‘Stede wat uit hulle nate bars’

“Mense trek rond soos nog nooit tevore nie, en die meeste mense wat hulle tuiste verlaat op soek na ’n beter lewe, trek stad toe.”

DIT is wat die publikasie Foreign Affairs gesê het in die inleiding tot ’n artikel met die titel “Die stede van die ontwikkelende wêreld bars uit hulle nate”. Volgens daardie artikel is baie mense “deur die blink liggies gelok, of uit die platteland gedryf deur politieke en ekonomiese probleme, bevolkingsdruk en ekologiese agteruitgang”.

Presies hoe vinnig groei stede? Party skat dat mense na die stede stroom teen die ongelooflike tempo van meer as ’n miljoen per week! In ontwikkelende lande is daar nou meer as 200 stede met ’n bevolking van meer as ’n miljoen. Daar is al 20 met meer as tienmiljoen inwoners! En geen afname is in sig nie. Neem byvoorbeeld die stad Lagos, in Nigerië. Volgens ’n verslag deur die Worldwatch-instituut “sal Lagos teen 2015 moontlik die tuiste van byna 25 miljoen mense wees, wat beteken dat dit van die wêreld se dertiende groot-ste stad tot die derde grootste sal groei”.

Baie kenners meen dat dit niks goeds vir die toekoms voorspel nie. Federico Mayor, die voormalige direkteur-generaal van die Verenigde Nasies se Organisasie vir Onderwys, Wetenskap en Kultuur, waarsku dat daar teen die jaar 2035 “nog driemiljard mense in die huidige stedelike nedersettings sal woon”. Om na hierdie enorme bevolking om te sien, “sal ons in die volgende veertig jaar duisend stede met driemiljoen inwoners elk moet bou, oftewel vyf-en-twintig per jaar”.

Kenners sê ook dat snelgroeiende stedelike bevolkings ’n vernietigende uitwerking op stede regoor die wêreld het. En dit sluit stede in die welvarende nywerheidswêreld in. Voor watter spesifieke probleme kom stede te staan, en watter invloed kan dit op jou hê? Is daar enige oplossings in sig? Die volgende artikels sal hierdie belangrike kwessies ondersoek.