Spesies wat met uitwissing bedreig word
Deur Ontwaak!-medewerker in Italië
Die Rooi Lys van Bedreigde Spesies, wat vrygestel word deur die Wêreldbewaringsunie (IUCN), met hulle hoofkantoor in Gland, Switserland, is ’n aanduiding van die toestand van die wêreld se plante en diere. Daar is meer as 15 500 spesies op die Rooi Lys vir 2004.
Een van die grootste gevare vir bedreigde spesies is menslike bedrywighede. In plaas daarvan dat die mens die delikate balans van die natuur bewaar, wat onontbeerlik is vir sy eie oorlewing, versteur hy dit steeds deur voort te gaan met bedrywighede wat uiters gevaarlik is vir ander spesies. Ongelukkig gaan baie spesies as gevolg hiervan verlore, en daarmee saam natuurlike hulpbronne wat dalk van onskatbare waarde kon gewees het.
Een van die diere op verlede jaar se Rooi Lys was die gewone dolfyn, wat in die foto hieronder gesien kan word. Oor die afgelope 30 tot 45 jaar het hulle getalle in die Middellandse See met meer as 50 persent afgeneem, en hulle word nou as ’n bedreigde spesie beskou. Volgens die IUCN was van die bydraende faktore “’n vermindering van die dolfyn se prooi in die Middellandse See weens ’n kombinasie van omgewingsveranderinge, oorbevissing en habitatagteruitgang”. Daar word ook vermoed dat hoë vlakke van mensgemaakte gifstowwe wat in Mediterreense dolfyne gevind word, “hulle immuunstelsel onderdruk en hulle voortplantingsvermoë aantas”.
Die Skepper sal nie die roekelose en selfsugtige optrede van dié wat vernietiging saai, vir altyd duld nie. Inteendeel, Bybelprofesieë dui daarop dat “die vasgestelde tyd” nader kom wanneer hy “die verderwers van die aarde [sal] verderf”. Jehovah God sal dan weer toestande skep waarin mense bevoegde bewaarders van “al die diere” is en van ‘al die plante wat op die oppervlak van die aarde is’.—Openbaring 11:18; Genesis 1:28-30.
[Prent op bladsy 18]
Gewone dolfyne
[Erkenning]
© Goran Ehlme/SeaPics.com
[Prent op bladsy 18]
Die malmokalbatros is ook op die lys van bedreigde spesies