beskou die wêreld
  • Ontwaak!—1996
  • Onderhofies
  • Soortgelyke materiaal
  • Geweld raak selfs meer verdorwe
  • Ekstra werklas vir vrouens
  • Godsdiens op “kuberruimte”
  • ’n Uiters groot, uiters onwelriekende blom
  • ’n Italiaanse Lourdes?
  • Brasilië se “Heilige oorlog”
  • Eiemagtige teregstellings
  • Probleme met jong kondors
  • Moontlike verduideliking vir tonnelraaisel
  • Die wêreld se langste padtonnel
    Ontwaak!—2002
  • Het jy geweet?
    Die Wagtoring kondig Jehovah se Koninkryk aan—2009
  • Die wêreld se grootste blom
    Ontwaak!—2012
  • Die stryd om ’n tonnel
    Ontwaak!—1994
Sien nog
Ontwaak!—1996
g96 6/8 bl. 28-29

Ons beskou die wêreld

Geweld raak selfs meer verdorwe

Vir diegene wat meen dat sportgeleenthede soos bokswedstryde of verweerkunstoernooie nie gewelddadig genoeg is nie, het promotors in die Verenigde State met ’n nuwe alternatief vorendag gekom wat “uiterste gevegte” genoem word. Volgens ’n berig in The New York Times is die idee eenvoudig: “Twee mans slaan mekaar totdat een die handdoek ingooi of bewusteloos geslaan word.” Hulle dra nie handskoene om die houe te versag nie; daar is geen rondtes of blaaskanse nie; daar is min reëls behalwe dat hulle nie hulle vingers in mekaar se oë mag druk of mekaar mag byt nie. Die opponente gebruik tegnieke van boks, judo, karate, stoei of straatgevegte—met die gevolg dat die bloed dikwels vloei. Die gevegte word voor groot groepe bewonderaars gehou wat hulle onbeheers toejuig en tot $200 (R700) vir kaartjies betaal; die gevegte is ook gewild op kabel-TV en gehuurde videokassette. Baie state het egter reeds hierdie gevegte verbied.

Ekstra werklas vir vrouens

Verdeel mans en vrouens huiswerk gelykop? Nie volgens ’n opname wat deur die Duitse Federale Kantoor van Statistiek gemaak is nie. Ekonome Norbert Schwarz en Dieter Schäfer het 7200 huisgesinne gevra om die hoeveelheid tyd wat hulle aan huiswerk bestee te analiseer en aan te teken. Die opname het take ingesluit soos om die skottelgoed te was, inkopies te doen, na siek gesinslede om te sien en aan die motor te peuter. “Of hulle nou ’n sekulêre werk het of nie, vrouens bestee omtrent twee keer soveel tyd daaraan om onbetaalde werk te doen as mans”, berig die Süddeutsche Zeitung.

Godsdiens op “kuberruimte”

Diegene wat die rekenaar gebruik om die “kuberruimte”, netwerke van rekenaardatabasisse wat onderling verbind is, te ondersoek, het deesdae ’n wyer keuse wat godsdiens betref. Die World Wide Web het nou Die Maria-blad, waar weetgieriges antwoorde kan kry op die tien algemeenste vrae oor die Maagd Maria, soos waarom sy altyd in ligblou klere afgebeeld word. Die Amish, wat tegnologie soos elektrisiteit vermy, word verteenwoordig deur ’n program bekend as Vra die Amish. ’n Gedrukte bladsy vrae word na hulle deurgestuur, hulle antwoord in gewone skrif en die antwoorde word per rekenaar versend—deur ’n tussenpersoon. The Christian Century meld dat daar nou ’n “plek” op die Internet is wat Die Biegstoel genoem word, waar ’n digitale priester vra: “En waaroor wil jy bieg?” Die volgende reël gee ’n keuse van antwoorde. “Ek het die volgende sonde gepleeg: (Moord) (Owerspel) (Luiheid) (Wellus) (Gierigheid) (Bedrog) (Vraatsug) (Trots) (Woede) (Hebsug) (Misplaaste prioriteite).”

’n Uiters groot, uiters onwelriekende blom

Die grootste blom in die wêreld is inderdaad ’n vreemde skeppingswerk. Dit word ’n rafflesia genoem, is omtrent so groot soos ’n buswiel en neem net so lank om te blom as wat dit ’n mens neem om van bevrugting tot geboorte te groei. En die grootte van die blom is nie die enigste rede waarom hierdie blom ’n swak keuse vir ’n ruiker sal wees nie. Dit stink. Om vlieë te lok wat dit help bestuif, ruik die rafflesia soos verrotte vleis. In die verlede het die Maleise dorpsbewoners wat in die reënwoude woon waar die rafflesia groei dit die duiwel se bak genoem en dit stukkend gekap wanneer hulle dit teëgekom het. Volgens die South China Morning Post het die Maleise staatspark van Kinabalu egter stappe begin doen om die seldsame blom te beskerm sodat wetenskaplikes dit verder kan bestudeer. Plaaslike dorpsbewoners verdien nou ekstra geld deur toeriste die woud in te lei om die rafflesias af te neem. Die meeste bewaar ongetwyfeld ’n veilige afstand.

’n Italiaanse Lourdes?

