Van ons lesers
Hare Ek het die artikel “Is jy bekommerd oor jou hare?” (8 Augustus 2002) waardeer. Ek is al 14 jaar ’n skoonheidsdeskundige. Die manier waarop julle sê dat ’n mens beskadigde hare moet borsel, is hoe ons dit doen. Ek is beïndruk om te sien hoe professioneel julle artikels werklik is.
K. K., Japan
As ’n ywerige leser van die Ontwaak! moet ek my waardering vir hierdie artikel uitspreek. Ek het gedurende my vroeë tienerjare my eerste grys hare begin kry. Teen my laat tienerjare was die grys opsigtelik, selfs op ’n afstand. Dit het my baie ongemaklik laat voel. Hierdie artikel het my gehelp om ’n beskeie beskouing van my fisiese voorkoms te hê, terwyl ek my daarop toelê om godvrugtige eienskappe aan te kweek.
E. J., Nigerië
Verliefdheid Dankie vir die nuusbrokkie “Deur die liefde bedwelm” in “Ons beskou die wêreld” (8 Augustus 2002). Hierdie artikel het my help besef dat verliefdheid, selfs wanneer dit lank voortduur, nie noodwendig ’n vaste fondament vir ’n gelukkige huwelik is nie. Sulke raad kan ’n mens waarlik van ’n dwase weg red!
P. L., Rusland
Die luau Ek het julle artikel “Kom ons hou ’n Hawaise luau” (8 Junie 2002) met groot belangstelling gelees. ’n Paar jaar gelede het ek ’n luau in Hawaii bygewoon. Dit het vir my gevoel asof dit sterk godsdienstige en spiritistiese ondertone het. Watter verskil is daar tussen die luau, al is daar vandag nie godsdiens of spiritisme by betrokke nie, en ander vierings wat van heidense oorsprong is, maar wat bloot deur hedendaagse kulture as ’n genotvolle geleentheid beskou word om as ’n familie saam deur te bring?
L. F., Verenigde State
“Ontwaak!” antwoord: Soos daar in ons voetnoot op bladsy 24 gesê is, het die “luau” dalk oorspronklik die een of ander verband met valse godsdiensgebruike gehad, maar die woord verwys nou bloot na ’n Hawaise feesmaal. ’n Spesifieke geselligheid waaraan die woord “luau” gekoppel word, kan óf gepas óf ongepas vir ’n Christen wees om by te woon. Soos op alle gebiede van die lewe, moet Christene besluite maak wat hulle ’n skoon gewete voor Jehovah God sal laat behou.—1 Timoteus 1:5, 19; sien ook die “Ontwaak!” van 8 Januarie 2000, bladsye 26-7.
Nageboortelike depressie Baie dankie vir die artikel “Ek het my stryd teen nageboortelike depressie gewen” (22 Julie 2002). Dit voel asof hierdie artikel vir my geskryf is. Al ly ek nie aan nageboortelike depressie nie—ek en my man het nie kinders nie—worstel ek die afgelope jaar en ’n half met depressie en angsgevoelens. Ek was die hele tyd moeg en verward en kon nie eers eenvoudige besluite maak nie. Ek was bang om tussen mense te wees. Ek kon nie eers na die kruidenierswinkel gaan sonder my man nie. Dit gaan nou beter met my en ek neem medikasie. Uit hierdie artikel kan ek sien dat ek nog baie meer kan doen. My man het ook die artikel gelees, en hy het gesien hoe hy meer ondersteunend kan wees.
J. R., Verenigde State
Hoe dankbaar is ek tog vir die artikel oor nageboortelike depressie! Ná die geboorte van my derde kind het die dokters vir my gesê dat ek aan ernstige nageboortelike depressie ly. Voordat ek dit gehoor het, het ek gedink ek word mal. Dit was ’n aaklige, donker tyd vir my en my gesin. Ek neem kruiemiddels en vitamiene en doen gereeld oefening, en dit alles help my om die situasie tot die beste van my vermoë te hanteer. Bedank Janelle asseblief dat sy haar verhaal aan ons vertel het.
J. C., Verenigde State