Van ons lesers

Nageboortelike depressie Ek wil julle van ganser harte bedank vir die artikel “Ek het my stryd teen nageboortelike depressie gewen” (22 Julie 2002). ’n Jaar en drie maande gelede het ek ’n baba gehad. Skielik was ek ’n ander mens. Soms het ek my geliefdes seergemaak omdat ek nie kon verstaan wat besig was om met my te gebeur nie. Dit begin nou beter gaan. Die artikel het my gehelp.

A. P., Roemenië

Nadat my Bybelstudent die artikel gelees het, het sy vir my gesê dat sy die siekte het. Sy gaan nou elke week hospitaal toe en met behulp van medikasie kan sy haar verantwoordelikhede met blymoedigheid nakom.

A. M., Japan

Hierdie artikel is ’n antwoord op my gebede. Julle weet presies wat ons as susters nodig het. Dit het aan my bewys hoe lief Jehovah en sy organisasie ons het.

C. W., Verenigde State

Ek herstel van nageboortelike depressie, en hierdie artikel het my versterk en aangemoedig. Julle het besonderhede ingesluit wat slegs ten volle verstaan kan word deur iemand wat hierdie probleem ondervind het. Ek gaan hierdie Ontwaak! op ’n veilige plek bêre en die nuttige wenke raadpleeg as ek aanmoediging nodig het.

E.V.F., Brasilië

Ek het nog nooit ’n artikel gelees wat my hart so diep geraak het soos hierdie een nie. My huwelik het verbrokkel as gevolg van my nageboortelike depressie. My dogter is nou vyf jaar oud, en ek is baie lief vir haar. Dit het my omtrent drie jaar geneem om die situasie te oorkom.

A. O., Puerto Rico

Ek het drie maande lank met nageboortelike depressie geworstel. Toe ek hoor dat die jongste Ontwaak! ’n artikel oor die onderwerp het, het ek so gehuil dat ek nie kon praat nie. Dit was die beste artikel oor nageboortelike depressie wat ek nog gelees het. Ek is dankbaar teenoor Jehovah en sy organisasie dat hulle so goed na ons omsien!

A. L., Kanada

Jongmense vra Ek wil julle opreg bedank vir die artikel “Jongmense vra . . . Hoe kan ek myself aantrekliker maak?” (22 Julie 2002). Ek is 22 jaar oud, en hierdie artikel het my aangemoedig om aan my innerlike eienskappe te werk. My eerste doelwit is om sagmoedigheid aan te kweek. Bowenal wil ek pragtig in Jehovah se oë word. Hou asseblief aan om sulke goeie artikels te voorsien.

A. H., Japan

Hierdie artikel het my hart geraak. Ek is 18 jaar oud en soms vergeet ek hoe belangrik dit is om aan my geestelike eienskappe te werk. Van nou af is ek vasbeslote om, met Jehovah se hulp, die vrugte van die gees aan te kweek.—Galasiërs 5:22, 23.

M.R.A., Brasilië

Gedurende die afgelope twee jaar, het ek dikwels gewonder of mense my aantreklik vind, en soms het ek gevoel dat ek nie mooi genoeg is nie. Nadat ek hierdie artikel gelees het, loop ek oor van waardering omdat ek nou weet dat ek myself vir God aantreklik kan maak deur ’n kneg van hom te wees en dat dit is wat die meeste tel.

I. P., Verenigde State