Die mens teen die natuur

“Vandag is dit mense wat verantwoordelikheid moet aanvaar vir die toenemende tempo waarteen spesies uitsterf.”—JANE GOODALL, BEWARINGSGESINDE.

LEWE op aarde is dinamies en onderling verbind. Die mens is ’n wesenlike deel daarvan. Ons is afhanklik van die lewende wêreld vir ons voedsel en geneesmiddels, die suurstof wat ons inasem en die elemente waaruit ons liggaam bestaan. In die loop van ’n normale dag maak die aarde se mensebevolking van meer as 40 000 ander lewende spesies gebruik. Saam vorm al die aarde se spesies ’n komplekse, verbasende en fyn verweefde web van die lewe.

Maar baie deskundiges wat hierdie komplekse web bestudeer, meen dat dit beskadig word! Jy het moontlik al gehoor van bedreigde renosters, tiers, pandas en walvisse. Volgens sommige wetenskaplikes kan 50 persent van alle plant- en diersoorte binne 75 jaar van die aarde af verdwyn. Navorsers vrees dat party spesies 10 000 keer vinniger kan verdwyn as wat wetenskaplikes die natuurlike uitsterwingstempo’s noem. Een deskundige skat dat spesies teen die gemiddelde tempo van een elke 10 tot 20 minute uitsterf.

Wetenskaplikes meen dat spesies in die verre verlede hoofsaaklik weens natuurlike oorsake uitgesterf het. Maar hulle sê dat die hoofoorsaak van die huidige krisis anders is. Vandag word die uitwissing van spesies blykbaar deur menslike bedrywighede veroorsaak. Een wetenskaplike het die mens die “uitroeispesie” genoem.

Is menslike bedrywighede werklik die oorsaak van hierdie geweldige verlies aan biologiese diversiteit? Indien wel, hoe? Kan ons sonder die groot verskeidenheid van lewe op aarde voortbestaan? Word enigiets gedoen om ’n einde te maak aan wat baie meen ’n uitsterwingskrisis in die lewende wêreld is?

[Foto-erkennings op bladsy 3]

WHO

NOAA