Van ons lesers

Ontwaak! word geprys Julle doen ’n baie goeie werk deur die Ontwaak! uit te gee. Julle gee mense hoop. My eerste twee eksemplare van die Ontwaak! het ek by my bure gekry toe my man dood is. Ek het terneergedruk gevoel en wou niemand sien nie. Maar nadat ek julle tydskrifte gelees het, het ek gekalmeer en besef dat dit nie die einde van my lewe is nie. Later het my dogter vir my nog twee gebring, wat ’n verpleegster vir haar gegee het toe sy in die hospitaal was. Daarna het van die plaaslike Getuies vir my ’n paar op straat gegee. Ek het net ’n paar eksemplare van die Ontwaak!, maar ek lees dit oor en oor wanneer ek terneergedruk voel. Dit leer mense wat goed is en help hulle om die redes vir ons optrede te verstaan.

I.J.A., Rusland

Swakhede Dankie vir die artikel “Die Bybelse beskouing: Ons swakhede—Sal God dit oorsien?” (8 November 2002). Dit is ongetwyfeld die beste hulp wat ek nog ontvang het. Dit het my baie gehelp om te verstaan hoe God ons swakhede beskou.

E. C., Verenigde State

Ek het tot Jehovah gebid oor ’n persoonlike probleem en op ’n antwoord gehoop. En toe het julle hierdie artikel gedruk. Nadat ek dit gelees het, het ek ’n dankgebed gedoen.

M. S., Japan

Klawerborde Ek moes net skryf om dankie te sê vir die artikel oor klawerborde met die titel “Kan jy die verskil sien?” (8 November 2002). Ek was nog altyd lief vir musiek—veral klaviermusiek. En ek wil graag van die liedjies leer wat ons by die Koninkryksaal sing. Ek gaan probeer deur op die sintetiseerder te begin oefen wat al jare lank in die hoek staan.

V. T., Verenigde State

Omdat ek die klarinet bespeel en ’n musiekliefhebber is, wou ek die musiekwêreld van die klawerbord verken. Ses jaar gelede het ek klavierlesse begin neem, wat nie finansieel moontlik sou gewees het sonder die gebruik van ’n digitale klavier nie. Dit kan die klanke van ’n klavier en ’n klavesimbel voortbring.

S. T., Skotland

Ek het musiek as vak op skool. Ek het ’n bietjie omtrent klawerbordinstrumente geleer, maar kon nie verstaan hoe hulle gemaak word of wat hulle kenmerke is nie. Hierdie artikel, met sy maklik verstaanbare verduidelikings en interessante prente, het my gehelp om my begrip van die onderwerp te verbreed. Baie dankie.

A. M., Japan

Crazy Horse Dankie vir die artikel “Crazy Horse—’n Berg word in ’n monument omskep” (8 November 2002). Dit was net betyds vir my skooltaak oor die Sioux en Cheyenne en hulle lewenswyse. My onderwyser het my werk geprys! Dankie.

F. V., Verenigde State

Reünie Ek het nou net die artikel “’n Unieke reünie ná 30 jaar” gelees (22 Oktober 2002). Ek voel waardering, vreugde en hartseer. Ek is bly dat Mark Ruge en Dennis Sheets hulle weg na Jehovah gevind het. Maar ek is hartseer omdat vyf van my kinders dit nie gedoen het nie, al is hulle as Christene grootgemaak. Hoeveel pyn sou hulle tog kon vryspring as hulle net hulle weg na God kan vind! Ek bid dag en nag dat hulle dit uiteindelik sal vind. Dankie vir die artikel. Dit het in ’n ware behoefte voorsien.

M. O., Verenigde State