Plantvariëteite verdwyn—Waarom?
IN China is bykans 10 000 koringvariëteite in 1949 verbou. Maar teen die sewentigerjare was slegs 1000 nog in gebruik. In die Verenigde State het omtrent 86 persent van die 7098 appelvariëteite wat volgens berig tussen 1804 en 1904 gebruik is, verdwyn. Daarbenewens “bestaan 95 persent van die kool-, 91 persent van die mielie-, 94 persent van die ertjie- en 81 persent van die tamatievariëteite blykbaar nie meer nie”, aldus die Report on the State of the World’s Plant Genetic Resources for Food and Agriculture. Soortgelyke statistiek word berig in lande regoor die wêreld. Waarom die skielike afname? Party sê dat ’n hoofoorsaak die uitbreiding van moderne handelslandbou is en die gevolglike afname in klein familieboerderye, wat daartoe gelei het dat die tradisionele, hoogs uiteenlopende variëteite van gewasse uitgesterf het.
Die verlies van plantvariëteite kan die kanse dat gewasse sal misluk al hoe groter maak. Dink byvoorbeeld aan Ierland se groot aartappeltekort van 1845-49, waartydens sowat 750 000 mense van honger gesterf het toe ’n plantsiekte die grootste deel van die aartappeloes uitgewis het. Wat was die biologiese oorsaak van hierdie ramp? “Genetiese eenvormigheid”, sê ’n verslag van die Verenigde Nasies.
Meer as 1000 genebanke is gedurende die sewentiger- en tagtigerjare regoor die wêreld opgerig om genetiese bronne van plante te versamel en te bewaar. Maar ’n aantal van hierdie genebanke is vinnig aan die agteruitgaan, en party het reeds toegemaak. Na wat berig word, het net ongeveer 30 lande nou fasiliteite wat geskik is vir die veilige langtermynberging en -bewaring van plantsade.
Die Bybel beloof dat Jehovah onder Christus se Koninkryksheerskappy beslis ‘vir al die volke ’n maaltyd van vetspyse, ’n maaltyd van ou wyn, van vetspyse vol murg, sal berei’ (Jesaja 25:6). Hoe dankbaar kan ons tog wees dat Jehovah God, “wat voedsel gee aan alle vlees” en die Skepper van die genetiese verskeidenheid is, in al die mens se voedselbehoeftes sal voorsien!—Psalm 136:25; Genesis 1:29.