Ons beskou die wêreld
Kindermishandeling algemeen
“’n Nuwe [Amerikaanse] studie oor die gesondheid van adolessente seuns het bevind dat meer as 1 uit 8 hoërskoolseuns sê hulle is fisies of seksueel mishandel”, berig The New York Times. Die studie het bevind dat “die fisiese mishandeling van seuns baie algemener as seksuele mishandeling was en dat twee derdes van die fisiese mishandeling deur ’n gesinslid was en in die huis plaasgevind het”. Asiaties-Amerikaanse seuns het in die meeste gevalle genoem dat hulle seksueel mishandel is, met 9 persent wat sê dat hulle mishandel is. Sewe persent van die Spaans-Amerikaanse seuns het gesê dat hulle seksueel mishandel is, terwyl 3 persent van die swartes en blankes gesê het dat hulle seksueel mishandel is. Die vraelys het nie mishandeling gedefinieer nie. Dit het bloot gevra of die respondent al ooit fisies of seksueel mishandel is.
Die “oudste voorouer”?
Biskoppe van regoor Asië het onlangs in die Vatikaanstad bymekaargekom om maniere te bespreek om Katolisisme na lande in Asië uit te dra. “In die meeste lande in Asië is die Christelike geloof ’n Westerse godsdiens wat saam met die koloniserende magte gekom het”, sê monseigneur Oswald Gomis van Sri Lanka. Die uitdaging is dus om “Jesus in Asiatiese terme voor te stel”, berig Associated Press. “Die biskoppe het daaroor gepraat om die Roomse kerk by plaaslike gebruike en tale aan te pas en omgekeerd.” Een voorbeeld wat gegee is, is die beoefening van vooroueraanbidding. Om deur diegene aanvaar te word wat hierdie ou gebruik beoefen, het monseigneur John Tong Hon van Hongkong voorgestel dat Katolieke geleidelik die konsep van die “Christelike” god as die “oudste voorouer” invoer.
’n Robotdokter
Twee chirurge van ’n hospitaal in Parys het die eerste suksesvolle opehartoperasie uitgevoer met behulp van ’n rekenaarbeheerde robot, berig die Franse koerant Le Figaro. Ses operasies is uitgevoer, onder andere ’n hartomleiding. Hierdie metode behels dat die operasie deur ’n insnyding van vier sentimeter gedoen word. Die chirurge het by ’n beheerpaneel etlike meter van die pasiënt af gesit en kon met behulp van ’n kamera binne-in die pasiënt se liggaam kyk en met twee beheerstokke die robot se arms beweeg. Omdat die rekenaar die chirurge se bewegings drie tot vyf keer verminder, is die operasie presieser en is die insnyding nie so groot nie. Nog ’n voordeel is dat die pasiënt minder pyn gedurende die herstelproses ondervind.
Noodlottige verkeersongelukke neem toe
Elke jaar sterf meer as 500 000 mense op die wêreld se snelweë, en wêreldwyd neem noodlottige verkeersongelukke toe, berig Fleet Maintenance & Safety Report. Wat is die moontlikheid dat jy by ’n ernstige verkeersongeluk betrokke gaan wees? “Ten minste 1 uit 20 persone sterf of word elke jaar in snelwegongelukke beseer in lande waar daar baie motors is, en 1 uit 2 persone beland ten minste een keer in hulle lewe in die hospitaal weens ’n besering wat in ’n verkeersongeluk opgedoen is”, aldus die verslag.
Onhigiëniese oppervlakke
Dit klink miskien onwaarskynlik, maar die toiletsitplek in jou huis is dalk meer higiënies as die kerfplank in jou kombuis. Dit is die gevolgtrekking waartoe navorsers van die Universiteit van Arizona gekom het nadat hulle 30 weke lank die bakterieë in 15 huise gemonitor het. Die span het monsters geneem van 14 plekke in elke huis, waaronder kraanhandvatsels, die oppervlak om opwasbakke, kerfplanke, vadoeke en toiletsitplekke. Wat was hulle bevindinge? “Navorsers het ’n miljoen keer meer bakterieë in die vloeistof gekry wat uit vadoeke gewring is as wat daar op toiletsitplekke is”, sê die tydskrif New Scientist. “Selfs snyplanke het drie keer meer bakterieë gehad.” ’n Woordvoerder vir die studie, Pat Rusin, se teorie is dat “toiletsitplekke eenvoudig te droog is om ’n florerende bakteriebevolking te onderhou, aangesien hulle geneig is om vogtige omgewings te verkies”, berig die tydskrif. Om higiëne te verbeter, beveel Rusin aan dat vadoeke weekliks gewas moet word. “Voeg eenvoudig een koppie bleikmiddel by ’n opwasbak vol water, gooi die vadoeke daarin en laat dit 10 minute lank week voordat jy die water laat uitloop”, sê sy.
