Ramp op see—Tragedie op land
DEUR ONTWAAK!-MEDEWERKER IN SPANJE
’N EKOLOGIESE en ekonomiese ramp het op 13 November 2002 begin toe die olietenkskip Prestige in die onstuimige see begin lek het. Die pogings om die beskadigde skip te red, het misluk, en ná ses dae—waartydens byna 20 000 ton olie uitgelek het—het die tenkskip uiteindelik in twee gebreek en gesink, ongeveer 200 kilometer van die kus van Spanje af.
Die tenkskip het met meer as 50 000 ton olie aan boord gesink, en elke dag het nog sowat 125 ton olie uit die romp gelek. Nuwe oliekolle het gevorm en onkeerbaar in die rigting van die kus begin dryf. Omdat swaar stookolie so vloeitraag en giftig is, was die uitwerking wat dit op die omgewing gehad het besonder tragies.
Die dampe het ’n aantal vrywilligers oorweldig wat probeer het om die strande skoon te maak. Boonop het die stookolie ’n deinende massa teer geword wat soos swart kougom aan die rotse gekleef het. “Dit is een van die ergste oliestortings in die geskiedenis”, het Michel Girin, die hoof van die Sentrum vir Dokumentasie, Navorsing en Eksperimentering in verband met Waterbesoedelingsongelukke, gesê.
Verbete pogings
Honderde vissers het weke lank op see ’n stryd gevoer teen oliekolle wat hulle lewensbestaan in gevaar gestel het. Die vissers het onvermoeid gewerk om die olie te verwyder voordat dit hulle strande kon bereik en een van die visrykste gebiede ter wêreld kon beskadig. Party mans het klonte van die olierige massa met hulle hande uit die water geskep. “Dit was uitputtende werk, maar dié van ons wat in klein bootjies was, het geen ander keuse gehad nie”, het Antonio, ’n plaaslike visserman, verduidelik.
Terwyl die vissers ’n stryd teen die olie op die see gevoer het, het duisende vrywilligers van regoor Spanje gewerk om die strande skoon te maak. Met hulle wit weggooibare oorpakke en maskers het dit gelyk asof hulle by biologiese oorlogvoering betrokke was. Maar hulle werk was eintlik om die olie versigtig in emmers te skep sodat dit verwyder kon word. Soos die vissers het party vrywilligers selfs hulle hande gebruik om die olie te verwyder wat die strande besoedel het.
Tragiese gevolge
Rafael Mouzo, burgemeester van Corcubión in noordelike Galicië, waar die kuslyn verwoes is, het gesê: “Ek het gedink ek gaan van hartseer sterf toe ek sien hoe die swart branders die olie teen die kaai in Muxía werp. Die oliestorting het ’n nadelige uitwerking gehad op die manier waarop soveel mense in ons dorp ’n bestaan maak.”
Ongelukkig het een van die oliekolle baie groot skade aangerig aan Spanje se pragtige nuwe nasionale park, Las Islas Atlánticas (Atlantiese Eilande). Groot seevoëlkolonies het nes gemaak op hierdie vyf voorheen ongerepte eilande naby die kus van Galicië. Die see om die eilande was besonder ryk aan seelewe.
Teen die begin van Desember was 95 persent van die park se kuslyn reeds met olie besoedel. Voëlkenners het geraam dat sowat 100 000 voëls geraak sou word. Duikers het selfs gesien hoe groot klonte soliede olie naby die seebodem dryf en die delikate mariene ekosisteem beskadig.
Jay Holcomb, wat ’n voëlreddingsentrum georganiseer het, het gesê: “Gewoonlik verdrink of verkluim die voëls. Die olie oortrek hulle vere en belemmer die isolerings- en waterweringsvermoë daarvan. Daarbenewens trek die swaar olie hulle ondertoe, net soos deurweekte klere ’n swemmer ondertoe kan trek. . . . Dit verskaf ’n mens groot bevrediging om van die voëls te red, selfs al is dit betreklik min.”
‘Net ’n kwessie van tyd’
Die wêreld is afhanklik van olie vir energie, maar om koste te bespaar, word olie dikwels in gevaarlike, swak onderhoude skepe vervoer. Gevolglik het The New York Times oor hierdie situasie gesê: “Dit is net ’n kwessie van tyd voordat ’n ongeluk plaasvind.”
Die Prestige is die derde tenkskip wat in die afgelope 26 jaar naby Galicië se kus gesink het. Ongeveer tien jaar gelede het die Aegean Sea naby La Coruña in noordelike Galicië gesink en 40 000 ton ru-olie gestort, en party dele van die kuslyn daar naby het nog steeds nie daarvan herstel nie. En in 1976 het die Urquiola in dieselfde riviermonding gesink, en dit het tot ’n rampspoedige oliestorting van meer as 100 000 ton gelei.
As gevolg van die onlangse ramp het die Europese Unie besluit om alle stookolietenkskepe wat nie ’n dubbele romp het nie, te verbied. Maar die tyd sal leer of hierdie maatreël voldoende sal wees om Europa se vernielde kuslyn te beskerm.
Dit is duidelik dat menseregerings nie in staat is om ’n wêreld sonder besoedeling—hetsy dit oliekolle, giftige afval of lugbesoedeling is—te verseker nie. Maar Christene sien uit na die tyd wanneer God se Koninkryk sal toesien dat ons planeet in ’n paradys omskep word wat nooit besoedel sal word nie.—Jesaja 11:1, 9; Openbaring 11:18.
[Prent op bladsy 20, 21]
Die Prestige het met 50 000 ton olie aan boord gesink
[Erkenning]
AFP PHOTO/DOUANE FRANCAISE