Bedreigde orgideë?

Orgideë pas hulle oral aan. Hulle kan in grond, op bome, selfs op rotse groei. Maar die Internasionale Unie vir die Bewaring van die Natuur en Natuurlike Hulpbronne (IUCN) waarsku dat baie variëteite van hierdie asemrowende plante moontlik nie in die natuur sal bly voortbestaan as daar voortgegaan word om hulle omgewing te versteur nie. “Veranderinge in habitats beteken dat insekte wat noodsaaklik vir bestuiwing is, uitsterf of êrens anders heen trek”, sê Wendi Strahm van die IUCN. “Wanneer dít gebeur”, voeg sy by, “kan die orgidee nie voortplant nie.”

Volgens skatting word 20 persent van die vyfmiljoen orgideë wat elke jaar wêreldwyd verkoop word uit hulle natuurlike omgewing verwyder. Dit, sê die IUCN, dwarsboom die bewaring van hierdie pragtige plant. Die IUCN stel dus voor dat diegene wat orgideë wil hê eerder dié moet koop wat in kweekhuise gekweek is as om hulle uit hulle natuurlike omgewing te verwyder.

Daar is ten minste 20 000 bekende soorte orgideë. Sommige is plante wat maar net ’n halwe sentimeter hoog is; ander is rankplante wat tot 30 meter lank kan word. Die meeste soorte orgideë floreer in warm, tropiese gebiede met ’n hoë reënval. Maar vir hulle oorlewing maak hulle op die delikate balans in die natuur staat.

Weens die mens se onkunde en onverskilligheid word die omgewing ongelukkig nog steeds beskadig, en dit bedreig al hoe meer plante, met inbegrip van die orgidee. Maar nie meer lank nie. In die nuwe wêreld wat God beloof het, sal die mens in harmonie met die natuur leef. Dan sal die volgende woorde van die psalmis vervul wees: “Laat die veld juig en al wat daarin is; dan sal al die bome van die bos jubel.”—Psalm 96:12.

[Foto-erkenning op bladsy 31]

Jardinería Juan Bourguignon

[Foto-erkenning op bladsy 31]

Jardinería Juan Bourguignon