Van ons lesers

Slangbyte As ’n beroepsherpetoloog is ek daarvoor verantwoordelik om slange te versorg en te hanteer sowel as om hulle vir hulle gif te melk. Die artikels “Wil jy graag ’n kobra ontmoet?” (22 Maart 1996), “Habu—’n Slang wat met ontsag behandel moet word” (8 Julie 1996) en “Gevaar! Ek is giftig” (22 Augustus 1996) het almal van ’n positiewe gesindheid teenoor Jehovah se skepping getuig. Ek wil nietemin daarop wys dat toernikette nie vir slangbyte aanbeveel word nie. Die meeste mense kan dit nie reg aansit nie, en party het as gevolg daarvan ledemate verloor. Ek beveel ten sterkste aan dat ’n drukverband gebruik word om die hele ledemaat te verbind met dieselfde druk wat gebruik word om ’n verstuite enkel of gewrig toe te draai. Terwyl die gif in die omgewing van die gebyte ledemaat gehou word, word die bloedtoevoer nie afgesny nie, sodat die ledemaat “lewend” bly.

P. R., Engeland

’n Hele paar van die jongste mediese handboeke stem hiermee saam, en ons bedank ons leser vir hierdie verduideliking.—RED.

Die raaf Ek was siek toe die artikel “Die raaf—Wat maak hom anders?” (8 Januarie 1997) verskyn het. Feitlik niks kon my laat glimlag nie. Maar die vindingrykheid van die raaf het my laat lag. Later het ek ’n skooltaak oor voëls gedoen en inligting uit Ontwaak!-artikels gebruik. Ek het baie hoë punte daarvoor gekry!

J. B., Slowakye

Leergestremdhede Dankie vir die reeks “Hulp vir kinders met leergestremdhede” (22 Februarie 1997). Ek bestuur ’n privaat skool en het afskrifte vir my onderwysers gemaak. Ek het ook nuusbriewe op die inligting in julle tydskrif gegrond. Dankie vir die gebalanseerde manier waarop julle hierdie onderwerpe behandel.

E. G., Honduras

Ek is die besturende direkteur van die grootste nasionale organisasie sonder winsoogmerk wat hom daarvoor beywer om kinders en volwassenes met ATS te help. Julle verdien lof vir julle weldeurdagte artikels oor aandagtekortsteurnis met hiperaktiwiteit (ATSH) en aandagtekortsteurnis (ATS). Hierdie steurnisse is beperkend en word dikwels verkeerd verstaan. Ons waardeer julle erkenning van die feit dat baie mense wat hulp soek nou by ’n behoorlike diagnose en beproefde vorme van behandeling baat vind. Julle beklemtoning van ouerliefde en begrip stuur ook ’n belangrike boodskap uit.

L. R., Verenigde State

Ek het ’n seun met ATSH, en dit was vir my baie moeilik om te aanvaar dat hy nie net ’n molesmaker is nie. Talle onvriendelike dinge is al gesê, soos: “Waarom dissiplineer hulle hom nie?” Hierdie aanmerkings maak baie seer omdat ek al baie tyd daaraan bestee het om hom te probeer dissiplineer. Ek hoop julle verduideliking van hierdie steurnis sal ander help besef dat daar werklik ’n probleem bestaan en dat ander meer aanmoedigend kan wees.

M. T., Verenigde State

Julle kan julle net voorstel hoe ons, as ouers van ’n kind met leergestremdheid, hierdie nommer geniet het. Ons waardeer veral die feit dat julle meld hoe dit die ouers raak en dat ons ’n groot genoeg las dra sonder dat ons snydende aanmerkings van ander hoef te hoor.

J. C. en B. C., Kanada

God se vriend Baie dankie vir die artikel “Jongmense vra . . . Hoe kan ek ’n vriend van God word?” (22 Februarie 1997). Dit het my baie gehelp. Nou voel ek tevrede, want nou verstaan ek dat Jehovah my vriend is! Ek kan nie wag vir die artikel oor hoe om hierdie vriendskap te behou nie.a

T. E., Italië

[Voetnoot]