Van ons lesers
Noodlenigingspogings Ek skryf net om julle te laat weet hoeveel ek die artikel “Liefde in aksie—’n maraton-noodlenigingspoging” waardeer het (22 November 2002). Toe die oorstroming in Junie 2002 in Houston, Texas, begin het, was my broer weens kongestiewe hartversaking in ’n koma in die hospitaal. Sy huis is feitlik deur die vloedwaters verwoes. Maar selfs terwyl hy nog in ’n koma was, het ons Christenbroers met herstelwerk aan sy huis begin—hulle het die nat matte en stapelmure uitgehaal en sy huis ontsmet. Hulle hulp het dit vir my moontlik gemaak om by my broer in die hospitaal te bly. Hy het later uit die koma gekom. My liefde en waardering vir Jehovah en sy wonderlike organisasie sal nooit in ’n kort briefie uitgedruk kan word nie.
P. H., Verenigde State
Ek wil graag my waardering uitspreek vir die wonderlike voorreg om aan so ’n besorgde, liefdevolle broederskap te behoort. Dit was opwindend om te lees hoe die vrywilligers van hulle tyd en middele gegee het om vloedslagoffers te help. Hulle het waarlik Christelike liefde weerspieël.
A. M., Nieu-Seeland
Godsdiensvryheid Iemand het vir my die Ontwaak! van 22 Junie 2002 met die artikel “’n Verdraagsame koninkryk in ’n onverdraagsame tyd” gegee. Aangesien hy geweet het dat ek ’n Unitariër is, het hy gedink dat ek daarin sou belangstel. Hy was reg. Ek het in die Verenigde State universiteit toe gegaan en dr. Earl Morse Wilbur (wat in die artikel aangehaal word) persoonlik leer ken. Ek het ook baie lesings oor die geskiedenis van die Unitariërs bygewoon. Maar ek sal nie eers probeer om so ’n omvattende artikel soos julle s’n te skryf nie!
M. M., Tsjeggiese Republiek
Gevaar van verstikking Julle antwoord aan die leser wat geskryf het oor worsies wat jong kinders kan laat verstik in “Van ons lesers” in die nommer van 22 November 2002, het my geskok. Wortels kan kinders ook laat verstik!
A. R., Verenigde State
“Ontwaak!” antwoord: Ons waardeer hierdie leser se opmerkings. ’n Nuusbrief oor kindersorg sê: “Hoewel dit bekend is dat kinders al aan stukke appel, rou wortelstokkies, beskuitjies en springmielies verstik het, is worsies, neute, suiglekkers en druiwe die vier kossoorte wat die meeste sterftes veroorsaak.” Gesondheidsorgwerkers waarsku nietemin dat wortelstokkies ’n wesenlike gevaar vir babas onder een jaar kan inhou.
Bybeldrukwerk Dankie vir die artikel “’n Toevlug vir Bybeldrukwerk” (8 September 2002). Vandag is dit vir ons so maklik om ’n Bybel in ons eie taal te kry dat ons kan vergeet watter opofferinge mense vroeër gedoen het om dit moontlik te maak. Hierdie artikel het my waardering vergroot vir ons liefdevolle hemelse Vader en die feit dat hy die Bybel aan alle opregtes van hart beskikbaar stel omdat hy vir ons omgee.
E. S., Brasilië
Nageboortelike depressie Ek moes net skryf oor die artikel “Ek het my stryd teen nageboortelike depressie gewen” (22 Julie 2002). Ná die geboorte van my kind het ek ook vreemd gevoel en al die gevoelens ondervind wat in julle artikel beskryf word. Ek was skaam om met ander daaroor te praat. Ek was selfs bang dat my man nie sou verstaan nie. Gevolglik het ek alleen gely en nooit geweet wat met my verkeerd was nie. Hoe dankbaar is ek tog teenoor Jehovah en teenoor julle vir hierdie hulp! Al voel ek dalk nog af en toe depressief, sal dit nou vir my makliker wees om te verduur.
F. L., Belaroes
[Foto-erkenning op bladsy 30]
Foto: Houston Chronicle