In die Italiaanse stad Civitavecchia het ’n beeld van die Madonna glo onlangs trane van bloed gestort, wat daartoe gelei het dat tienduisende nuuskierige toeskouers en pelgrims daarheen gestroom het. Om hierdie rede het die burgemeester, Pietro Tidei, wat homself ’n ongelowige noem, saam met ’n Katolieke biskop na Frankryk gereis. Hulle het die beroemde dorp Lourdes besoek, wat welbekend is vir sy Katolieke heiligdom waarin “wonderwerke” na bewering plaasvind. Die besoek was nie ’n pelgrimstog nie. Die doel daarvan was eerder om die “ekonomiese wonderwerk” van Lourdes te ondersoek, blykbaar om idees te kry oor hoe om Civitavecchia te organiseer en te bestuur as ’n soortgelyk winsgewende Mekka vir toeriste en pelgrims.

Brasilië se “Heilige oorlog”

’n Pinksterpastoor in Brasilië het onlangs iets begin wat die nasionale pers ’n heilige oorlog noem. Op ’n nasionale TV-uitsending het die pastoor, Sergio von Helde, die beeldediens van die Katolieke Kerk veroordeel. Om sy argument te stel, het hy ’n keramiekbeeld vertoon van Onse Liewe Vrou van Aparecida, ’n swart weergawe van die Maagd Maria wat as beskermheilige vir Brasilië se 110 000 000 Katolieke dien. Von Helde het die beeld ’n “aaklige, aanstootlike pop” genoem terwyl hy dit herhaaldelik geslaan en geskop het. Duisende Katolieke het betoog en beelde van die beskermheilige deur die strate gedra. Skreeuende, klipgooiende skares het van die tempels van Von Helde se Pinkstersekte, wat die Universele Kerk van die Koninkryk van God genoem word, omsingel. Von Helde, wat sedertdien deur die hoof van hierdie kerk van sy pos onthef is, blameer die media omdat hulle die beeldmateriaal van sy aanval herhaaldelik uitgesaai het. “TV-Globo [die land se grootste televisienetwerk] het my in ’n monster omskep”, beweer die pastoor.

Eiemagtige teregstellings

In Suid-Afrika is ’n groep, wat daarvan verdink is dat hulle voertuigskakers is, deur ’n woedende skare van hulle huise af weggeneem, doodgekap en met verf bedek. Die koerant Saturday Star het gesê dat die toename in sulke voorvalle “’n simptoom van ’n gemeenskap [is] wat vertroue in sy polisie verloor het en wat met misdaad behep is sowel as histeries daaroor is”. Hoewel kriminoloë sulke gedrag nie vergoelik nie, beskou hulle die feit dat die slagoffers ná hulle vermoording geverf is as insiggewend. Dit is as ’n waarskuwing bedoel vir ander potensiële misdadigers. ’n Kriminoloog het gesê: “Alles dui daarop dat die situasie heeltemal buite beheer is en dat die publiek nie meer in staat is om die idee te verwerk dat hulle die teiken van misdadigers is nie.”

Probleme met jong kondors

Die Kaliforniese kondor—’n yslike aasvretende voël wat in hierdie eeu feitlik uitgesterf het—bied besondere uitdagings aan bewaringsgesindes wat probeer om kondors wat in gevangenskap geteel is in die natuur vry te laat. Die voëls, wat as jong voëls vrygelaat word, is “in hulle nuuskierige, tienderjarige, probeer-alles-fase”, sê ’n bewaringsgesinde wat in New Scientist aangehaal is. Die feit dat hulle geen vrees vir mense of kragdrade het nie, het baie hulle lewe of vryheid gekos. Bewaringsgesindes het dus met nuwe metodes vorendag gekom om kondorkuikens groot te maak. Hulle gebruik ligte skokke om die voël te leer om kragdrade te vermy. Om die kondor te leer om mense te vermy, sorg hulle dat hy hulle nie sien nie, behalwe nou en dan, wanneer verskeie mense skielik op die voël afstorm, hom vang en op sy rug teen die grond vasdruk. “Kondors kan dit nie verdra nie”, sê New Scientist, en gevolglik leer hulle om mense te vermy. Tot dusver is hierdie metodes redelik suksesvol.

Moontlike verduideliking vir tonnelraaisel

Argeoloë wonder lank reeds waarom Hiskia se tonnel, wat in die agtste eeu v.G.J. gegrawe is om water vir Jerusalem te verseker as die Assiriese leërmag dit sou beleër, so ’n onbeplande, kronkelende roete volg. Met ’n reguit, akkurater roete sou hulle net 320 meter moes grawe, in plaas van die 533 meter wat die tonnel vereis het. ’n Inskripsie, wat in antieke Hebreeus geskryf is, is in 1880 op die tonnelmuur gevind. Dit het verduidelik dat twee spanne werkers aan die teenoorgestelde punte van die tonnel, wat uit rots gekap is, begin het en in die middel ontmoet het. Dit het die bykomende vraag laat ontstaan oor hoe hulle daarin geslaag het, aangesien die tonnelroete so kronkel. Geoloë meen dat hulle nou die antwoord het. Volgens Dan Gill van die Geologiese Opname van Israel het die werkers natuurlike kanale gevolg en vergroot wat deur water gevorm is wat deur die rots gevloei het waar krake as gevolg van seismiese spanning ontstaan het of waar verskillende lae bymekaargekom het. Met verloop van tyd kon dit op sommige plekke nogal wyd geword het, wat dalk verduidelik waarom die tonnelhoogte van 1,7 meter tot 5 meter wissel en ook hoe die werkers, wat olielampe gebruik het, genoeg lug kon kry. Die werkers was ook baie vaardig, want die sukses van die tonnel het daarvan afgehang dat dit effens afdraand loop—’n geringe 31,75 sentimeter oor die hele lengte daarvan.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel