Beskerm jou gehoorsin!
’NONLANGSE opname onder 400 jongmense in Frankryk het aan die lig gebring dat 1 uit elke 5 van hulle aan gehoorverlies ly. ’n Soortgelyke studie ’n dekade vroeër het getoon dat net 1 uit elke 10 jongmense hieraan gely het. In reaksie op die opvallende toename in gehoorverlies onder jongmense het die Franse Nasionale Vergadering verlede jaar daarvoor gestem dat die klanksterkte van persoonlike stereospelers tot 100 desibel beperk word.
Die hoë klanksterktes wat van oorfone van persoonlike stereospelers uitgaan, is grootliks verantwoordelik vir die gehoorverlies. Die oorchirurg Jean-Pierre Cave sê dat klanksterktes bo 100 desibel ná ’n paar uur blywende skade kan veroorsaak. Wanneer die klanksterkte bo 115 desibel is, kan sulke skade binne minute aangerig word. FNAC, ’n toonaangewende Franse handelaar in elektroniese ware, sê dat die meeste van sy persoonlike stereospelers meer as 100 desibel lewer. Party persoonlike stereospelers kan 126 desibel lewer, wat 400 keer meer klanksterkte as 100 desibel is!
Volgens die Franse gehoorspesialis Christian Meyer-Bisch is dit moontlik dat selfs meer jongmense deur rockkonserte as deur persoonlike stereospelers benadeel word. Trouens, gereelde bywoners van rockkonserte het in groot mate gehoorverlies ondervind in vergelyking met gesonde 18-jariges. Dit is geen wonder dat Jean-François Mattei, ’n verteenwoordiger van die Franse Nasionale Vergadering, gewaarsku het nie: “Ons maak ’n geslag dowe mense groot.”
As jy dus jou gehoorsin wil beskerm, hou die klanksterkte dop!