Heuning—’n soet geneser

PARTY mediese navorsers is opgewonde oor die kragtige antiseptiese en anti-inflammatoriese eienskappe van heuning. Die Kanadese koerant The Globe and Mail sê: “In teenstelling met die arsenaal gesofistikeerde antibiotika wat teen ’n muur van antibiotikabestande superkieme vasgeloop het, kan heuning ten minste teen sommige van hulle ’n stryd voer wanneer dit by besmette wonde kom.”

Wat in heuning laat dit genesing aanhelp? Die antwoord het te doen met die werkerby wat nektar van blomme versamel. Die by se speeksel bevat glukoseoksidase, ’n belangrike ensiem wat die glukose in die nektar afbreek. ’n Neweproduk van hierdie proses is waterstofperoksied, wat tradisioneel gebruik word om wonde skoon te maak en te ontsmet. Wanneer waterstofperoksied op ’n wond geplaas word, is die uitwerking gewoonlik van korte duur; maar met heuning werk dit anders. “Wanneer die heuning op ’n wond is, word dit ietwat verdun deur die liggaamsvloeistowwe, en dit verminder die natuurlike suurgehalte van die heuning”, sê die Globe-verslag. In die laer suurheidsgraad van hierdie omgewing word die ensiem aktief. Die suiker in die heuning word geleidelik afgebreek. Hierdie proses stel waterstofperoksied stadig vry in hoeveelhede wat groot genoeg is om bakterieë daar dood te maak, sonder om die omliggende gesonde weefsel te beskadig.

Volgens die Globe het heuning verskeie eienskappe wat die genesing van wonde kan aanhelp. “’n Dun lagie heuning voorsien ’n vogtige omgewing wat die vel beskerm en voorkom dat ’n harde roof vorm. Heuning stimuleer die groei en vorming van nuwe haarbloedvate en aktiveer die selle wat nuwe vel laat groei.” Daarbenewens het anti-oksidante in die heuning ’n anti-inflammatoriese werking wat help “om swelling te verminder, bloedsomloop te verbeter en keer dat die wond ‘loop’”.

“Heuning is egter nie vir almal nie”, waarsku die verslag. Daar word geskat dat spore van botulisme in tot 5 persent van heuning teenwoordig is. Agentskappe soos Health Canada se Botulisme-navorsingsdiens sowel as pediatriese verenigings sê dat dit nie raadsaam is om heuning vir kinders jonger as een jaar te gee nie, omdat “kindertjies nog nie genoeg mikroflora in die ingewande ontwikkel het om hulle teen die bakterieë te beskerm nie”.