Verminder die risiko van nierstene
Navorsers wat tussen 1986 en 1994 die diëte van meer as 80 000 verpleegsters in die Verenigde State gemonitor het, het gevind dat party vloeistowwe meer sal help om nierstene te voorkom as ander, berig Science News. Van die 17 drankies wat bestudeer is, het tee die risiko van nierstene met 8 persent verminder, terwyl gewone of kafeïenvrye koffie die risiko met omtrent 9 persent verminder het. Die matige inname van wyn het die risiko van nierstene met 20 persent of meer help verminder. “Dit is verbasend dat ’n 8-ons-glas [240 ml] pomelosap elke dag die risiko van nierstene met 44 persent verhoog het”, het die studie getoon. “Geen ander vloeistof het so ’n negatiewe uitwerking gehad nie.” Dr. Gary Curhan, ’n nierkundige en epidemioloog in Boston het volgens berig gesê: “As die vloeistofinname gewysig word, kan dit ’n verskil maak”, maar net as dit deel uitmaak van ’n algehele behandelingsprogram.
Die betekenis van Paasfees in Australië
Die koerant Sun-Herald in Australië het ’n meningsopname gedoen waarin mense gevra is wat Paasfees vir hulle beteken. Die uitslag wat vrygestel is, was in hierdie volgorde: paaseiers van sjokolade (54 persent), ’n langnaweek (39 persent), die Koninklike Paasskou (21 persent), ’n godsdienstige geleentheid (20 persent). David Milikan, ’n predikant van die Verenigende Kerk, het gesê dat hy nie verbaas is dat so min mense in Sydney Paasfees met godsdiens assosieer nie. Hy het bygevoeg: “Die kerke is besig om te sterf . . . Al die hoofstroomkerke ondervind ’n skerp afname in getalle.” Sydney se Rooms-Katolieke aartsbiskop het dié feit betreur en gesê: “Vir baie het Paasfees hoegenaamd geen godsdienstige betekenis nie; dit is net nog ’n sekulêre fees.”
Pornografie vir vroue
“Vroue is stadig besig om die gaping tussen hulle en mans te verklein wat hulle belangstelling in seksueel eksplisiete materiaal op rekenaar betref”, berig The New York Times. Talle ander webblaaie vir vroue kombineer “minder eksplisiete pornografiese prente . . . en inkopies”. Ná een blad wat spesifiek bedoel is vir heteroseksuele vroue begin is, het die Times gesê dat “die blad net nog ’n druppel in die diep put van seksueel eksplisiete materiaal is wat onder die oppervlak van die hoofstroominternetwêreld bestaan”.
Inkopieverslawing
“Al hoe meer mense in Duitsland ly aan kompulsiewe kopery”, berig die koerant Grafschafter Nachrichten. Volgens die bedryfsielkundige Alfred Gebert kry kompulsiewe kopers ’n gevoel van behaaglikheid wat gou verdwyn ná hulle vir die goedere betaal het. Hulle het selfs fisiese onttrekkingsimptome, sê Gebert. “Hulle bewe, sweet en kry maagkrampe.” Gevolglik is mense wat baie geld verdien en goeie kredietfasiliteite het in groter gevaar as arm mense. Moontlike oorsake vir die verslawing sluit glo ‘eensaamheid, swak selfbeeld, stres en probleme by die werk’ in. Om teen die kompulsiewe gedrag te help stry, beveel Gebert aan dat ’n mens ’n stokperdjie beoefen. Sosiale kontak is veral belangrik, sê Gebert. “Sonder hulp van buite word die verslawing net herken wanneer die skuldval toeklap en die laaste krediet opgebruik is”, sê hy.
Spioenering op kinders
Party ouers in Japan het privaat speurders begin huur om op hulle kinders te spioeneer om hulle teen bullebakke by die skool te beskerm. Volgens The Daily Yomiuri het ’n professor van die Universiteit van Osaka wat ’n opname onder meer as 6 000 leerlinge gedoen het, gesê: “Kinders wat afgeknou word, is gewoonlik geneig om dié feit vir hulle gesin te verberg omdat hulle bang is dat daar min van hulle gedink sal word as hulle nie terugbaklei of dit keer nie.” Party ouers wat vermoed dat hulle kinders afgeknou word, het elektroniese afluistertoestelle op hulle versteek sodat hulle na hulle gesprekke kan luister. Ander het privaat speurders gehuur om “die kind van ’n veilige afstand dop te hou, getuienis teen afknouers te versamel en soos beskermengele in te gryp om ’n kind te red wie se lewe in gevaar is”. Maar kampvegters vir kinders, sê die koerant, “veroordeel ouerlike spioenering as ’n verskriklike stap wat die einste jongmense wat juis hulle vertroue in ’n volwassene moet stel waarskynlik nog verder van hulle gaan vervreem”. Ouers sê egter dat dit ’n manier is om hulle kinders wat probleme het te help wanneer daar nie meer kommunikasie tussen hulle is nie.