Van ons lesers
Onderwysers Ek is die afgelope vier jaar ’n laerskoolonderwyseres, en ek het die reeks “Onderwysers—Wat sou ons sonder hulle gedoen het?” (8 Maart 2002) terdeë geniet. Een kommerwekkende neiging wat ek waarneem, is dat kinders nie tussen reg en verkeerd kan onderskei nie. Dit is ook ’n uitdaging wanneer kinders hulle regte ten volle voorstaan voordat hulle bewus is van hulle verantwoordelikhede. Die onderwys is nietemin ’n lonende beroep, veral wanneer leerlinge gemotiveerd is en vooruitgang maak.
J. K., Verenigde State
Dankie vir hierdie artikels. Dit het my gehelp om te verstaan hoeveel opofferings onderwysers vir ons maak, hoewel ons dikwels nie dieselfde vir hulle doen nie.
S. M., Italië
Ek is agt jaar oud. Julle artikels oor onderwysers het my gehelp om te sien dat onderwysers die leerlinge liefhet. Hulle geniet dit om kinders te leer selfs wanneer dit moeilik is. Ek het vir my onderwyseres ’n dankiesêbriefie gegee. Ek en my vierjarige sussie word geleer om ander mense van Jehovah te vertel—selfs al is dit soms moeilik—omdat ons lief is vir mense.
T. M., Verenigde State
Vier jaar nadat ek die onderwys verlaat het, het ’n leerling vir my geskryf en haar waardering uitgespreek vir die tye wat ek haar gehelp het. Sy het ’n boekmerk daarby ingesluit wat sy self gemaak het. Julle kan julle voorstel hoe bly ek was om daardie brief te ontvang!
A. R., Slowenië
Ek het hierdie tydskrif vir die hoof en twee onderwyseresse by my kinders se skool gegee. Ek het twee dae later teruggegaan om te hoor wat hulle daarvan dink. Hulle het nog 20 tydskrifte in Spaans en Engels gevra om vir ouers te gee.
M. M., Verenigde State
Verlede jaar het ek vier maande lank as ’n laerskoolonderwyser gewerk. Ander onderwysers met wie ek gewerk het, het gesê dat ouers se gebrek aan waardering hulle werk as onderwysers moeilik gemaak het. Ek was dus baie bly dat hierdie reeks die werk van toegewyde onderwysers so hoog aangeskryf het. Aan die einde van my termyn het ek baie dankiesêbriefies van my leerlinge ontvang. Elkeen is kosbaar vir my!
S. I., Japan
Ballonvaart Baie dankie vir julle wonderlike artikel “Sweef saam met die wind” (8 Maart 2002). Ek droom al lank daarvan om in ’n lugballon te vlieg. Maar julle artikel het opgemaak vir die feit dat ek nog nooit in een gevlieg het nie, omdat dit werklik gevoel het of ek self in ’n ballon was! Ek kon in werklikheid “voel” hoe die mandjie opstyg en van kant tot kant swaai. Alles moet seker so klein lyk van daarbo, en tog is die aarde en die mensdom belangrik vir Jehovah.
S. A., Duitsland
Skuldgevoelens Ek het die artikel “Die Bybelse beskouing: Skuldgevoelens—Is dit altyd ongewens?” (8 Maart 2002) regtig nodig gehad. Omdat my verwagtinge te hoog was, het ek dit moeilik gevind om my emosies te beheers in die manier waarop ek my maat in die voltydse evangelisasiewerk behandel. Maar hierdie artikel het getoon dat dit liefdeloos en teenproduktief is om ander gedurigdeur skuldig te laat voel as hulle nie altyd dinge doen soos ons dink dit gedoen behoort te word nie. Ek is bly dat ek my beskouing kon aanpas. Hou asseblief aan om ons Jehovah se siening van dinge te leer.
K. K., Japan