Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g97 1/8 bl. 21
  • Komeetbotsing!

Video nie beskikbaar nie.

Jammer, die video kon nie laai nie.

  • Komeetbotsing!
  • Ontwaak!—1997
  • Soortgelyke materiaal
  • Wat is anderkant die planete?
    Ontwaak!—1999
  • Waar kom verskietende sterre vandaan?
    Ontwaak!—1993
  • Asteroïdes, komete en die aarde—Stuur hulle op ’n botsing af?
    Ontwaak!—1999
  • Ons beskou die wêreld
    Ontwaak!—1994
Sien nog
Ontwaak!—1997
g97 1/8 bl. 21

Komeetbotsing!

IN Julie 1994 het sterrekykers regoor die wêreld ’n week lank met belangstelling gekyk hoe ongeveer 20 brokstukke van die komeet Shoemaker-Levy 9 teen die planeet Jupiter bots. Komeetkykers het hulle verwonder, aangesien die vertoning op die ou end, soos een sterrekundige dit gestel het, “die hemelskouspel van die eeu” was. Waarom het hierdie gebeurtenis die verwagtinge ver oortref?

Eerstens het die brokstukke van die komeet, wat teen ongeveer 200 000 kilometer per uur beweeg het, groot ontploffings veroorsaak waarop slegs die mees oordrewe voorspellings gedui het. Toe hulle Jupiter se atmosfeer binnegedring het, het dit flitse tot gevolg gehad wat net ’n paar sekondes geduur het. Daarna het superverhitte gasse uit die atmosfeer geskiet en ontsaglike vuurballe gevorm, en van die grootste ontploffings was ’n kort rukkie warmer as die oppervlaktemperatuur van die son! Gedurende die volgende 10 tot 20 minute het ’n groot kolom tot 3200 kilometer hoog gestyg.

Verder was die waarnemingstoestande bykans ideaal, hoewel daar aanvanklik gemeen is dat dit swak sou wees. Omdat die botsings aan die verdonkerde kant van Jupiter plaasgevind het, kon die helder flitse en kolomme makliker waargeneem word. In sommige gevalle kon ’n mens die bopunte van die kolomme bokant Jupiter se horison sien uitstyg, en weens Jupiter se rotasie kon mense binne tien minute ná die botsing die merke waar die planeet getref is van die aarde af sien. Ná ’n verdere tien minute het die merke in die sonlig gekom. Teen dié tyd het die kolomme verdwyn en was daar enorme, donker kolle in die plek daarvan. Hierdie kolle—die grootste was twee keer so groot soos die aarde—is nie deur sterrekundiges voorspel nie, en tog was dit uiteindelik die duidelikste tekens wat gesien kon word.

Die Galileo-ruimtetuig het direkte beelde van die botsings voorsien. Die Hubble-ruimteteleskoop wat om die aarde wentel, het die botsings in die golflengtes van sigbare en ultraviolet lig waargeneem. Ander sterrewagte het die reaksie van die komeetontploffings in verskeie golflengtes gemeet wat spesifiek gekies is om waardevolle inligting te voorsien. By die Suidpool het die son nie opgekom nie, en dit het voltydse waarneming moontlik gemaak deur die Suidpool se Explorer-infrarooiteleskoop.

Sterrekykers het iets seldsaams gesien. Wanneer sal die volgende komeetskouspel plaasvind? Die komeet Hale-Bopp, wat reeds met die blote oog gesien kan word, sal moontlik die helderste komeet wees wat ons hierdie eeu sien. Dit sal binne ’n afstand van 198 miljoen kilometer verby ons planeet beweeg. Komeetkykers in die Noordelike Halfrond sal gedurende April 1997 na Hale-Bopp kan kyk. Dit alles herinner ons daaraan dat ons in ’n dinamiese, veranderende heelal leef wat deur Jehovah, “die Vader van die hemelse ligte”, geskep is.—Jakobus 1:17; Psalm 115:16.

[Prent op bladsy 21]

Donker kolle toon waar komeetbrokstukke met Jupiter gebots het

[Erkenning]

Hubble Space Telescope Comet Team and NASA

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel