’n Pienk meer?

Deur Ontwaak!-medewerker in Senegal

KAN ’n meer werklik pienk wees? Die Retba-meer word die Pienk Meer genoem, en aangesien dit net 30 kilometer van ons huis in Dakar, Senegal, Wes-Afrika, af is, het ons besluit om te gaan kyk of dit werklik hierdie naam verdien. Toe ons daar aankom, sien ons hoe die water in die sonlig skitter. En sowaar, dit is ’n lieflike skakering van pienk. Ons gids verduidelik dat sonlig met mikro-organismes in die water reageer om die buitengewone kleur voort te bring. Maar hier is meer te sien as net die kleur van die meer.

Onder die meer se vlak water is daar ’n laag sout. Die water is so sout dat ’n mens daarin kan dryf, en ons sien party besoekers wat nie die geleentheid kan laat verbyglip om sonder inspanning op die oppervlak te dryf nie.

Dit is duidelik dat die Pienk Meer honderde mense van ’n inkomste voorsien (1). Langs die oewer laai werkers sout op vragmotors. Ons hou ’n oomblik stil om te sien hoe die plaaslike mense sout uit die meer haal. Ons kan mans sien wat in die meer staan, met die water tot by hulle bors, en wat die sout met lang pikke breek. Hulle skep dit met grawe in mandjies en laai dit dan in bote. Een van die werkers vertel ons dat dit drie uur neem om ’n ton sout bymekaar te maak. Die bote is so vol gelaai dat dit skaars kan bly dryf (2). Wanneer die bote by die oewer aankom, neem vroue die werk oor en dra hulle die sout in emmers op hulle kop (3). Wanneer hulle so saam werk, dien hulle as ’n menslike vervoerband.

Ons uitstappie was ’n fassinerende ondervinding. Hierdie pienk meer is nog een van die talle wonders wat ons aarde ’n kosbare gawe maak wat van Jehovah kom.—Psalm 115:16.

[Foto-erkenning op bladsy 18]

Photo by Jacques CLEMENT, Clichy, FRANCE at http://community.webshots.com/user/pfjc