Van ons lesers

Vullis Baie dankie vir die tydige voorbladreeks “Vullis—Sal ons daaronder begrawe word?” (22 Augustus 2002). Wanneer ’n mens in ’n hoogs geïndustrialiseerde land woon, is dit maklik om deur ’n “weggooimentaliteit” beïnvloed te word. Julle artikel het my laat stilstaan en oor die gevare daarvan laat nadink. Ek sal van nou af twee keer dink voordat ek van iets ontslae raak!

J. B., Verenigde State

Ek het die artikels oor die vullisprobleem regtig geniet. Ek het lank in ’n groot woonstelgebou gewoon waar daar verskeie groot vullishouers op die perseel was. Ek het eenkeer buite geloop en opgemerk dat daar ’n splinternuwe koffiemaker bo-op die vol vullishouer was. Vroeër het twee tienerseuns gesê dat hulle ’n goue horlosie daar gevind het. Ek kon nie glo wat ’n mens in daardie vullishouers kon kry nie. Nou is daar ’n teken wat sê: “Moenie in die vullishouers krap nie.”

B. Q., Verenigde State

Kosmetiese chirurgie Ek wil julle hartlik bedank vir die artikel “Jongmense vra . . . Moet ek kosmetiese chirurgie ondergaan?” (22 Augustus 2002). Ek is 14 jaar oud, en by die skool spot party leerlinge my oor ’n sekere kenmerk van my gesig. Ek was oortuig dat ek dit moet verander. Hierdie artikel het my gehelp om my ware beweegredes te ondersoek en om te verstaan hoe verkeerd ek was. Wat vir Jehovah belangrik is, is ons innerlike skoonheid.

C. T., Frankryk

Tydens ’n gesprek met ’n medewerker ’n paar maande gelede het ons oor kosmetiese chirurgie begin praat. Sy het gevoel dat dit verkeerd is, aangesien dit minagting vir die Skepper toon. Op daardie stadium kon ek niks spesifieks in ons publikasies kry nie. Maar ek het vir haar gesê watter Bybelbeginsels hierop van toepassing is, wat ek later in hierdie artikel gevind het. Toe ek vir haar die artikel wys, was sy baie opgewonde daaroor.

M. R., Verenigde State

Kleur Nadat ek die artikel “Voeg ’n tikkie kleur by” (22 Augustus 2002) gelees het, was dit makliker om te besluit om my huis te verf. Dit is nie net ek nie, maar ook my begroting wat julle vir hierdie artikel bedank!

R. M., Verenigde State

Aantreklikheid Ek is 21 en voel dat ek nie aantreklik is nie. Tyler se woorde in die artikel “Jongmense vra . . . Hoe kan ek myself aantrekliker maak?” (22 Julie 2002) beskryf presies hoe ek voel. Die praktiese Bybelraad in hierdie artikel was net wat ek nodig gehad het. Dankie vir hierdie en ander publikasies wat voortdurend hulp bied aan jongmense wat voor soveel uitdagings in hierdie goddelose wêreld te staan kom. Al wat ek nou moet doen, is om hierdie raad toe te pas.

P. L., Zambië

Gebed Ek wil julle opreg bedank vir die artikel “Die Bybelse beskouing: Gebede wat deur God verhoor word” (8 September 2002). Die dag toe ek dit gelees het, was ek baie mismoedig. Die woorde van Jesaja 41:10 het my regtig versterk. Ek is so bly dat ek nie die enigste een is wat deur Jehovah versterk word nie, maar dat ander ook krag van hom ontvang en dat hy al ons gebede hoor en selfs ons gedagtes ken! Ek woon al 20 jaar lank in ’n godsdienstig verdeelde huis. Dit is nie maklik nie, aangesien ek ook al meer as 30 jaar aan ’n chroniese siekte ly. Baie dankie vir hierdie wonderlike tydskrifte. Hulle gee my die krag om aan te gaan.

D. G., Duitsland