Van ons lesers

Grootouers Ek het nou net die artikel “Jongmense vra . . . Hoe kan ek nader aan my grootouers kom?” (22 Mei 2001) klaar gelees. My ouers moedig my al lank aan om ’n verhouding met my grootouers op te bou, maar omdat daar nog altyd ’n vete tussen my ouers en my grootouers aan my ma se kant was, het ek altyd gevoel dat ek nie eintlik met hulle moet praat nie. Hierdie artikel het my help besef dat Jehovah wil hê dat ek ’n verhouding met hulle moet hê. In plaas van kant te kies, sal ek doen wat Jehovah sê.

C.L.M., Verenigde State

Die artikels oor grootouers was werklik wonderlik! Ek is so bly dat julle gepraat het van briewe skryf. Selfs van ons ‘jongeres’—ek is 36 jaar oud—hou elke brief of kaartjie wat ons ontvang. Dit is so spesiaal om iets anders buiten rekeninge en gemorspos te kry!

M. Q., Verenigde State

Ek wil vir julle dankie sê vir die artikels oor grootouers in die nommers van 22 April en 22 Mei 2001. Hoewel my ouma ver van ons af woon, het ek ’n liefdevolle verhouding met haar. Dit is net soos die voorbeelde wat julle in die artikels genoem het. Sy is een van Jehovah se Getuies en is vir my ’n groot bron van geestelike kennis. Soms berei ons saam voor vir Christelike vergaderinge. My liefde vir Jehovah neem toe elke keer wanneer ek sien hoe sy hom ywerig dien. Hierdie artikels help my om hierdie spesiale verhouding te behou. Baie dankie!

G. M., Joego-Slawië

Ek het ’n vraag. My oupa is baie siek, en my ouma het nie baie geld nie. Hoe kan ek nader aan hulle kom as ek nie saam met hulle kan uitgaan nie?

T. O., Verenigde State

“Ontwaak!” antwoord: As jou grootouers naby julle woon, kan jy hulle dalk besoek of van tyd tot tyd met hulle oor die telefoon gesels. Jy kan miskien selfs dink aan takies wat jy vir hulle kan doen. Soos die artikel gesê het, kan jy ook nader aan jou grootouers kom deur briewe te skryf. In elk geval, jou grootouers sal ongetwyfeld enige kontak waardeer wat jy met hulle kan hê.

Telefone Ek werk in die fisikadepartement van ’n groot opvoedkundige instelling en het dus julle artikel “Hoe word jy telefonies verbind?” (22 Mei 2001) waardeer. Dit is duidelik geskryf, en hopelik sal diegene wat dink dat fisika te moeilik is om te verstaan, dit interessant vind.

S. T., Brittanje

Dankie vir die artikel “Hoe word jy telefonies verbind?” Dit is iets waaroor ek al dikwels gewonder het. Ek is ’n hoërskoolleerling, en ek geniet dit baie om die Ontwaak! te lees. Hierdie tydige publikasie het my al baie met my skooltake gehelp. Dankie vir julle harde werk!

H. W., Verenigde State

Die telegraafkabel wat in 1866 oor die Atlantiese Oseaan gelê is, was nie die eerste een nie. Die eerste een is in 1858 tussen Ierland en Newfoundland gelê. Dit is vergete omdat dit nie lank gewerk het nie.

L. D., Brittanje

“Ontwaak!” antwoord: Ons artikel het eenvoudig gesê: “’n ‘Telegraafkabel’ is in 1866 oor die Atlantiese Oseaan tussen Ierland en Newfoundland gelê.” Soos jy gesê het, is die eerste een in 1858 voltooi. Maar dit was binne ’n paar weke buite werking en is dus nie meer gebruik nie.